Terorismo iti balay ti Dios

AWANEN a talaga ti pilpilien dagiti terorista a pagisayangkatanda iti buteng ken kinadamsak ta uray iti mismo a katedral a balay ti Dios a pagdaydayawan dagiti Katoliko ket nagpabettakda iti dua a bomba a nakatayan ken nakadangran dagiti adu nga inosente a Pilipino. 

Nakaam-ames ti nagsaruno a pannakapabettak iti bomba kabayatan ti pannakarambak ti Nasantuan a Misa sadiay Our Lady of Mount Carmel, Jolo, Sulu idi bigat ti Enero 27, 2019.

Dimmanonen iti 21 dagiti natay pakairamanan dagiti 14 a sibilian, lima a soldado ken maysa a Coast Guard; ken 111 dagiti nasugatan iti dayta a terorismo.

Inaklonen ti Islamic State East Asia ti panagbomba iti Jolo Cathedral. Ngem itultuloy latta ti Philippine National Police ken Armed Forces of the Philippines ti imbestigasion. Maysa kadagiti maatap ket ti Ajang Ajang Group a bunggoy dagiti agtutubo a naulila a kapamilia dagiti napapatay a kameng ti Abu Sayyaf Group. Addan dagiti naimbestigar a persons of interest pakairamanan dagiti uppat nga agkabannuag a naalaan iti CCTV camera iti asideg ti katedral a mapagduduaan dagiti tignayda kabayatan ti ibebettak dagiti bomba, ngem nagpalawagdan iti PNP nga awan ti pannakainaigda iti terorismo. 

Inrakurak ni Presidente Rodrigo Duterte a suicide bombers dagiti nangpabettak kadagiti dua a bomba iti katedral. Segun iti PNP ken AFP, awan pay ti naan-anay nga ebidensia a suicide bombers dagiti akingapuanan ti terorismo. Atapenda a kadawyan nga ammonium nitrate fuel oil ti nausar wenno improvised explosive device ti nausar a bomba.  

Maibasar iti imbestigasion, nagsaruno a bimtak dagiti dua a bomba iti katedral. Immuna a bimtak ti adda iti uneg ti katedral kabayatan ti pasetna a Maikadua a Maibasa iti Sao ti Dios. Simmaruno a bimtak ti bomba iti serkan ti katedral idi agresponde dagiti soldado iti uneg. 

Kadagiti naglabas a tawen, addan dagiti napasamak a panagibato iti granada ken pammaltog iti compound iti katedral. Naduktalan pay idi ti pannakaimula iti bomba iti altar. Dayta ti gapu nga adda dagiti polis ken soldado a regular nga agbambantay iti katedral.

Kinondenaren ni Papa Francisco ti panagbomba iti Jolo Cathedral kabayatan ti World Youth Day sadiay Panama. Inrakurakna ti pannakipagriknana iti panagpanes dagiti Kristiano iti dayta a kinadamsak, ken kiniddawna ti panagkararag para ti panagari ti kappia iti sangalubongan.

Nangiparuar metten ti Catholic Bishops’ Conference of the Philippines ti mensaheda mainaig iti panagbomba babaen ken ni CBCP President Davao Archbishop RomuloValles kabayatan ti Plenary Session-da sadiay Manila. Nagkaykaysada a nangipeksa ti pannakipagladingit ken panakisimpatiada kadagiti pamilia dagiti biktima, ken panangkondenarda iti dayta a kinadamsak.  Kiniddawda kadagiti Kristiano ti pannakikaysada kadagiti Muslim ken katutubo a tattao iti pannakagun-od ti kappia iti Mindanao.

Iti ibibisita ni Duterte iti Jolo Cathedral, immandarna iti AFP ken PNP ti panangsolbarda iti dayta a panagbomba ken panangpaksiatda kadagiti ASG nga agdakdakiwas iti Sulu. 

Nakalkaldaang ti panagbomba iti Jolo Cathedral ta kalaksidan ti kaadu dagiti natay ken nasugatan ket ipaneknekna ti kinaawanen ti panagbuteng ken panagraem dagiti nangisayangkat iti terorismo iti nasagraduan a balay ti Dios dagiti Kristiano.

Tallo nga aldaw kalpasan ti panagbomba iti Jolo Cathedral, idi nasapa a parbangon ti Enero 30, 2019, napasamak ti panagbato iti granada iti mosque sadiay Brgy. Talon-Talon Zamboanga City a nakatayan dagiti dua nga Islamic preachers ken nakasugatan dagiti uppat a kakaduada. Maibasar iti imbestigasion, matmaturog iti mosque dagiti biktima idi mapasamak ti panagbato iti granada iti sarming a tawa ti pasdek. Maim-imbestigaran pay no adda pannakainaig dayta nga insidente iti panagbomba iti Jolo Cathedral.

Nagkas-ang dagita a terorismo a napasamak kalpasan ti sumagmamano nga aldaw a naisayangkat ti plebisito a nakaaprobaran ti Bangsamoro Organic Law a panggepna ti mangipaay ti autonomia kadagiti sakupenna a probinsia tapno magun-oden ti mataginayon a kappia kadagiti nariribuk a paset ti Mindanao. 

Ipakita ti pannakabomba ti Jolo Cathedral ti pannakapaay ti intelligence community ti gobierno, ken ti kinakurang dagiti naipatungpal a security measures iti laksid nga adda dagiti team ti AFP ken PNP nga agsinsinnublat nga agbantay iti uneg ken ruar ti katedral.

Ipaneknek dagiti dua a kaudian a terorismo idiay Jolo ken Zamboanga City ti kinaawanen ti panagraem kadagiti nasagraduan a balay a pagdaydayawan iti Dios dagiti Kristiano ken Muslim; ken uray nakadeklaran ti Martial Law sadiay Mindanao ket agtultuloy ti pangta ti terorismo ta saan met nga agridam dagiti maseknan a tropa ti gobierno a napusgan a mangipaay iti seguridad kadagiti umili. 

Dagita a pagteng ket ipaneknekda nga adda latta dagiti tattao a saan pay a nakasagana a mangabrasa iti kappia ken kayatda ti mangisaknap iti terorismo. (Eden Alviar)