Tatadien a manok, natakaw iti dua nga ili

STA. CATALINA, Ilocos Sur – Sumangsango pay iti pader dagiti inbestigador no asino ti nangisayangkat kadagiti panagtakaw kadagiti tatadien a manok iti Bantay ken daytoy nga ili itay nabiit.

Natakaw dagiti para tadi a manok ni Leonor Sanidad y Fernandez, Jr. 78, naasawaan, retirado nga empleado iti maysa nga insurance firm ken residente iti Barangay Taguiporo, Bantay, Ilocos Sur idi rabii ti Agosto 21.

Agdagup amin iti 26 dagiti natakaw a  para tadi a manok iti JRS farm ni Sanidad nga agbalor iti P100,000.

Segun ken ni Sanidad, nagbuya iti telebision agingga iti tengnga ti rabii ti Agosto 21 ngem dina nadlaw ti pannakatakaw dagiti manokna agsipud ta saan met a nagtaul dagiti uppat nga asona.

Natakuatan laengen ni Sanidad nga awanen dagiti manokna iti kabigatanna.

Iti panagimbestiga dagiti polis, naammuan a pinuted dagiti mannanakaw ti barb wire nga alad iti akindaya a paset ti nasao a farm ket ditoy ti simrekan ken rimmuaranda.

Kinuna ni Sanidad nga idi agarup alas 5 ti malem ti Agosto 21, adda nakitana a dina am-ammo a tattao a nakalugan iti motorsiklo nga aglabaslabas iti farmna.

Kabayatanna, awan met ti pamalpalatpatan pay dagiti polis-Sta. Catalina no asino dagiti nagtakaw kadagiti tatadien a manok iti Barangay Poblacion ken iti Barangay Cabittaogan ditoy nga ili.

Natakaw ti 16 a para tadi a manok a kukua ni Laurente Racacho, residente iti  Barangay Poblacion ken 13 a teksas a manok a kukua ni Eric Cordero, residente iti Barangay Cabittaogan.

Segun ken ni Police Inspector Dennis Riberal, hepe ti polis ditoy, nakastrek dagiti mannanakaw iti pakatartaraknan dagiti manok babaen ti panangputedda ti alad a barb wire.

Mapapati a saan a nakurkurang ngem lima a tattao ti nangbukel iti grupo a nangisayangkat iti panagtakaw kadagiti manok ken adda closed van a lugan dagitoy.

Mapapati a naisayangkat ti panagtakaw kadagiti manok iti maymaysa a rabii.

Madama ti panagimbestiga dagiti polis no asino dagiti nangisayangkat kadagiti panagtakaw.#