TARAON TI PANUNOT: Ti annongen ti asawa a babai (Umuna a paset)

Adda akem ti asawa a babai a mangipaay iti kalkalikaguman ti asawana a lalaki ken ti pamiliana tapno agtugmok a balanse ti relasionda iti uneg ti pagtaengan. Saan a rumbeng a nangatngato ti babai, kasta met a kaskenan ti panagkinnaawatanda a sangapamilia ta dayta ti mangited iti nagpaiduma a talinaay ken pia iti minulida a pamilia. Panagkinnaawatan a namunganay iti panagpapada iti aniaman a wagas ken trato.

Awan ti nangatngato, awan met ti nababbaba.

No maminsan, adda limmaksid itoy a pagrukodan ket saanna a maamiris ti umno malaksid no adda naimbag a mamagbaga kenkuana – lalo ti nabalitokan a pammagbaga a mangipaay iti turning point wenno panagbalbaliw iti panirigan.

Mabasa iti Surat ni San Pablo kadagiti taga-Efeso 5:22-24 ken iti Surat ni San Pablo kadagiti taga-Colosas 3:18 ti pammilin kadagiti asawa a babai maipanggep iti panangtrato iti asawa a lalaki. Dakdakkel ti natugawan ti babai no maminsan – wenno adda dagiti kaso a naturturay ni babai ngem ni lalaki. Isu nga adda dagiti maawagan nga ander de saya.

Rumbeng kadi ti kastoy a klase ti relasion dagiti agassawa? Rumbeng kadi daytoy a mapasamak? Daytoy ti pakabuklan ti tematayo ken intay met ilawlawag…

ITI DAYTA a bigat ti aldaw ti Mierkoles, uray la agkalkaling-etanen iti berde ni Mising nga aglablaba iti poso negro iti likudan ti balayda. Nakasiortpan iti maong ken agay-ayusen ti ling-et iti uksob a bagina. Ikamkamakamna ngamin ti labaanna ta madamdama pay bassit ket panagluluto manen. Adda met ngarud dagiti asikasuenna pay a tarakenda ken ni Rina nga asawana,  a kas kadagiti tallo a kaldingda ken baka nga adda urbonna – nasken a mapainum ken mailinong dagitoy no napudoten ti paniempo;  ti tallo a baboy a pakanenna nga insigida no aguriisda nga agungik. Nasayaat laeng ta maymaysa pay ti anakda ken ni Rina, ta di ket lalon a dakdakkel ken nadagdagsen ti bakbaklayenna a krus. Aguppaten ti edad ti ubing ket masansan nga ipan ni Rina iti balay ni nanangna tapno nawaywaya ti kayatna nga aramiden wenno mapan iti kayatna a papanan.

Saan a nasiputan ni Mising ti yaasideg ni baketna a nakasekseksi iti pannagna daytoy a buyogan pay ti naardiod a panagkawkawesna. Ti kumulkuldit a puyupoy ket lalo pay nga immimnas ti aprosna ta pinaregtan ti naikayab a nasam-it a bangbanglo ni Rina. Talaga a makapasalibukag ti insangbay ni Rina ta mariing pay ti iiseman ni Mising ken ti essemna iti nalibnos nga asawana. Nagpaiduma dayta a batombalani a nangtengngel iti kanito; kanito a naimnas ti panagtulid ti lubong.

“Mapankan agala iti ngalog a bugbogem a kanen dagiti baboy, Mising.”

Kasla nasapradan iti naangpep a pagpigadan ni Mising iti nangngegna nga insawang ni baketna. Daytoy ti nangisubli ti imahinasionna iti realidad.

“E, kua, Rina, baket, sika la koma bassiten a, ta diak pay nakalaba.”

“Sikan a!”  dagus a bimmugtak ni Rina. Imbaniekesna pay ti panagsaona iti nangato. Kunam la no makaunget nga emperatris. Saanna ngamin a nagustuan ti insawang ni Mising.

“No nakabumbuntogka met ngamin nga aggunggunay ita! Malaes met ti payatam a tukak! Dayta laeng a labaam, abutennaka pay ti siamsiam!”

“Ania ngarud nay, no tulongannak koma di nadardaras.”

Lalo a nagunget ni Rina.

“Agreklamoka pay la dita! Ala, isardengmo pay la dayta ta inka pay agala iti bugbogem. Kumuttong laeng dagidiay baboy, agaluadka kaniak!”

“Sikanto ngarud ti agluton iti pangaldaw a. Isigangmon diay gerret ken ulo ti buslogan. Uray ta nadalusak metten. Adda met pias dita.”

“Diak a makaluto. Kamanmanikiurko!”

(Adda tuloyna)