Task Force Bantay Kalsada, nagsublin, agtiliw kadagiti aglabsing iti traffic laws

VIGAN CITY β€” Ballaag kadagiti amin a motorista nga agdaldaliasat kadagiti kalsada iti Ilocos Sur ti panangalada iti lisensia, panangpabaroda iti rehistro dagiti luganda ken panangsurotda kadagiti national laws ken ordinansa maipapan iti land transportation tapno saanda a masitar, matiliw ken mapagmulta iti dakkel a kantidad ta nagsublin ti operasion ti Task Force Bantay Kalsada kas sagudayen ti Provincial Ordinance tapno malapdan ti nadumaduma nga aksidente iti lugan a nakaibuisanen iti adu a biag.

Nayusuat ti panagsubli ti operasion ti Task Force Bantay Kalsada kabayatan ti naangay a seremonia sadiay Provincial Capitol, Vigan City idi Agosto 22, 2019.

Indauluan ni Gov. Ryan Luis Singson ken Vice Gov. Jeremias Singson ti seremonia nga inatenderan ni Land Transportation Office Region I Director Atty. Delmark Billera, Ilocos Sur Police Provincial Director Colonel Emmanuel Reyes ken pannakabagi ti Philippine National Police, Provincial Disasters Risk Reduction Management Office ken dadduma pay nga stakeholders.

Iti panagsarita ni Gov. Singson, nagballaag kadagiti motorista a matiliwan nga aglablabsing kadagiti national and provincial laws nga awan ti mapakawan iti panagmultada. Impasingkedna ti saanna a panangipalubos a maabusar ti pannakaipakat dagiti pagannurotan. Nagapila pay kadagiti amin a maseknan ti pannakikaysada iti gannuat tapno maliklikan dagiti nagadu nga aksidente ti lugan ken malisian ti pannakaibuis dagiti adu a biag.

Nairakurak a buklen ti Task Force Kalsada dagiti deputized members pakaibilangan dagiti polis, PDDRMO personnel ken dadduma pay. Mairaman kadagiti paglintegan nga ipakat ti Task Force Kalsada ti Motorcycle Helmet Law, Safety of Children Aboard Motorcycles, The Seatbelt Act of 1999, The Anti-Drunk and Drugged Driving Act, Anti-Distracted Driving Act of 2016, The Road Speed Limiter Act of 2016, ken dadduma pay a linteg a kangrunaan a malablabsing a gapu ti umad-adu a bilang dagiti aksidente iti kalsada.

Inlawlawag met ni Atty. Billera dagiti linteg nga ipakpakat ti LTO ken maipapan iti kinatalged iti kalsada kabayatan ti orientation dagiti deputized members ti Task Force Bantay Kalsada.

Naamuan a manipud Enero 1 agingga idi Hulio 31, 2019 ket adda napasamak a 722 nga aksidente kadagiti kalsada iti Ilocos Sur a nakasugatan ti 692 ken nakatayan dagiti 30 a tattao. Napasamak dagiti 282 nga aksidente iti First District ken 440 iti Second District, 187 dagiti agnaed iti Ilocos Sur ken 452 dagiti taga sabali a lugar. Dagiti top 10 nga ili ken siudad a nakapasamakan dagiti aksidente ket Candon City – 155, Vigan City – 99, Santa Cruz – 65, Narvacan – 54, Bantay – 53, Sinait – 44, Santa – 31, San Esteban – 28, San Juan – 23, ken Santa Maria – 21.

Iti pannakiuman ti media ken ni Engineer Michael Chan, PDRRMO, impakaammona ti panangbukel ti Provincial Governmnent iti Department of Public Safety nga idauluan ti PDRRMO a lead agency a mangimplementar ti Bantay Kalsada babaen ti pannakitimpuyog dagiti polis kadagiti nagduduma nga ili ken siudad ken kameng ti non-government organization.

Impakaammona a napili ti PDRRMO a mangidaulo iti gannuat gapu iti 24/7 a nakaalertoda nga agresponde no kasapulan. Impakaammona pay ti plano a manglukat iti pagbayadan iti multa kadagiti matiketan nga aglabsing iti traffic rules iti Provincial Capitol, Sinait ken Tagudin iti agmalem ken agpatnag tapno saan a marigatan dagiti agmulta.

Iti met pannakiuman kadagiti sumagmamano a motorista a nakaammo ti kadakkel dagiti multa, impalgakda ti kaririknada a napintas ti panggep ti Task Force Bantay Kalsada ngem gapu ti kadakkel dagiti multa ken kaadu dagiti pagallagadan ket kasla rimbawanna ti panggep ti gannuat. Impalgak dagiti gagangay a motorista ti amakda amangan no maabusarto ti pannakaipakat dagiti pagallagadan gapu iti kaibatoganda iti dakkel a multa.●