Ti “letteg” a sanguen dagiti OFWs iti sabali a pagilian

Iti maysa a taripnong nga inangay ti European Chamber of Commerce ken ti Makati Business Club, maysa kadagiti natratar ti problema pakainaigan dagiti kakailian nga agtrabtrabaho iti ganggannaet a pagilian.

Maysa nga agtuturay ditoy pagilian ti nagkuna nga awan koma ti narikut a problema mainaig kadagiti kakailian nga agtrabtrabaho iti ganggannaet a pagilian no koma laeng dokumentado amin.

Segun iti daytoy nga opisial, no laeng koma naglasat amin dagiti OFWs iti legal a proseso, naipaayanda koma iti reorientasion tapno dida sangbayan iti “culture shock” gapu ta sabsabali metten ti kultura a danonenda a pagilian a dakkel unay ti pakaigidiatanna iti naggapuanda a pagilian.

Dakkel nga agpayso a problema dagiti kakailiantayo a napan nagtrabaho iti sabali a pagilian a saan a naglasat dagiti papelesda iti umisu a proseso.

Iti nalawag a pannao, saan a dukomentado dagitoy a kakailiantayo. Agsipud ta kurang ti papelesda, kaadduanna kadakuada ti pimmuslit iti sabali a pagilian. Wenno saan, simrekda iti sabali a pagilian a kas turista, sada “nagpukaw” ket nakisinsinnibbongda kadagiti immigration authorities tapno saanda a maideport bayat ti panagtrabahoda a nalimed uray awananda iti work visa. “Tago ng tago” a kunatayo.

No saanda a dukomentado, dakdakkel pay a problema ti pannakailidding ti kalinteganda a kas mangmangged kas iti nababa a sueldo, sobra nga oras ti panagtrabaho, pisikal wenno seksual a pannakaabuso, kaawan dagiti benepisio a rumbeng koma a maited kadakuada ken dadduma pay.

Ania ngarud, agsipud ta saanda a dukomentado, kaarigda iti piek iti kuko ti simmippayot a kali.

Ti makapadakes, iti panangipakat dagiti agtuturay dagiti sabali a pagilian iti naing-inget a paglintegan tapno masalakniban dagiti bukodda a mangmangged, adun dagiti matiltiliw a kailiantayo ken maideportar ditoy pagiliantayo. Kaadduanna kadakuada ti awan urnongda agsipud ta saan met a naited kadakuada ti karbenganda koma nga awaten, ket nakapimpimanda a naggawid. No palausen ti manarita, ti la aruatda ti insangpetda.

Anagen koma a nalaing dagiti agtuturaytayo ti kinuna ti maysa a negosiante: “Nupay maikanatad dagiti linteg (iti Pilipinas), ti pannakaipakatda ken implementasion ti makitami a pagkamtudan ken giwang.#

Agpayso, adu dagiti linteg a naipasa a mangsalaknib ken mangikaluya kadagiti kailiantayo iti pannakaabuso, ngem nagbalinda laeng a “letteg” agsipud iti kurang nga implementasionda.#