Footer

TARAON TI PANUNOT: Dimo ibain ti kinaasinom

No usigentayo a nalaing ti pakaitarusan ti bain iti diksionario, makuna a saan daytoy a maitutop nga aramid aglalo no panangtallikud a mismo iti kinaasino ken kinatao a pakapukawan metten a naminpinsan dagitoy. Narikut unay no daytoy ti maaramid wenno maiwagat. Nakarkaron a narikrikut no  inggagara daytoy a lipaten wenno pukawen. Narigatton a subboten wenno isubli ta addanton dakkel a giwang iti nagbaetan. Ngem sapulento latta ti kinaasino. Sapulento latta no asinoka a talaga ken no masapulamton, saanmonto a pulos nga ibbatan dayta a banag iti kaanoman, no di ket ipategmo.

Kastoy ti napasamak iti naminsan ken ni Florence, maysa a mangidardarirag iti kinasin-aw ti mission ken kinapateg ti BIBAK, maysa nga organisasion dagiti amin nga agnanaed a patneng iti Cordillera. Benguet, Ifugao, Bontoc, Apayao ken Kalinga ti kayat ti BIBAK.  Manipud iti puli dagiti i-Fenguet wenno Ibaloi ni Florence. Polingay ti birngasna.

Kastoy man ti pakasaritaan ni Polingay mainaig iti tematayo. Napasamak daytoy iti maysa nga aldaw iti Siudad dagiti Saleng…

“Ti laeng pagbainam ket isu ti kinaadda ti bainmo iti bukodmo a bagi,” kinuna ni inang ni Polingay, “ngem no ipannakkelmo ta bagim, maipagpannakkelmo no siasinoka a saanka nga aglinglinged iti anniniwan ti sabali…” naalumaymay ngem nabatad ken nabukel dagiti balikas ti nasuroken nga uppat a pulo ti edadna nga inana. Kasla sumarut dagiti matana a kunam la no mangam-amiris iti kinatao ni Polingay. Pagammuan, immanges iti nauneg, sa in-inut a nagtinnag dagiti matana a maladingitan. Immanges manen iti nauneg. Adda pannakapaay iti langa ti ina. Mabalin a gapu iti napaliiwna a kinaadda iti bain ti anakna iti panangsangailida iti pamilia ni Mr. Johnson Reid, gayyem nga Amerikano ti ina.

Saan a nakatimek ni Polingay. Kasla awan ti maitutop a balikas a pangiladawan iti marikriknana. Kasla naidarekdek iti nagtakderanna. Dina maawatan ti riknana. Nagdumog lattan. Napuotanna laengen ti bagina a mangisursurot dagiti matana iti likudan ni inangna nga agturongen iti kusina agingga a nailinged. Awanen ti kaduana iti salas iti dayta nga agalassingko ti malem ta nakaawiden amin a sangailida.

Sinalput ti panunotna dayta nga insawang ni inangna. Naipasagepsep iti kaungganna dayta a sinaona. Pasamak a nangiturong iti ad-adda pay a kaipapanan ti biagna. Pasamak a nangilukat kenkuana iti kinapudno.

Napasamak dayta a pagteng idi sangapulo ket uppat ti edadna. Dayta ti nangilukat ti panunotna tapno ilaksidna iti kinataona ti bain….

Iti dayta nga aldaw, kasla di mamati ni Florence iti impadamag ni inana.

“Ania ti kunayo, inang, sangailientayo ti sibubukel a pamilia ni Mr. Johnson Reid?”

“Wen. Kasta ti kuna ni manangmo. Umayda mangaldaw a sangapamilia ditoy balay inton Domingo. Tumulongka nga agisagana.”

Naragsakan iti nalimed ni Polingay.  Naasideg ni Polingay kadagiti ag-Reid ta no agawid manipud iti eskuela, masansan a dumagas iti trabaho ni manangna a Claire, social worker iti maysa a non-profit, non-stock organization, nga awan sabali nga akemna no di tulongan dagiti nakurapay a komunidad. Agkuyogdanton nga agawid nga agkabsat.

Kameng ni Johnson Reid iti organisasion a mangasistir iti panagrang-ay dagiti komunidad iti kabambanbatayan. Ni Mr. Reid ti napusgan a mangidaulo iti Northern Luzon. Bimmakasion laeng da Mrs. Reid ken dagiti annakda. Naragsakda a sangapamilia. Saanda nga idumduma ti bagida iti sangbayanda. Isu a nagayyem ni Polingay da Sandra, agtawen iti walo, ni Cindy, agtawen iti sangapulo ket dua, ken ni Louis, sangapulo ket lima.

Kaay-ayo ni Polingay a kapulapol ni Louis. Naragsak ngamin a kasarsarita ti barito ken nagraniag ti mata daytoy a taga-Ohio. Saanna a maawatan ti bagina ngem adda karkarna a pitik ti pusona no agpatpatangda ken ni Louis.

(Maigibusto)