TARAON TI PANUNOT: Ti Managtabutob nga Anak (Maikadua a paset)

Naidaw-as met ti ina iti balay dagiti dadakkelna iti kabangibang a purok. Naidatagna ti pakarikutanna idi dinamag ti lakay ti kasasaad dagiti appona.

“Dayta ngarud ti parikutmi, tatang, lalo kadaydiay inaunaan. Managtanabutob no baonen. Saan a dumdumngeg iti sao. Mabusorak man.”

“Saanyo a bigbiglaen ti anakyo. Ammom dagiti agtutubo itan, saan a kas kadakayo idi a mulagatan laeng ket agtalnakayon ken dumngegkayon iti patigmaan.”

“No mulagatam ket misuotannaka met sanakanto pay tanabutoban, ay, apo, aya, amangan no matiplakko a dina oras no diak makapagteppel.”

“Apay a dimo isuro kenkuana ti pangontra kadayta a banag? Apay, dimo malagipen dagiti insursuromi kadakayo idi? No nalipatamon, bay-am ta pumasiarakto idiay balayyo ta bagbagaak ti apok!”

“Ala man ngarud, tatang, bareng no dakayo ti denggenna.”

Ngem saanen a nasken nga umallatiw pay ti lakay ta mismon a napasangbayna ni Chona iti kamalmanna. Impulong met ti agtutubo iti lakay ti kinaunget dagiti dadakkelna. Madlaw a masemsem unay ni Chona.

“Pagaambonandak ketdin. Mabusorak a talagan, lolo!”

“Ania ket ti kapipintasan nga apokon, aya, atiwna pay ti maysa a di napagustuan no agpasugnod. Suruem ngamin ti agdayaw kadagiti nagannak kenka, apok.”

Saan a nakatimek ni Chona, naklaat pay iti insawang ti apona a lakay.

“Dayta ti nasao ni nanangmo idi immay ditoy idi kalman. No baonennaka kano, agtanabutobka ket dayta met a banag ti saanda a pagayatan kenka. Madi dayta nga aramid, apokok. Ammom kadi nga uray iti Nasantuan a Kasuratan ket kondenaenna dayta a banag? Ala, dumanonka, inta iti uneg ti balay ta ilawlawagko kenka ti nasken a maammuam.”

Simmurot ni Chona iti lakay ken simrekda iti uneg ti balay. Iti maysa a paset ti salas a yan ti kolumpio a naynay a pagtugtugawan a kanayon ti lakay, inadalanna a nasayaat ti apokona.

“Ammom, apok, ti tao no baonen ket agtanabutob, maysa nga indikasion a dayta a tao ket adda sadsadutna.”

“Saanak met a nasadut, lolo! Siak la a siakon ti agtartrabaho iti uneg ti balay. Siak amin ti mapatudon.”

“He-he! Ket sika ngarud ti inaunaan, apok,  di sika ti ad-adda nga agtrabaho. Isu a saanmo koma a laglagidawen dagiti pammagbaga dagiti dadakkelmo.  Isursuro ken iwanwandaka laeng iti nasayaat a panagtagibalay. Ta maysaka la ngarud a babai.”

“Nakaung-ungetda, lolo…”

“Saanda nga agunget no saanka nga agtanabutob, apok,  no tungpalem ida a situtulok ken awanan tignay nga ibubusor. Apay, saanmo kadi nga ammo a ti panagtulnog ket isu dayta ti pakaay-aywan ti Dios?”

“A-ania ti kayatyo a sawen, lolo?”

Ginaw-at ti lakay ti Biblia iti rabaw ti lamisaan. Inukradna.

“Iti Surat ni San Pablo kadagiti taga-Colosas 3:20, ‘Annak, agtulnogkayo kadagiti nagannak kadakayo, ta daytoy ti makaay-ayo iti Dios.”

Saan a makatimek ni Chona. Nagdumog.

“No agtungpalka nga awanan iti isusupring, ken siraragsak nga umawat kadagiti amin a maibilin, kayatna a sawen a panagtulnog dayta. Kasta ti aramid a pakaay-aywan ti Dios, apok. Isu a no adda  maibaga kenka wenno maibilin nga aramidem, agtungpalka a dagus a sigaganaygay ken awan ti sawsawirna. Saanka a sumupsupring wenno agtantanabutob. Ta kas kuna ti Proverbio 1:8-9, ‘Anakko, ipangagmo ti pannursuro ni amam, ket imdengam ti kuna ni inam. Ti pannursuroda pasayaatenna ti kababalinmo a kas iti napintas a turban wenno kuwentas a mangpapintas iti langam.’ Anagem koma dayta, apok.

“Lolo, s-siak kadi ti nagbiddut?”

“He-he! Hustoka, apok. Ngem saan pay a naladaw ti amin, adda pay panawenmo a mangatur iti nagbiddutam.”

Saan a nakatimek ni Chona, kasla nauneg unay ti mulmolan ti mugingna.

“Ti panagtantanabutobmo no ibaondaka, ket mangibunga iti saan a nasayaat ta kaipapananna daytan ti isisiasim iti manakman nga ugali. Saandaka met nga ungtan no aramidem nga insigida nga awan sawsawirna ti naibilin ken kangrunaanna, no saanka nga agtanabutob ken agbiragsot. Agbalinka koma a responsable nga inanak, apok.”

“W-wen, lolo, s-saanakton nga agtantanabutob…”

“Wen, apok, husto dayta a pangngeddengmo. Ta kas kuna iti Surat ni San Pablo kadagiti taga-Filipos 2:14, “Aramidenyo amin a banag a dikay agtantanabutob wenno sumupsupiat…”

“Adda gayam iti Nasantuan a Biblia ti maipapan iti panagtanabutob, lolo. Diakton aramiden dayta a banag, saanen!”

“Rumbeng, Chona, apok, ta no aramidem dayta, ipagpannakel ken idaydayawdaka dagiti dadakkelmo.”#