Task Force Arayat, nabuangay

VIGAN CITY – Nabuangay ti maysa a task force itay nabiit tapno tumulong iti pannakalapped iti illegal a panagkalap iti probinsia.

Kinuna ni Benny Saraos ti Bureau of Fisheries and Aquatic Resources a nadumaduma a grupo a pakaibilangan ti Philippine Coastguard, Maritime ken ti provincial government ti mangbukel iti Task Force Arayat kas panangpabileg iti nainget a kampania maikontra iti illegal a panagkalap.

Innayon ni Saraos nga adda saggaysa a naited nga speedboat a pagpatrolia iti kabaybayan a sakup dagiti coastal barangays iti umuna ken maikadua a distrito iti probinsia.

Sakbayna, tapno nalaklaka a mailasin ti ili a naggapuan dagiti bangka a maar-aramat iti illegal a panagkalap kas iti panagbungbong, maipakpakat ditoy probinsia ti color coding dagiti bangka.#