Footer

Teddek iti literatura, pimmusay

MANILA – Pimmusay idi Abril 8, 2013 ni Reynaldo A. Duque, maibilang a kalaingan a mannurat nga Ilokano iti panawenna ken kaadduan iti nagun-od a pammadayaw iti tay-ak ti literatura.

Pimmusay ni Duque iti tawenna a 67 gapu iti sakitna iti kidney.

Naiyanak iti Bagani Ubbog, Candon City idi Oktubre 29, 1945, maysa ni Duque a piksionista, nobelista, mannaniw, playwright, scripwriter iti radio, telebision ken radio, ken nag-editor iti Liwayway Magazine, kabsat ti Bannawag, ti kalatakan a magasin dagiti Ilokano iti pagilian.

Maysa a multilingual a mannurat, ni Duque ti Ilokano a kaadduan ti inubon a pammadayaw iti tay-ak ti literatura babaen dagiti nangabak a saritana kadagiti nadumaduma a pasalip iti sarita, daniw, salaysay, a pakairamanan ti Palanca Hall of Fame Award idi 2003 gapu iti panangabak dagiti saritana iti lima nga umuna a gunggona iti daytoy a prestihioso a pasalip iti literatura.

Inyalat pay ni Duque ti umuna a gunggona iti Filipino epic iti 1998 Centennial Literary Awards nga inesponsoran ti nasional a gobierno kas paset ti panangselebrarna iti sentenario ti panagwaywayas ti pagilian idi Hunio 12, 1998. (Tawid News Team)