Tunggal tao adda akemna nga ipatungpal iti dana ti biag. Addaan iti bukod a wagas tunggal aramid, trabaho wenno propesion a panangipamatmat iti pammati iti Dios a saan a marugitan ti kinatao — kabaelan, talento ken ti inadal. Ngem no dadduma, dumteng dagiti pannubok a mangpungtil ti pammatina.

No sika ti pakapasamakan kadaytoy a pannubok, ania ti aramidem?

Iti dayta a malem, bayat ti panagtan-awna, nadlaw ni Doktora Jenny Morales a nakuyem a tangatang. Agtudo man ngatan, nakuna ni Doktora Jenny iti bagina. Maysa a obstetrician-gynecologist wenno doktor dagiti masikog ken aganak ni Doktora Jenny.

Pinastrek ti napintas a sekretariana ti maysa a babai a pasiente. Panayagen, napudaw ken immal-o ti pammagi ti pasiente. Immapsay kadagiti abagana ti buokna. Ammo lattan ni Dra. Jenny a nadagsen ti parikut ti pasiente. Ngem nairuamen ti doktora kadagiti kakastoy a banag.

Binasa nga immuna ti doktora ti referral nga inyawat ti medical secretary.

“Eliza. Eliza gayam ti naganyo, misis?”

“Wen, doktora, “insungbat ti pasiente.

“Ania ti maitulongko kenka? Umayka kadi agpa-prenatal check-up?”

“Doktora, masikogak. Tallon a bulan. Kayatko nga iregreg daytoy!”

Naibbatan pay ti doktora ti ay-ayamenna a ballpen ket natnag iti puraw a tiles a basar. Kasla nakangngeg ti doktora iti pakdaar ti umay a bagyo. Iti silulukat a tawa, nariknana ti immuneg a salemsem. Tinaldiapanna ti nakuyem a tangatang.

“Pangaasiyo, doktora, ikkandak koma iti agas a pangparegregko iti sikogko.”

“Eliza, imposible dayta kayatmo a mapasamak.”

“Apay ketdin a saan a mabalin a mapasamak, doktora? Itedmo laeng laeng kaniak ti agas a tomarek ket maikkaten, saan kadi?”

“Addan dita saklolom dayta. Biagem laengen. Nadagsen a basol ti mangiregreg iti sikog.”

Nagdumog nga aglulua ni Eliza. “Doktora, awan ti ama ti sikogko,” dandani di sumngaw ti timekna.

“No agtalekka kaniak, kayatko nga isalaysaymo no kasano a napasamak dayta,” kinuna ti doktora.

Arthur ti nagan ti ama ti ubing. Kaayan-ayat ni Eliza. Idi kasangay ni Arthur, napanda nagbuya iti sine, nangan iti restaurant ken nag-night club. Idi aggawidda, iti otel ti naturongda. Idi damo, nagkitakit ni Eliza. Ngem nagpabus-oy met laeng gapu iti pangikari ni Arthur a dina baybay-an.

“Kalpasan a nagtalekak kenkuana, kalpasan nga intalekko ti aminko, kastoy pay ti subadna. Binaybay-annakon, binaybay-annakon…” naganug-og ni Eliza.

“Saanka a matulongan iti parikutmo, Eliza,” kinuna ti doktora.

“Doktora, pangaasiyo, tulongandak koma. Sidadaanak nga agbayad iti kayatyo basta la ketdi masalbarak iti sigurado a pannakaibabain.”

“Eliza, mangbiag iti tao, saan ket a pumatay, ti sinapataak a pagrebbengan. Iti kaanoman, saanko a salungasingen dayta a sinapataak.”

“Doktora, agpakpakaasiak. Kaasiandak koma.”

“Nasaysayaat no biagem laengen dayta, Eliza. Ammom aya no iti panangbiagmo kadayta, isunto ti mangited kenka iti ragsak ken nam-ay?”

“Saan a mapasamak dayta, doktora!  No saan a maikkat wenno maregreg, agbalinto a pakaibabainak.”

“Dakkel a basol no iregregmo dayta, Eliza. Saan laeng a basol iti linteg ti tao; kangrunaanna iti linteg ti Dios!”

(Adda tuloyna)