Ti holdaper

Tawid ti Kaputotan: Errol L. Abrew

 

SUMIRSIRIPEN ti init iti inarimasat’ linnaaw a sep-ang ti Bantay Kimmallugong iti dayta nga agsapa, sikakarantingak met a nangunor iti bet-ang a kumamang iti kalsada nasional.  Arintarayenen dagiti askawko, tantiak ket maladawakon.

Sikanton, Apo Bong Palpallatoc, kas pannakabagi dagiti NGO, ti mangidiskursot’ kasasaad ken agdama a situasion ti human rights ditoy probinsia Nagkaykaysa, immagibas iti panunotko ti nasao kaniak idi naminsan a kalman ni Teodoro de los Ojos, Chief of Staff ni Bokal Enriquito Caburnay, organisador ti miting.

Apagtugawko iti uneg ti mini-bus, nadiparak a sumagmamano kadagiti pasahero ti nagsasaruno a nangiruar kadagiti selponda.  Nga isu met ti kellaat a namagtignay kaniak tapno karawaek ti selponko nga ikabkabilko iti uneg ti beltbagko.

Nakidiables.  Awan ti selponko.  Nabatik la ket a madama ti chargingna.  Sipud pay nakagatangak iti selpon sangapulo ket duan a tawen ti napalabas, diakon agar-aruat iti relo ta adda met pagkitaakon iti oras.

Alusiisenak a nagtalatalangkiaw iti uneg ti lugan.  Kasano ngaruden? Pinamrayak a binuybuya dagiti matupar ti lugan nga agparpara a tattao.  Iti kawesda,  estudiante ken empleado dagitoy a padak met a kumamkamakam iti oras. Nataldiapak ti balasitang a katugawko a madama ti talmegna iti selponna.

‘Nia’t orasnan, balasangko?

Quarter to eight, Angkel.

Tengkiu, balasangko.

Walang anuman po.

Ilokanaka?

Wen, Angkel.

Napangilangilak.  Awanen ti Kailukoan, Anggalogen uray Saluyot. Yoninana.

Nagpaigid ti mini-bus.  Baratao gayamen.  Sumardeng biit nga agala, agidissaag kadagiti pasahero. Mapan a lima minutos ti napalabas.  Matektekanakon.  Sigurado la ket a maladawakon.  Alas nuebe ti rugi ti programa.

Nakaadayokam’ bassiten manipud poblasion idi kellaat lattan nga adda babai a napan iti likud ti drayber. Sinangonakami a pasaheros. Medio panguttongen, pangatiddogen ti nakawakray a nangisit a buokna, kasla Cachupoy ti rupaenna, nakapalda iti nangisit a naasmangan iti nangisit met laeng a medias.  Adda igpilna a biblia a maris nangisit ti akkubna.

Good morning, brothers and sisters in Christ, inrugina.  Bayat ti panagbiahetayo nga agturong iti Siudad ti Pindangan, palubosandak man a mangidanon kadakayo kadagiti nasantuan nga adal ken sasao a naggapu ken ni Apotayo a Jesu-Cristo.  Ngem sakbay ti amin, adtoy a kumararagtayo.  Nagkidem ti babai.  Ngem nakamulagatkam’ amin.

Apo Dios a nailangitan, bendisionannakam kad’ nga annakmo.  Ipaaymo kadakami ti salun-at ken saluad, kasta met nga ilisinakam’ iti peggad…

Napaikkis ti maysa a babai iti uneg.  A sinaruno ti makatitileng nga uni ti preno a binaddekan ti naklaat a drayber.  Nasiputak ti ubing a sipapardas a bimmallasiw iti kalsada.  Gistay napadamgisanen.

Napatugaw ni pastora a mangaskasaba.  Nasinggit ti garikgik ti balasitang a katugawko a sinaruno ti maysa a nakapsut a paggaak iti malikudak.  Diak la ket naaluadan met ti nangipus ti ingangato dagiti kidayko.  Napawingiwingak a naassian.

Sipapardas met ti konduktor a nangbatak iti naiparusisi a mangaskasaba.  Pinampag  ni  pastora  ti  ubetna.  Kasla awan aniamanna, intuloyna ti nangararag.

(Adda tuloyna)