BAGUIO CITY – Maysa a taxi driver ti hinold-ap ken binagkong ti maysa a grupo a mapapati nga indauluan ti maysa a babai  ket kinasakasda ti napasadaanna.

Iti deklarasion ni Nemesio Pulagan Nabunat, 26, residente iti Kadaklan Village-Apugan, Loakan iti polis ditoy, hinold-ap ti tallo a tattao nga indauluan ti maysa a babai ket intarayda ti napasadaanna a P3,000.

Segun ken ni Pulagan, naglugan dagiti tallo iti Purok 6 iti Kias ket nagpaitulodda iti Kadaklan Village. Ngem idi makadanonda iti nasao a lugar, pinaturongan ti maysa iti paltog sana inwaragawag iti hold-ap idinto nga imbilin ti babai nga iyawatna ti kuartana ken selponna.

Mapapati a nakarurod ti babai idi imbaga ti biktima nga awan ti selponna ket binagbagsolnan daytoy.

Intaray ti biktima ti bagina iti Baguio General Hospital tapno maagasan dagiti sugatna.#