TARAON TI PANUNOT: Ti Managtabutob nga Anak (Umuna a paset)

Wen, adda dagiti annak a managtanabutob aglalo no mabaonda. Adda pay dagiti saanda la nga agtanabutob, agbiragsotda sadanto pay la agmisuot ket kurangna la a masiluanen ti immaratiddog a subsobda nga atiwna pay tay netib a takong. Nasipnget ti panagruprupada a kunam la no napukawanda iti napateg a banag aglalo no masingada wenno maputed ti agdama nga obrada.

Kasta nga agpayso ti mapaspasamak no maminsan iti uneg ti pagtaengan. Dayta ti gagangay a mapalpaliiw, lalo kadagitoyen a panawen.

Kasano a sanguen daytoy a pakarikutan? Masungbatan daytoy babaen ti panangtaldiaptayo iti pakasaritaan ni Chona, ti agtutubo a managtanabutob no mabaon.

Bayat ti panagpusi ni Nana Soling iti  mais iti sirok ti kaimito iti kanawan a sikigan ti balayda, nakangngeg iti kanabraang iti kusina. Sinaruno ti kalangiking ken natinnag a kaserola.

Timmakder ni Nana Soling ket nagna iti ridaw iti likud – iti kusina. Naitakangkarang kenkuana ti puraw a pusada a mangkurkurantong kadagiti di pay nainnawan ken nakatambak lattan iti lababoda a plato, mangkok, baso ken aminen a nangananda itay pangaldaw.

Limmaem ni Nana Soling. Nadatnganna ni Chona a mayat ti eellekanna iti sango ti telebision. Pasadon alas dos iti malem ngem kasla awan ti bibiang ti agtutubo iti mapaspasamak iti uneg ti balayda. Mas importante ti buybuyaenna ngem ti amin.

“Na, ania pay la ti kukuaem aya, sika, Chona? Diay met  pusan ti paginnawem! Inka aginnawen, a!”

“Hmp, madamdaman a, nagpintas toy buybuyaek. Makauray ti innawan ngem ti pabuya, saan! Ania la ketdin!”

“Naa, ti taottoyen, aya. Kurkurantongen ngaruden ti pusa dagiti mainnawan! Amangan no adda manen mabtak a baso wenno plato wenno mangkok. Agkaiwarada pay ket ditan lababo.”

“Hmp, siak la a siak ti aginnawen…” nagmisuot ken nagtanabutob ketdi ti anak.

“Siak la a siak ti mangmangan, kunam ngarud?”

“Siak la a siak ti baonenyo…”

Nagpangato la ket ngarud ti dara ti ina ket kimmaro ti ungetna iti anak. Iniddepna ti telebision tapno aggunayen ti anak.

Nagbiragsot ti anak a nagturong iti kusina  sa tumanabutob a naginnaw. Tiptipden ti ina ti riknana ta amangan no matiplakna ti anakna, banag a saanna a kayat a mapasamak. Napanna intuloy ti agpusi kadagiti haybrid a mais.

Madamdama pay, simmangpet ti ama a napan nagburas iti mais. Napaliiwna ni Chona a nakamisuot. Nasipnget a kunam la no nagmanto ti rupana. Kinasao ti ama ti ina ket inammona ti pakarikutan ti inaunaanda.

“Apay manen a di maipinta ti rupa ni Chona, baket?”

“Ayna, diak ammo no ania ti aramidek kadayta nga anakmo, nakasadsadut! Nagalas ti ugalina a talaga, di dumdumngeg iti sao.”

“Apay manen, aya?”

“Managtanabutob no baonen. Mabusorak man…”

“Suruam a nasayaat a, ta bumalasangen.”

“Ayna, kanayonko a bagbagaan, ngem di dumngeg iti sao. Nasaysayaat pay no sika iti mangbagbaga kenkuana bareng no denggennaka!”

Kinasao ti ama ti anakna.

“Apay aya, balasangko, a managtanabutobka kano no baonennaka ni nanangmo?”

“Hmp, siak la a kanayon ti patudonenna nga agtrabaho ditoy balay!”

“Naa, ti ubingen, ta immatiddog manen ti subsobna. Ket ania ngarud nay, sika ti babai nga inaunaan, di sika ti namnamaenna a makatulong, anakko.”

“Apay sisiak laeng aya ti tao ditoy balay?”

“Ayna, anakko, aya, saan a nasayaat ti kasta nga ugali. Dumngegka met iti pammagbaga ta pakairanudam met laeng. Isursurodaka iti nasayaat.”

Ngem saan a nagbalbaliw ni Chona iti paniriganna iti biag.

(Adda tuloyna)