“Apay, an-annuemon ‘ta timbangan? Inikkatmo metten ‘ta ispringna?” uray la nayegyeg ti akak ni bakka a Salud ken ni Merto nga asawana. Kalkalpasda itay a nangaldaw ket agur-uroken dagiti dua a tsikitingda nga agtawen iti lima ken tallo. Adda puestoda a paglakuanda iti nateng ken prutas iti talipapa iti met laeng barangayda.
“Tagari lattan, baket. Iturogmo lattan. Uray siakton ti mapan aglako no madamdama. Uray pupuotem, ad-adu la ketdi ti maganansiata iti daytoy a napanunotko,” uray la kumarabukob ti isem ti narapis, bassit ngem naparagsit nga agkabannuag. Aglakolako laeng iti nateng ken prutas iti pangal-alaanda iti pagbiagda.
“Nagari man ngatan ti barusngi a panunotmo, lakay. Sabali la ketdi ti linaon dayta panunotmo. Inikkatmo ti ispringna ket kabarbaro pay laeng ‘ta timbangan?”
“In-adjust-ko laeng met iti 150 grams ti calibrationna. Isu pay a nayon ti maganansia.”
“Kunakto pay ket. Sinusuitiken dayta ammom. Isublim!”
Ngem saan a nagkir-in ti lakaki. Intuloyna latta ti aramidna.
“Mangibabainka iti dayta nga ar-aramidem. Rumang-ay aya ti tao a suitik?”
“No saanka nga agbalin a nasikap, awan ti dur-asanta.”
“No dimo, isubli, diak kayat ti aglako. Mabainak la ketdi a mangsuitik kadagiti sukita.”
Ngem di dimngeg ni Merto. Gapu ta di kayat ni Salud ti aglako, inkapilitan a ni Merto ti aggatang iti lakoda ken timmao iti tiendada.
“Makitam, baket, dakkel ti naganansiata,” inggarakgak ni Merto sana inyawat ti naglakuanna ken ni baketna. “Dakkel la ketdi ti maurnongta no kastoy ti kaadu ti paglakuanta.”
“Sika laeng iti mangiggem kadayta sinasaur a naglakuam,” mabusbusor ni Salud a nagkuna.
Iti uneg ti uppat nga aldaw, maib-ibbus a kanayon ti tagilako ni Merto. Inkabilna iti petakana ti naurnongna. Agsipud ta di kayat ni Salud nga iggeman, sangkatugot ni Merto ti kuarta. Pasaray iparabawna lattan ti petakana kadagiti lakona.
Kaadu ti aggatang iti dayta nga aldaw. Ket adu manen ti naglakuan ni Merto.
Ngem iti sumipnget a dandanin agawid, saanna a mabirokan ti petaka a pagiduldulinanna iti urnongna. Nalukagna aminen a lugar iti tiendana ngem saanna a masarakan. Ti ammona, imparabawna laeng itay kadagiti tagilakona. Ngem apay nga awan metten? Nasalisihan la ketdi! Nagawid a naliday. Namnaminsan a napukaw ti sapulna iti sumagmamano nga aldaw.
Ngem imbes a makaunget ni Salud, naggarikgik ketdi.
“Agkatawaka pay laeng ket tinakawanda la ngarud dataon!” imbir-it ni Merto.
Kinuna ketdi ni Salud: “Ammom kadi no apay a napasamak kenka dayta? Natakawanka ta ti naglakuam, naggapu iti suitik a timbangan! Nakarmaka, lakay! Naleksionanka. Nagsubli met laeng kenka ti saan a nasayaat nga aramidmo. Isu nga idiamon dayta nga aramidmo. Ta amangan no dakdakkel pay ti mapukawmo!”
Kabigatanna, insubli met ni Merto ti sigud a calibration ti timbanganna. Nautobna a saan a nasayaat ti agaramid iti sinasaur. Kas iti napasamak kenkuana, inapitna ti immulana.
No maminsan, kasapulan pay dagiti banag a mamagriing kadatayo iti kinapudno. Kinapudno nga awan ti agbiag iti kinikillo nga aramid a saan a makarikna iti pannakaipit.
Ngem asinoman a magmagna iti nalinteg a kalsada, makadanon iti ungtona nga awan a pulos ti sawsawirna
REFERENCE: Levitico 19: 35: Diyo sauren ti siasinoman babaen ti panangusaryo iti saan a husto a pagrukod, pagtimbang, ken pagsukatan.#