Ti Adalan

Imbiit ni Jobert M. Pacnis

MAIKALIMA nga aldaw ti klase. Manarimaan nga as-asikasuek dagiti masetas iti SSG park a nayariping iti likud ti pader nga abay ti gate idi sumungad ni Tess nga adalak iti Grade 10– naggapu iti new site, limapulo metro iti lauden ‘toy old site. Langana ti madanagan. Maikadua a period pay laeng iti agsapa. Kalkalpas ti klasek kada-kuada. Bakantek ti second ken third period. Diretsoak kada malem. Ket kas nakairuamak, ditoy SSG park ti ayuyangko. Siak ngamin ti adviser ti SSG wenno Supreme Student Government.

“Good morning, sir,” inkablaawna a dagus apaman a nakastrek iti ruangan.

“Good morning, too,” kinunak. Insardengko ti nagikkat kadagiti nagango a bulong dagiti nadumaduma ti maris ti sabongna a gumamela. “Apay?”

“Adda tawagda idiay ‘yanmi, sir,” insungbatna.

“Apay kano?”

“Itarayda ni mama iti ospital, sir. Mapanda kanon…”

“Agan-ano ni mamangmo?”

“Kas iti dati, sir…” ngem dina naituloy ta aganug-ogen.

Pinagtugawko iti proyekto dagiti SSG officers iti tengnga ti park a napalawlawan iti nagduduma a sabong. Naaramid ti tugaw kadagiti driftwood a binagkatmi idi iti baybay (90 metro iti amianan ti pagadalanmi) kalpasan daydi bagyo a Vinta.

“Ania kadi ti napasamak?” inamadko manen. Impatayko ti makanigid a dakulapko iti abagana. Nakadumog nga agsasaibbek.

“Kinabil manen ni papang, sir…”

“Kinabil?”

“Wen, sir. Managimon ngamin.”

“Alla, kasta gayam,” nakunak. “Ket ipulongyo koma kadagiti opisial ti barangayyo, a.”

“Namin-adun, sir… ngem di latta nga agnaknakem ni papang. No mabartek, saan a dina madissuan ni mamang. Nakaro unay nga agimon. Sa maysa, sir, bunga pay siguron ti panagad-adikna.”

“Ania?”

“Wen, sir. Kalpasan a malakona dagiti nakalapanna ken dagiti nalutona a lambanog, saan a di gumatang iti susopenna.”

“Delikado ngarud ni papangmo no kasta…”

“Wen ngarud, sir. Kas iti mayad-adal ditoy school, adu ti nakabutbuteng a parnuayen wenno aramiden dagiti adda iti impluensia ti maiparit nga agas. Mabutbutengak a kanayon idiay balay, sir…”

“Masapul a maammuan dagiti otoridad ti aramid ni papangmo.”

“Mabutengkami nga agpulong, sir. Pinangtaannakami. Ngem mapumpunnuanakon no maminsan.”

Naasianak ken ni Tess. Rumbeng kadi a makibiangak iti parikutda iti pamiliada? Mabagbagaak, sigurado dayta. Ngem ti iseserrekko iti pribado a biagda, sigurado la ketdi a tagidaksen ni papangna.

No ngata siak ti mangipulong kadagiti otoridad ti kinaadik ti amana?

“Ania ngarud ita?”

“Agpakadaak koma pay laeng, sir. Mapanko kitaen ni mamang.”

Kinuyogko iti office ti prinsipalmi. Nagpakada.

“Adda umay mangala kenka?” sinaludsod ni sir.

“Awan, sir. Agurayak lattan idiay haywey,” insungbat ni Tess. Adda ulep a nangabbeng iti inosente ken kimmampuso a rupana.

Agarup tallo gasut a metro iti abagatan ti pagadalanmi ti kunkunana a haywey. Narikut pay ti aguray ta manmano ti lugan aglalo no kastoy nga umaldawen. Kasla ngaminen dead end ti ayan ti pagadalan.

“Adda klasem?” kinitanak ni sir.

“Last periodton, sir,” kinunak.

“Itulodmo ngarud biiten baka no ania pay ti mapasamakna iti dalan.”

Agarup duapulo ket lima a minuto a nagmotorkami ken ni Tess agingga iti district hospital a nakaitarayan ni mamangna. Simrek a dagus iti ospital apaman a naisardengko ti lugan. Simmarunoak apaman a nakapagparkingak a nasayaat.

Agsangsangit ni Tess a mangap-apungol ken ni mamangna a nadanonak iti impatuldo ti nurse a kuarto. Naluyaanak iti langada nga agina. Dua a dadakkel ken aglitlitem a kammuol ti adda iti rupa ni Manang Marilou nga ina ni Tess. Nakabenda pay ti ulona.

“Panawantan ni papang, ‘mang,” inyanug-og ni Tess. “Nakaro unayen ti kapkapay-am kenkuana.”

Ngem saan a sinungbatan ni Manang Marilou. Kinitanak ketdi.

“Kinuyognak ni sir, ‘mang,” kinuna kenkuana ni Tess.

Awan maarikapko a sawen.

“Ania, mayatka, ‘mang?”

“Saan, ‘basang. Amam pay laeng isuna, uray an-annuem. Agbalbaliwto met laeng…”

“Kaanonto pay? Inton mapataynakan?”

Napamalaangak.

“’Mang, maudi daytoyen a panangkabil kenka ni papang,” nakitak la unay ti iririssik dagiti mata ni Tess. “Maminsan pay, ipulongkon kadagiti pulis a maysa nga adik.”

“Anakko…”

“Wen, mamang. Uray ta naiget ti bilin ti presidentetayo maipanggep kadagiti adda pakainaiganna iti droga.”

LUNES. Naragsak ni Tess a nangsabat kaniak iti gate. Makalawasen sipud daydi panangitulodko kenkuana iti ospital. Nakaiggem iti 2L a botelia ti softdrink. Naamarilio ti likido a linaonna. Impatok lattan a suka ti tata. Nalibeg koma a pumuraw no lambanog wenno nipalayt a kas kuna dagiti sanger idiay ba-rangaymi.

“Komusta?” inamadko.

“Okeyen ni mamang, sir,” insungbatna.

“Ni papangmo?”

“Aglutluto iti lambanog a pinanawak, sir.”

“Saanna met laengen a kabkabilen ni mamangmo?”

“Saanen, sir. Simmingpeten.”

“Nasayaat man no kasta…”

“Wen, sir. Dissuanna koma manen ni mamang idi ta simmamay manen ti nainum ken nasusopna. Ngem nagsawakon. Imbagak nga ipulongko kadagiti pulis.”

“Ket?”

“Kasla nakakita iti al-alia, sir. Saanna siguro a namnamaen a maituredko a pag-sawan… Ket daydi met laeng nga aldaw, napanen simmuko kadagiti otoridad ket nagkari a dinan sunotan ti bisiona. Kunana kadakami ken nanang, mabuteng a maiwalang a kas kadagiti mabuybuyana iti TV.”

“Nagturedka man, ‘basang…”

“Ipatpategko ngamin unay ni mamang, sir… Mayulok met laengen ti agbasa.”

“Rumbeng laeng, ‘basangko…”

“Pait-ited gayam ni papang kaddakayo, sir…” inyawatna ti iggemna.

“Ania daytoy?”

“Suka, sir. Pagyamanna kano iti panangtartarabaymo kaniak.”

Napaisemak laengen.#