Teacher-Applicant

Imbiit ni JOBERT M. PACNIS

 

NUPAY nagisuron ni Maestro Teody iti walo tawen iti pribado a pagadalan, makarikna latta iti nerbios kadaytoy a panagpa-assessment-na iti elementaria ditoy ilida. Dina ammo no kasano ti panagsaadna kadagiti kameng ti selection committee.

Pribado a hayskul ti damo a nangisuruan ni Maestro Teody. Tallo tawenna dita idi pinadasna ti naki-assessment iti public high school. Ngem lima a tawenen a kasta, awan met laengen ti gasatna.  Naimbag ketdi ta palubosan latta ti paggigiananna a pagadalan nga agpa-assess; ken agsubli no awan ti item.

Isu nga inkeddeng ni Maestro Teody a padasenna ti maki-assessment iti elementaria ditoy distritoda. Pagpiaanna ta BSE ti kursona. Mabalinna ti makibalubal kadagiti agregget met a mannursuro a makastrek iti elementaria.

Martes idi naammuan ni Maestro Teody nga adda orientation meeting iti kabigatanna dagiti teacher-applicant (dati ken agdadamo). Dagus nga inruarna iti aparador dagiti nadumaduma a pappapel a masapulna. Awan pay ti pamalpalatpatanna iti kumpleto a rekititos ngem ammona nga adda panagkaasping daytoy iti hayskul.

Ket agpayso, idi ibinsabinsa dagiti kameng ti selection committee dagiti kasapulan, bassit laeng ti nagdumaanda iti hayskul. Ngem idi maikannawag ti baro nga alagaden iti pannaka-assest, ditan a rimsua ti anabaab dagiti siguden nga aplikante. Kasano, kapilitan a makissayan dagiti dadduma iti puntos aglalo iti benneg ti teaching experience.

Iti sigud nga annuroten, maysa a puntos ti mainayon no nagisuroka (volunteer, provincial school board wenno municipal school board man) iti makatawen (a kaibatogan ti sangapulo a bulan). Ngem iti baro nga alagaden, dagiti nagisuro iti kinder iti kallabes, guduat’ puntos laengen ti maited kadakuada iti makatawen a panagisuroda. Ta gudua aldaw la kano met ti session dagiti kinder. Isu a dagiti siam a tawendan a mannursuro iti kinder kadagiti nadumaduma a pribado a pagadalan, agbalin laengen a 4.5 points.

Ngumayemngemda man, awan met laeng ti naaramidanda.

“Sursurotenmi laeng dagiti alagaden,” kinuna dagiti kameng ti selection committee.

“Di bale ta adutayo met a maapektaran,” kinuna laengen dagiti dadduma.

Kalpasan ti miting, interview a dagus iti kabigatanna. Gapu ta trese laeng da Mestro Teody a baro nga aplikante (ta saanen nga inkapilitan pay nga agpa-interview dagiti dati), iti kamalmanna met laeng panagipakita iti talent wenno skills-da.

Idi batangen ni Maestro Teody ti ma-interview, agdalagudogen ti barukongna. Ngem immanges iti nauneg sakbay a simrek iti opisina ti prinsipal (a pakaangayan ti close door interview). Napayaman ta naisem dagiti para-assest a namasungad kenkuana.

Nagpaut iti duapulo minuto ti pannakagisarna iti uneg. Ngem napalaus a yamanna ta nalusotanna amin a saludsod.

Iti skills, impakita ni Maestro Teody ti ammona iti MS Word, MS Excel ken MS Office Powerpoint. Ammona, maalana ti nganngani a perfect score dita gapu ta adda pay sertipiko a mangpakita a nagatendar kadagiti seminars iti panagkompiuter.

BIERNES. Demonstration teaching da Maestro Teody. Volume of cylinders a klase ti Grado Sais ti insaganana nga isuro. Ammona, saan a mayaw-awan itoy a topiko ta iti kaaddana iti hayskul, Geometry ken Trigonometry dagiti isursurona.

Ket nupay adda latta nerbios ni Maestro Teody iti iseserrekna iti kuarto a pag-demo-anna, saan a nagpaabak. In-deliver-na ti topikona iti amin a kabaelanna.

Ngem anian a pannakadismayana kadagiti dati a teacher-applicant nga agserserbi a “pupils.” Awan man laeng ti pannakikaduada. Nakagulguloda iti uneg. Atiwda pay dagiti pudno nga adda iti Grado Sais.

Adda manarimaan nga agselselpon; agpi-fill-up kadagiti ipasada met a pappapel para iti pannaka-update dagiti papelda; ken agpapatang a kasla awan bibiangda iti aglawlaw.

Namin-ano nga impakaasi ni Maestro Teody ti panagdengngeg, ken pannakikoperasion dagitoy kadagiti mapaspasamak nga aktibidad ngem impangato-impababada laeng a kinita.

Nupay nasemsem ti rikna ni Maestro Teody (ta kasla ketdin saanna a maiggaman ti klasena gapu iti dayta), inkagumaanna latta nga inleppas ti demo-na. Ngem ‘yanna nga adat, dina napupuotan a naabotan gayamen iti oras a dina pay nalpas. Sabagay, bassit la ti dina naileppas. Maysa laeng a worded problem.

Minus point manen, nakuna ni Maestro Teody iti nakemna. Iti iruruarna iti kuarto, nagliteng iti panunotna: inranta dagiti padana a teacher-applicant ti kasta tapno saan a makapuntos iti nangato ket dina makamakam ida kadagiti puestoda iti dati a ranking. Ken gapu la ketdi iti suronda iti baro a pagannurotan.  Saan nga asi-asi ti makissayan iti nagdakkel a puntos. Numona ket nagrigat ti agurnong itoy. Adu a bannog ken pirak ti mabusbos.

Ngem iniseman laengen ni Maestro Teody dagiti padana nga aplikante idi malagipna nga agpapadada laeng a di pay nakaserserrek iti sistema.#