Footer

TARAON TI PANUNOT: Sapata

NANGNGEGMO kadin, kailian, ti agsapata a kunana: “Saksik ti Dios!”

Wenno: “Saksik ni Jesus.”

Dagiti dadduma: “Isapatak iti Nangato a Langit, awan ti inaramidko.”

Dagita, kailian, ti naynay a mangeg, saan?

Apay nga adda dagiti makaisawang kadagitoy a sapata idinto a mabalinna met a kunaen ti “Peks man!” sana pagkinnawiten dagiti tammudona! He-he-he…

Adda pay dagiti mangibalikas nga uray alun-onen ti pagtaktakderanna a daga no agul-ulbod. Wenno saan, uray makimat no saan a pudno ti ibagbagana!

Wenno, no saan, saan. No wen, wen. Ania la ketdin no kunaem pay nga uray no alun-onennaka ti daga a pagtaktakderam no agul-ulbodka?

Kas ken ni Lino a nalaing nga agsapata, kailian. Aglalaok dagiti sapatana ken ni baketna nga agnanayon a patpatgenna daytoy, a dinanto isukat iti sabali uray no baket ken lakayda.  Bassit la a lamiongna ken sapata, sa ket pagandarenna ti imana no kasta nga agpungtot ni kumander in tsipna, ayos ang buto-buto. Maiyalisna ti alipuspos ni Anneng a baketna.

Kas iti naminsan a nasukainan ni baketna nga adda lipistik iti kuelio ti badona. Sinitar ni baketna nga adda kinasinnarakna a babai ta kasano koma nga adda lipistik iti kuelio ti badona?

“A daydiay? Atiddog nga estoria daydiay, baket?” kinuna ni Lino sana insalaysay a nagkumbidar ti maysa a padana a drayber ta kasangayna. Napanda naggiinom iti maysa a videoke bar.

Malaksid iti pulotan, adda pay naipasango a drinks. Uray dagiti dua a babai a sangaili ti gayyemda, imminumda. Dua a lamisaan ti inukoparda

Nayadu ni Merly ti nainumna. Iti panagsublina iti lamisaanna kalpasan a naggapu iti CR, nagsallapid ti sakana ket dina natimbeng ti bagina. Natuang iti ayan ni Lino ket naisubsob ti sungona iti kueliona.

“Ania ket a bainen ni Merly, baket,” kinuna ni Lino. “Kasta unay ti panagpadispensarna. Kas gentleman, pinasensiaak lattan.”

“Ow, baka palusotmo laeng dayta,” nakuna ni Anneng idinto a mabalin a masiroten ti misugsogna.

“Saksik ti langit, sika laeng ti ay-ayatek, baket,” kinuna ni Lino sana rinakep ni Anneng. Inagkanna iti nakair-irut uray no agat-ling-et ni baketna ta kalkalpasna a naglaba.

Naggarikgik ni Anneng. Ti arakup ken agek ni lakayna ti pagkapsutanna. Naipakni ti suspetsana. Iti dayta a rabii, uray la nagkaling-etan ni Anneng iti irut ti arakup ken agek ni lakayna.

Ngem ti kinapudnona, nalipstikan ti kuelio ni Lino gapu iti panangagek-agek kenkuana ti nalapsat a GRO a kinatebolna idi napanda nagiinum nga agbabarkada iti maysa a bar iti puseg ti siudad.

Ngem, kailian, rumbeng kadi nga agibalikastayo iti saan a pudno a kallawitentayo pay Dios?

Para ken ni Lino, idi damo, rumbeng laeng. “Ammo ni Jesus nga awan aramidko, Anneng, baket. Uray man no mabtak ti aprok!” Dagita  lamiong idi. Ngem idi maamirisna a saan a maikanatad ken dakkel a pakadaksan ken pakabasolanna, saannan nga inaramid dayta. Saanen nga agsapata nga iramanna ti Dios, ti langit, ti daga, wenno ania la ditan.

Idi damo, mamati ni Lino a no naannad, saanto a maibutaktak ti ar-aramidenna. Mamati a kabaelanna nga utuen ni baketna iti agnanayon.

Ngem adda pagsasaotayo: ikalim man ti palimedmo iti katukotan nga abut, addanto panawen a maibutaktak. Uray kasano kauneg ti pakaikalian ti buyokmo, dumtengto ti panawen nga agasimbuyok ti alingasawna.

Kasta ti napasamak ken ni Lino. Pagsagsagabaanna iti nakana. Ta malaksid a nalukaisan ti pudpudno a kinataona, narakrak pay ti umok a binangonna.

(Adda tuloyna)