Text Vote Brigade ti Vigan iti 7NewWonders Cities of the World, nairusat bayat Legislators’ Week Celebration

VIGAN CITY – Nailunsad ti Text Vote Brigade a tumulong para iti kampania ti Vigan City a mabutosan a maysa iti 7NewWonders Cities of the World bayat ti Legislators’ Week celebration a naangay ditoy siudad itay Septiembre 29-Oktubre 3, 2014.

Naggigiddan dagiti agtuturay iti Vigan City a pakaibilangan dagiti konsehal babaen ti panangidaulo da Vice Mayor Lourdes Baquiran ken Mayor Eva Marie S. Medina a nangibutos babaen iti text iti Vigan City tapno mairaman iti 14 finalists para iti 7NewWonders Cities of the World.

Nangrugi ti selebrasion itay Septiembre 29 babaen ti maysa a motorcade, ken pannakaipabuya iti photo exhibit mainaig dagiti aktibidad ken programa a nakipasetan ti konseho ti Vigan iti mismo a ground floor ti legislative building.

Dagiti dadduma pay a naiwayat nga aktibidad: pannakaangay ti barangay forum and seminar-workshop on basic legislation

Impakaammo pay ni Baquiran a nai-relaunch ti website ti Vigan City kas paset ti Legislators’ Week celebration.

Kinuna ni Baquiran a babaen ti nasao a website, maammuan dagiti residente iti siudad no ania dagiti ar-aramiden ti konseho, kasta met dagiti resolusion, ordinansa ken dadduma pay a gakat a naaprobaran ken maisasaang iti sangguniang panlungsod.

Makatulong pay ti nasao a website para iti kampania ti Vigan City iti nabatbati pay a round iti 7NewWonders Cities of the World, kinuna ni Baquiran.

Maiwaragawagto inton Oktubre 7 dagiti 14 finalists para iti 7NewWonders Cities of the World.

Maammuanto met a dagiti pito a siudad a karaman iti 7NewWonders Cities of the World inton Disiembre 7 daytoy a tawen.

Dakkel ti namnama dagiti agtuturay ditoy a makalusot ti Vigan City iti penultimate rounds ti 7NewWonders Cities of the World gapu ta umad-adu nga ahensia ti gobierno nasional, dadakkel a grupo, nalalatak a personalidad, ken dagiti umili a mangsuporta iti daytoy a kampania ti siudad.

Para iti panagbutos iti online: visit http://www.n7w.com/cities/en; click and select VIGAN and 6 other cities wenno Text Vigan to 29290777.#