Footer

TARAON TI PANUNOT: Ania ti nadakdakes: ti agsirip wenno agtakaw?

Malagipko pay laeng idi agtutuboak sadiay Sitio La Loma, Brgy. San Antonio, Narvacan, Ilocos Sur, ugalimi ti agummong iti bigbigat. Siempre, tungtongan wenno saritaan,  umno man wenno saan ti topiko. Adda saan nga agpaatiw iti diskusion, adda met makidiskusion laeng tapno magsutil.

“Ania ti nadakdakes, ti agsirip wenno ti agtakaw?” maysa kadagiti kabarkadak ti nangiruangan. Nagtayyek dagiti bukelbukel ti matami ken timmakder dagiti lapayagmi. Saan nga ordinario a saludsod dayta, di kadi?

Nabingay ti kapanunotanmi. Adda  nangbaga a dakdakes ti agsirip. Adda nangitakder iti agtakaw. Adda met dagiti natali ti dilana, dida ammo ti pagtakderanda.

“Nadakdakes ti agtakaw ta naisurat pay iti Biblia: ‘dika agtakaw’.  Awan pakabasaam iti Biblia a dakes ti agsirip,” inkantiaw ti maysa a grupo.

“Ania la ketdin, no nagsiripka, kasla tinakawmo metten ti iduldulin a ‘kinabaknang” ti nagsiripam!” kinuna met ti bangir.

“Saan a makuna a tinakaw ta awan met innalam!”

“Dagita matam ti nangala!”

Whey! Saan a  maungpot dayta a diskusion. Awan ti mayat nga agpaatiw.

Kuna ti Ebanghelio ni San Mateo 5:27-30: “Nangegyo a naisao – dika makikamalala. Ngem ita, ibagak kadakayo a ti siasinoman a mangmatmat iti maysa a babai a gartemanna iti pusona, nakabasolen iti pannakikamalala. Ngarud, no ti makannawan a matam ti pakaigapuan ti panagbasolmo, suatem ket ibellengmo. Nasaysayaat a mapukaw ti maysa a paset ti bagim ngem ti amin a bagim ti maitapuak iti impierno. Ket no ti makannawan nga imam ti pakaigapuan ti panagbasolmo, putdem ken ibellengmo. Nasaysayaat nga awan ti takiagmo ngem ti sibubukel a bagim ti mapan iti impierno.”

Kadagitoy a binatog, kailian, nasungbatanen ti rikiar dagiti agsinnumbangir, saan? Ti mata, ibagianna ti sirip. Ti ima takaw. Ngarud, agpadpada a basol dagitoy.

Isuna laeng ta iti panagtakaw, nadagdagsen iti ima, aglalo no matiliwanka. Iti panagsirip, lalo no agminar dagiti muyong iti ruangan ti langit, dadaelenna ti santo nga utek, he-he.

Nupay kasta, saan a dinisenio ti Namarsua nga agakem dagitoy a paset ti bagi iti panagbasol no di ket iti pagsayaatan wenno kadagiti aramid ken panagpampanunot a pakarukodan iti kinatao.

Lalo a saan met a kayat ti Namarsua a mapanka idiay sakaananna a pawad, wenno bulsek. Ta imparsuanaka a kompleto, apay ngarud a dumatagka a kurang?

Isu nga adda iti puso ken panunottayo a mangidalan kadagita a paset ti bagi. Iti mekanismo ti bagi, agpanunot nga umuna ti utek sa kalpasanna, agtignay a mamaggunay kadagiti nadumaduma a paset ti bagi. Ngem no iti panunot pay laeng ket maamirisen ti umno ken saan, di kadi awan ti pakaitebbagan, saan?

Maysa met a circus ti biag. No naiyanakkan, nasken a ballasiwem ti barut a talaytayan babaen kadagiti sakam. No matnagka, matayka. Matayka iti basol, siempre. No maungpotmo a talaytayen, matayka latta ta isu ngarud ti ungton ti amin. Ngem matayka a sitatakneng a dumatag iti Namarsua.

Maysa laeng kadagiti nagkaadu a pakatnagan ti panagbasol dagiti mata ken imatayo. Nasken ngarud ti intay panagsaluad ken panangilisi kadagitoy iti pagbasolan.#