TARAON TI PANUNOT:Ti Linteg ti Puso ken Linteg ti Panunot

Maburiboran unay ni Mila. Ti kunana, ania nga agpayso ti pagdaksan ti third cousin nga agboyfriend? Saan a satisfied kadagiti rason a mangngegna kadagiti gagayyem ken sumagmamano a kabagianna. Kayatna a paibuksilan ti kinapudno bareng no aglukat kenkuana ti ridaw ti kinapudno. Kayatna ti palawlawagan.

Adu dagiti disadvantages ti agkapitlo nga agayan-ayat wenno agassawa. Mababalawda no isuda ti agkatuloyan ta iti imatang ti konserbatibo a gimong, saan a nasayaat nga agkarelasion ti agkapitlo. Kadakuada, saan laeng a naalas no di pay naariek daytoy a relasion. Kunada la ketdi: di la nakakitan wenno nakasarak iti sabali!

Iti uneg ti konserbatibo a pamilia, maibilang daytoy nga incestuous relationship. Kadagiti major religious organizations, kondenado daytoy a relasion.

Adda pay pammati a saan a nasayaat ti bunga ti aggasideg iti bagi nga agassawa. Madakamat ditoy dagiti nagbalin nga annak dagiti ari ken reyna nga agkakasinsin a no saan a managsakit, adda rangkap wenno deformed ti bagida.

Ngem saan pay a napaneknekan ken kompirmado a ti rumsua nga abnormalidad ti anak ket maigapu ta agkapitlo wenno as-asideg pay dagiti agassawa. Saan met nga awaten ti medical community dayta a rason. Ngarud, saan a balido a rason.

Adda linteg ti puso. Pudno dayta. Ngem manangallilaw ti puso no saan a matengngel ti italukatikna. No paiturayan ti tao iti agus ti riknana, agtungpal iti pannakailaw-anna.

Kuna ti Ebanghelio ni San Mateo 15:19: “Ta ti puso ti pagtaudan ti dakes a pampanunot a mangiturong kenkuana a pumatay, makikamalala, agderrep, agtakaw, agulbod ken mamadpadakes…”

Ngarud, saan a saklawen ti linteg ti puso ti linteg ti panunot. Sabali ti linteg ti puso, sabali met ti linteg ti panunot. Nalawlawa ti saklaw ti linteg ti panunot ngem ti linteg ti puso. Dayta ti gapuna a nangatngato ti nakaikabilan ti panunottayo ngem ti pusotayo.

Isu a no agayatka, nasken a panunotem a nalaing no addaka iti rumbeng ken saan. Saan a mabalin a puso laeng ti agidiktar iti aramidem, kaskenan iti amin, panunotem, amirisem a nalaing no rumbeng ti aramidem.

Nasken nga agbulig ti puso ken panunot. Masulisogtayo amin ngem inikkannatayo ti Namarsua iti panunot a mangusig iti aniaman a sanguen wenno pakaisungalngalantayo a problema. Masulisogtayo ngem inikkantayo ti Namarsua iti kired ken pigsa nga agpanunot iti naimbag ken saan. Inikkannatayo iti kabaelan a mangusig no ania ti rumbeng nga aramidentayo.

Wen, di saklawen ti linteg ti puso ti panunot. Ti utektayo isu ti subconscious mind a tugaw ti Espiritu Santo a mangildalan kadatayo. Saan a ti puso ti tugaw ti Espiritu Santo no di ti panunot. Gapu ta adda ti Espiritu Santo kadatayo, maaddaantayo iti konsiensia a mangidalan kadatayo iti kinapudno. Ket no adda mangidalan kadatayo, masurotantayo ti umno a dana ti biag.

Ngarud, no agayatka, nasken a konsultaem ti panunot no umno met laeng wenno saan ti pangngeddengmo. Ta ti kinapudno ti mangwayawaya kadatayo.#