The writer writes 30

Naimpusuan a panangiruknoy ken kas pakalaglagipan daytoy a sinurat iti maysa a napateg a gayyem ken kontribiutor idi kadagiti dandaniw iti Saringit Magasin ken Tawid News Magasin nga immunan sadiay nagkaysa a biag. Isu pay ti nangipatpatulod iti kopiatayo ti Valley Times a pagiwarnak sadiay Tanap ti Cagayan a nagpaayanna a kas news editor ken ilustrador.

Nagaget nga agsurat. Lalo iti daniw. Limmaksid iti gagangay a panirigan dagiti suheto dagiti dandaniwna; addaan iti kabukbokodan a disiplina dagiti dandaniwna a mangurnos kadagiti naidumduma a kapanunotan nga isu iti inlagana a ramen.

Ti lagip ken kinatarnaw iti dinto magatadan nga ayatna idi kiniddawtayo a mismo kenkuana ti inna itutulong-pannakigamulo ken panangipadigo iti panagsantak ti ingungoten a Tawid, lalo idi mangrugrugi pay laeng. Itan, nagtallopulon ti plumana idi Nobiembre 28, iti mapattapatta nga atake de corazon.

Sadiay siudad ti San Fernando, La Union ti naudin a panagsarakmi iti personal, ti pannakaangay ti pinal a pangngeddeng ti kaunaan a salip ti saribitniw. Maysa isuna a finalist, ta isu ti kampeon iti Region II. Ditoy nga inkam nagsarsaritaan no kasanona pay a pasikenen ti plumana ken ti kapanunotantayo ti nagsasalipanda a saribitniw. (Basaen ti dadduma a pakabuklan babaen ti isyo a saribitniw daytoy a kolum.)

Wen, kailiwdaka, Lawrence, ading, ngem ania ngarud, kasta a talaga ti biag. Adda umun-una, adda met ti sumarsaruno. Ngemket saan a magatadan dagiti nabagas a dawa ti dandaniw nga inapitmi iti bangkagmo. Inapitmi kunak, ta dika nagpaidam a nangiburay kadakami. Dagitinto dandaniwmo nga imbatim ti pangadawanmi iti bara ti iliwmi kenka. Kastan, ading…

Agtawen iti 35, idi pimmusay ni Lawrence Decena Martin a taga-Masaya Sur, San Agustin, Isabela. Graduado iti BS in Civil Engineering iti University of La Sallete iti Santiago City, Isabela ken Associate in Computer Science iti Vizcaya Institute of Computer Science sadiay Bayombong, Nueva Vizcaya. Nupay kasta, kinaykayatna ti nagsursurat ken nag-ilustrador. Dayta, nagsuraten iti tallopulo ti pluma ti mabigbigbig a mannurat. The writer writes 30, kunatayo nga isurat, ta dayta ti maitutop.

Speaking of the writer writes 30, ania kadi ti nalawag a kayat a sawen daytoy? Sadino iti nakaadawanna?  Nalabit nga adu pay ti saan a makaammo.

Uray dagiti sinurat: damdamag, sarita, nobela, salaysay, opinion ken dadduma pay ket nadlawkon daytoy idi katengngaan ti 80s. Ngem saan pay met datao idi a mannurat, isu nga ania ti bibiangko iti isursuratda a 30, nay, kunkunak man idi, he-he!

Ket idi nagsursuro datao nga agsurat, imakinilia metten ti 30 iti udi ti sinurat, ta isu met dayta ti isursuratda, di isu met ti aramiden, aglalo ket nagatiddog met dayta “Gibusen wenno gibusnan, apo  editor” lalo no nagkapuyon dagiti ramramay iti katutolnek kadagiti teklado ti makinilia.

Idi agangay a kanayon metten ti pannakisarsaritatayo kadagiti editor dagiti regional ken national a pagiwarnak, inyangawtayon ti nagsalsaludsod, kunwari, angaw ta adda pay kabuyogna nga illek, ngem kinapudnona, talaga a diak ammo. No di ammo di damagen, ania ketdin!

Impalawag ti maysa a naangaw a gayyem:  kayat a sawen ti 30, end, maudin wenno naggibusen ti sinurat, awanen nayonna.  Isu a mabasa dayta iti udi ti sinurat. Ngem no the writer writes 30, naggibusen ti panagsurat ti mannurat uray iti kaanoman. Kayatna  a sawen, napanen iti nagkaysa a biag a di man la nagpakpakada; isu a no inkanto iti pumponna, sikan ti agpakada ta iti kaanoman awan ti agpakada a natay! (Sana inyellek.) Kasta, aya?

Mabasa met iti yahoo search: 30 is written at the end of a journalistic piece to signify that that is the end and there is no more to come. Writing 30 to signify the passing away of someone in the editorial field is a symbol of their career or life’s work being finished with no more to come.

The American Journalism Review says: So where did the term originate? Some say the mark began during a time when stories were submitted via telegraph, with “-30-” denoting “the end” in Morse code. Another theory suggests that the first telegraphed news story had 30 words. Others claim the “-30-” comes from a time when stories were written in longhand — X marked the end of a sentence, XX the end of a paragraph and XXX meant the end of a story. The Roman numerals XXX translate to 30.#