TARAON TI PANUNOT: Yunnatmo dagita imam (Maikatlo a paset)

“Ngem paanakam met iti nagdakkelan a gatad dagiti ipapautangmo! Dawatam pay ida iti kolateral. Saanmo nga ikkan dagiti awan ti ikolateralna. Sa ket naglaingka nga agguyod iti isalda dagiti saan a makabayad,” imbabalaw ni Nana Toniang ken Tata Braulio.

“Rumbeng laeng dayta, saan kadi? Bangkonto pay ken dagiti lending companies ket kasta ti aramidda, anianto la ketdin kaniak? Tultuladek laeng ida!”

“Ngem dimo ammo ti makikaarruba ken tumulong nga aggapu dita pusom!”

“Oy, Toniang, sumardengka man! Napunuannakon iti kinasariwitwitmo a tao. Dika ket maragsakan ta agbiagka a nanam-ay, dugang! Hmnn, busorkon!”

“Ayna, Braulio, lakay, palpalagipanka laeng ta sabalin a dana ti biag ti taltaluntonem. Saanen nga agturong iti inggat dayagna a lubong no di ket iti abut nga awan patinggana.”

“Adu la amin a sasawem…!”

“Denggem koma dagitoy a binatog manipud iti Biblia, iti Lucas 6: 35-36: “…Agpabulodkayo, ngem diyo namnamaen a masupapakankayo. No aramidenyo dagitoy, dakkelto ti gunggonayo ket annaknakayto ti Kangatuan a Dios… Masapul a manangaasikayo a kas ken ni Amayo a manangaasi…”

“Hu, adu la amin dayta nga ibagbagam, dugang! Dika ketdi yamanen ta agbiagka a nanam-ay, saan ketdi a dayta agdillaw ti ar-aramidem!”

Saan a dimngeg ni Tata Braulio. Ket dimteng ti panawen a panangsagid ti Mannakabalin iti biag ni Tata Braulio, maysa a palagip nga adda dagiti yaabante iti biag ti tao a saan nga agpasango no di agatras a saanna la ket ngarud a pakagtengan iti rumbeng a papananna….

“Hello? Apay nga immawagka iti selpon, Toniang? Sadino ti yanmo?”

“Braulio, lakay, umayka koma a dagus ditoy emergency hospital. Darsem koma! Mangitugotka iti kuarta a gastosen!”

“Ha? Apay? Ania ti napasamak?”

“Ni Victor nga anakta, naidungpar ti naglugananna a motorsiklo! Agngangabit ken patay…!”

“Ha? Apayen….”

“Umayka ita met laeng, darsem!”

“Wen, umayakon, umayakon!”

Nagdardaras ngarud ni Tata Braulio a napan iti ospital. Nadatnganna ni Nana Toyang a maaburido ken madanagan iti kasasaad ti kakaisuna a lalaki kadagiti lima nga annakda.  Ni Victor ti buridekda.

“Apay, ania kadi ti napasamak, Toniang, baket? Kasano a naidungpar?”

“Napal-igan iti kutit ti bagon ti manmanehuenna a motorsiklo, kuna dagiti nakakita.”

“Sinalbag dayta a drayber ti bagon, idarumko no kunak, idarumko la ketdi! Yanna dayta a drayber? Yanna?”

“Tinarayanda ngarud, lakay. Naimbag laengen ta insigida nga intaray dagiti nakakita kenkuana.”

“Asino dagiti nangitaray kenkuana?”

“Dagiti agassawa nga Idot ken Saling…”

“Ha? Da Idot ken Saling?”

“Kinasapulan a dagus ti dara a maiyalison iti anakta. Saan a nagpangadua dagiti aggassawa a nangipaeksamen ti darada. Katipoda ti dara ti anakta, ket isudan a mismo ti nagdonar. Kuna ti doktor a no saan nga isuda, nalabit a  nalamiis itan a bangkay ti anakta!”

Sinarak ni Tata Braulio dagiti agassawa a Saling ken Idot. Ni Idot ti nadatngan ti lakay nga agbambanban iti sirok ti kaimito iti amiananen ti balayda.

“Mano kadi ti pagbayadko iti dara a naikkat kadakayo nga agassawa, Idot? Ibagam laeng ta bayadak. Mano?”

“Apo Braulio, saankami nga agpabayad iti tulong a naipaaymi iti padami a tao. Nupay nakurapaykami laeng, umno unay nga iyunnatmi dagiti takiagmi iti agkasapulan nga awan ti supapakna. Nasursuromi dagita a tagipatgen kadagiti dadakkelmi. Isu ti sursurotenmi agingga iti agdama.”

“N-ngem, Idot…”

“Ta ania koma ti serbi ti tulong no mabayadan? Tumulongka ngem dimo namnamaen a masupapakan. Kasta ti prinsipiomi, apo Braulio. Isu a ladingitek a paayenkayo. Lalo ket ammomi a nasingpet ken managayat unay ni Victor nga anakyo. Isu a saankami met a nagpangadua a timmulong kenkuana…”

Kadagiti simmarsaruno nga aldaw, napaliiw ni Nana Toniang a di unay makatagtagari ni Tata Braulio. Maysa nga agsapa, nakitana ti asawana a mangur-urnos kadagiti pappapel a dulinna….

“Apay, dagita a dokumento, Braulio, lakay…?”

“Isublikon dagitoy kadagiti pinautangak. Inut-utobko ti kinunam idi maipanggep iti Lucas 6: 35-36 ken ti napasamak iti anakta. Pudno gayam a sabalin ti taltaluntonek a dana!”

“Ay, agyamanak unay, lakay, ta nautobmo dayta… agyamanak…!”

Iyunnatmo dagiti imam. Tumulongka kadagiti agkasapulan nga awan ti namnamaem wenno urayem a supapakna.  No aramidenyo daytoy, dakkelto ti gunggonayo!#