: TARAON TI PANUNOT: Kasla Lansa Ti Dila | Tawid News Magazine - Weekly Ilocos News 📰

TARAON TI PANUNOT: Kasla Lansa Ti Dila

Bassit laeng ti dila ngem dakkel a banag ti itedna nga epekto. Dagita laengen balikas a “moderate their greed” ken “she’s a devil”,  nagbabatting a balikas  ngem pinataudna ti dakkel nga isyo-politikal iti agdama.

Ngem karirigatan amin kadagiti basol ti dila ti panaglibak wenno saan a panang-takder iti naisawangen a balikas wenno binatog.

Nagbassit ti dila. Ngem kasla nalaklaka ketdin a busalan ti kabalio tapno agtungpal kadatayo. Ngem mabalin itan a busalan ti kabalio ken ti dila tapno agtungpalda laeng iti pagayatantayo.  Pagdumaanda laeng, kuarta ti ibusalmo iti dila ngem saan a kuarta iti kabalio.

Kabaelantayo a paammuen dagiti agkakaatap  nga ayup, ngem ditay kabaelan a paam-muen ken mabusalan amin a dila tapno mairuar dagiti mailim-limed a kinapudno.

Sisasango iti agdama ti gimong iti nakain-inaka a kasasaad ta nagsubli manen dagiti rapas a dila nga agsam-sam kadagiti pagimbagan ti sapasap para iti bukodda a pagsayaatan.

Iti agdama, agsasallupang dagiti nagduduma a dila a mensahero ti balangkantis ken kinapudno. Dagiti dila a lilibeg wenno papaanawa, a nasay-sayaat  la koman a riendaan ti makindila  ta imbes a maka-tulong iti dur-asan ti parikut, makisawsaw met a manglilibeg.

Daytoy ti parikut iti agdama a gimong – ti panagsasallupang ken panangpepengnget dagiti dila. Nupay adda dagiti mulinaw wenno dila  nga agsasao iti kinapudno, saanda  pay laeng a rumimbaw itoy a kanito agingga nga adda  rikna a makaibtur a mangkaem kadagiti bibig wenno rikna a sumursurot iti agus ti karayan tapno saan a malned.

Ngem kakaasi laeng ti gimong a pagiispadaan dagiti makauram a dila. Koma no maaramat dagita a dila a kas rugian wenno sentro ti dur-as ngem saan  ta kangrunaan ketdi a ramen iti panang-patakias iti sabali. Ramen nga ad-adda pay a mangrunot ti gimong.

Tumpuar  koma  ti kinapudno. Dagiti laeng koma kinapudno ti maisawang, a di ket itanggaya ti dila a mabu-salan para laeng iti bukod a pagimbagan.

Makauram a talaga ti dila. Ngem nakarkaro ti basol ti dila a dina aminen  ken ibabawina ti naisawangna ta kasla lansa nga agkillo no pak-olan iti martilio ket agbalin nga awan ti serbina, lulot ken rumbeng laeng nga  ipalapal  tapno pakinabangan ti lati.

Kasta met ti dila.#

Taraon ti Panunot: Kasla Lansa Ti Dila