TARAON TI BIAG: Ni Apo Jesus iti Biag

Tinawen a selebraran ti pannakaiyanak ni Apo Jesus. Ngem kalpasanna, mapukaw kadin ti kaipapanan ti selebrasion?

Kas itoy a pakasaritaan…

Naliday unay ni Manang Lucing. Ngamin, kayariganna ti ul-ulila iti bukodna a pagtaengan. Mariknana unay ti kinamaymaysana iti balayda. No tiempo ti pannangan, ti laeng katulongda a ni Inday ti kalanglangna. Isuda a dua lattan ti agsango a mangan.

Masansan a rabiin no sumangpet ni Mang Bert nga asawana, maysa nga arkitekto. Adu ngamin ti ikamakamna a trabaho. Siempre, manganto metten iti ruar. Iti bigat, umigup laeng iti kape, agdardarasen a mapan iti trabahona. Itinto laengen opisinana ti pammigatanna. Saan nga aggawid iti aldaw tapno mangaldaw koma iti balayda.

Ni Irish, ti balasangda,  kahera ti maysa a banko ket manmano a mangan iti balayda. Rabiinton no sumangpet gapu iti pappapananna a gimmick kadagiti kaopisinaanna ken kabarkadana. Saan met a mangaldaw iti balayda. Iti agsapa, manmano a mammigat. Masapa nga agrubbuat ta pangadaywen ti pangopisinaanna. Kamkamakamenna  ti orasna.

Ni Denver, nga inaunaan, ken agtrabtrabaho iti maysa a line agency ti gobierno ket rabii met a sumangsangpet. Agdardarasto man met laengen a rummuar iti agsapa lalo no adda ikamakamna a proyektoda. Saan met nga agaw-awid daytoy a mangaldaw.

Ni Lovelyn, ti buridek, estudiante, masansan nga iti ruar a mangan. Iti bigat, kamakamenna  met ti orasna a mapan agiskuela. Ad-adda a kadagiti fastfood joint ti pangpangananna. No yawis ni Manang Lucing ti pannangan, irasonna daytoy nga itinton Jollibee wenno McDonald wenno Chowking wenno sadino la  ditan ti irasonna a fastfood a panganan.

Iti laengen Sabado wenno Domingo nga adda mailaw-an a makilanglang ken ni Manang Lucing. Ngem kas ti kakirang ti tudo iti Abril ti panagsasangoda a sangkapamilia.

Daytoy ti pagsensennaayan la unay ti ina. Addan  kabukbukodan a taray ti biag tunggal kameng ti pamiliana. Idinto ta isu ket ditoyna  lattan balayda.

No sika ti ina, saan laeng a mapespes no di pay ket kasla maiw-iwa iti nakapimpino dayta pusom wenno kasla matudtudok iti rinibribu a dagum ti utekmo. Ngem nasken a maawatam ti kasasaadmo. Addan bukod a lubong dagiti kameng ti pamiliam. Idedmam lattan. Ania ngarud, soluem ti sainnek.

Awanen dagidi tiempo nga aggigiddanda a mammigat, mangaldaw, ken  mangrabii, dayta ti pasaray isaning-i ni Manang Lucing. Ala ket nalaing met nga agluto. Ngem apay itan a nagbaliw ti ayus ti panawen?

“Kamkamatenda ngamin ti orasda, Manang. Uray ta addaak met a kaduam,” yandingay latta met ni Inday, ti katulong.

“Agyamanak unay, Inday. Naimbag  kenka  ta  makaawatka.”

Iti maysa nga aldaw a panaggapu ni Inday iti tiendaan, adda insangpetna nga aso. Maysa a pitbull. Nakapimpintas nga aso. Bibo nga aso. Makaay-ayo!

“Nangalaam?” dinamag ni Manang Lucing.

“Simmursurot kaniak, Manang. Agan-aneng-eng. Kasla agsangsangit. Awan met ti nakitak a makinkukua, intugotkon a. Kasla ngarud maragsakan idi inubbak. Isublinto met laeng a, no adda mangtunton,” kinuna ni Inday.

“Siguro, naiyaw-awan…” kinuna ni Manang Lucing.

“Inyawidkon, Manang, ta amangan no masalamaan pay dagitay kunkunak dita a sarangusong ket silianda pay ti kilawenna,” inyellek ni Inday.

“Ala  wen, aggian pay ditoy balay ket itedtayonto no tuntonen ti makinkukua…”

Ti aso ti nangisangbay iti ragsak iti balay da Manang Lucing. Nalaing a makiangtot ti aso. Nalangay.  Nadalus ta ammona ti mangiyadayo iti rugitna. Nalaing a sumala. Ammona  ti agiyawat iti kasapulan, kas iti sinelas, sapatos ken pagiwarnak. Mabaon daytoy.

Iti isasangpet ti aso, napukaw ti liday ni Manang Lucing. Saanen nga agmaymaysa ti panagriknana. Addan katungtong ken kalangayna iti uneg ti pagtaengan.

(Adda tuloyna)