Task Force, agpalutpot pannakapapatay konsehal ti Dingras

LAOAG CITY – Nabuangay ti maysa a task force para iti naan-anay a pannakaimbestiga ti pannakapapatay ti maysa a konsehal ti Dingras, Ilocos Norte.

Ni Provincial Director Police Senior Supt. Marlou Chan ti mangipangulo iti Task Force Magno.

Pinapatay dagiti di nabigbig a tattao a mapapati a hired killers ni Dingras Councilor Randolf Magno idi Abril 21 bayat ti kaaddana iti maysa a machine shop idiay Barangay Pariir, Sarrat, Ilocos Norte.

Nakarekobre dagiti polis iti lima a kapsula a naggapu iti cal .45 iti nakapasamakan ti krimen.

Segun iti inisial nga inbestigasion, bayat ti kaadda ti biktima iti nasao a machine shop, nagsardeng ti maysa a traysikel, dimsaag ti maysa kadagiti suspek sana pinaltogan ti konsehal.

Naglibas dagiti suspek a nakalugan met laeng iti nadakamat a traysikel.#