TARAON TI BIAG: Ni Jesus iti Biag

Gapu iti aso, masapan nga agawid iti malem ni Mang Bert. Adda latta pasalubongna para iti aso.

Ni Irish, bimmattaway met ti gimmick a sigud nga aramidna. Masapan nga agawid ket adda latta pasalubongna nga ay-ayam, bado, laso para iti aso. Inggatangan pay ni Irish ti aso iti kallugong ken shades a nagduduma iti marisna,Ā  nagduduma a basket a kagaten ti aso a pagikabilan kadagiti awitenna. Maay-ayatan met ti aso. KaslaĀ Ā  fashion model.

Nagduduma met a makan ti isangpet ni Lovelyn para iti aso. Kanayonna a suruan nga agsala ken magna a nakangato dagiti kamauna a sakana.

Ragsak ti insangbay iti balay da Manang Lucing. Agsisinnublatda a bumalay a mangubba iti aso. Inaldawda a digosen ti aso agsipud ta imbilangda a kasla kameng ti pamiliada.

Kadua da Manang Lucing ken ni Mang Bert a maturog iti siledda ti aso.

Manipud idi simmangpet ti aso iti balayda, nabukel manen ti pamilia da Manang Lucing: aglalanglangdan a manganā€” iti pammigat, pangaldaw, ken iti pangrabii. Sangkapamiliada nga agbuya iti telebision wenno pelikula. Anian aĀ  ragsak ni Manang Lucing. Naisubli ti ragsak ti pamiliana. Gapu iti aso, nagsubli ti kinasingedda a sangkapamilia!

Ngem saan nga agnanayon ti kinaragsak. Dumteng met ti liday iti biag ti tao. Natunton ti makinkukua ti aso. InkapilitanĀ  nga inted ni Manang Lucing. Naliday unay ni Manang Lucing. Kasta met ni Mang Bert, ni Irish, ni Denver ken ni Lovelyn. Idi agangay, nagsublida met laeng iti sigud nga aramidda. Awan ti naaramidan ni Manang Lucing. KinaemnaĀ  lattan ti bibigna.

Idi dimteng ti Paskua, naamiris ni Manang Lucing ti pudpudno nga anag ti panagmaymaysa ti maysa pamiliada. Ta itiĀ  pannakaipasngay ti Messiah, sumangbay met ti panagmaymaysa ti rikna,Ā  kapanunotan ken turongenda iti biag: kappia, panagayat ken namnama.

Ngem kalpasan ti Paskua, ania ti mapasamak? Panagsubli iti sigud nga aramid. Kasta met iti pamilia ni Manang Lucing.

Kasapulan pay ti maysa nga aso a simmangbay iti pamiliada tapno laeng maisubli ti kinaragsak, panagkaykaysa ken kappia iti uneg ti pagtaenganda. Ngem kalpasan a naisubli ti aso iti makinkukua, nagsubli met laeng iti sigud a kasasaad ti pamilia.

Kastoy met ti biag. AddaĀ  paskua a pakaimuntaran ti kappia, panangisagut, panagkaykaysa ken panagayat a sangsangkamaysa. Ngem kalpasan ti paskua, agsubli met laeng iti sigud a kasasaad!

Saantayo koma nga urayen a sumangbay iti biagtayo ti maysa nga ayup, ti paskua wenno asino wenno ania la ditan a sumangbay a mangited kadatayo iti ragsak, kappia ken panagiinnayat. Ta adda laeng dagitoynaitalimameng a values iti puspusotayo.

Apay nga urayentayo pay laeng ti sumangbay? Apay nga urayentayo pay laeng ti paskua? Mabalintayo met ti agragsak, agiinnayat ken maaddaan iti kappia uray no awan ti ayup a sumangbay ken uray no saan a paskua. Saan kadi a nasaysayaat no aginaldaw koma ti paskua?

Apay nga urayentayo pay laeng ti paskua, idinto ta mabalintayo met ti agragsak, agiinnayat ken maaddaan iti kappia iti inaldaw-aldaw?#