Sarita: Ti Agsingsingir | Tawid News Magazine - Weekly Ilocos News πŸ“°

Ti Agsingsingir

Sarita ni Rolando A. Seguro, Jr.

(Maudi a paset)

MAUDI a lawas ti bulan. Nairanrana a nagtrangkaso ni Kinio ket kapilitan a nag-file iti sick leave-na. Kapilitan met a ti superbisorna ti nagkolekta kadagiti centerna.

β€œKomusta met ti center-yo, Manang?” sinaludsod ni Sir Gabby ken ni Manang Lita a center chief ti Buko Center. Kompleto ti bayadda ken adda met amin dagiti kameng ti center. Di ammo ni Sir Gabby ngem naiteks ni Kinio a ti superbisorna ti agrota isu a nagatendar amin dagiti kameng ti center. β€œKen komusta met ni Kinio Kadakayo? Awan met la ti problemayo kenkuana?”

Nagkikinnita dagiti dadduma a kameng. Kasla adda kayatda nga ibaga ngem naunaan ni Manang Lita ida.

β€œOk met, Sir. Naurnos met ti centermi. Ken ok met ni Sir Kinio, Sir. Nasingpet ken naanus kadakami.”

Kasta man met laengen dagiti litaniada iti sumaruno a center a napanan ni Sir
Gabby.

Ngem iti aldaw nga iskediul a panagbayad ti Bountiful Center, nasdaaw ni Sir
Gabby ta ni laeng Manang Edna a center chief ti nadanonna iti center house-da idinto a nasurok a sangapuloda amin a kameng dayta a center. Idi damagenna no ayan dagiti kakaduana ken no ayanna ti pagbayadda, saanen a makatalna daytoy ket kasla makasangsangiten pay ti langanan.

β€œApay, Manang, adda kadi problema?” sinaludsod ni Sir Gabby. Adda nagparikna kenkuana.

β€œKua ngamin, Sir. Hmmp, diak koma kayat nga ibaga ta kababain,” lumabbagan ni Manang Edna.

β€œKet ibagam, a, Manang, tapno maammuak no ania ti parikut ti center-yo. Ken bareng makatulongak a mangsolbar no aniaman dayta a parikut,” kinuna ni Sir Gabby.

β€œKua, Sir. Adda ken ni Sir Kinio ti bayad dagiti dadduma a kakaduami,” inturtured nga imbaga ni Manang Edna. Tiptipdenna ti panagluasitna.

Nasdaaw ni Sir Gabby iti nangngegna. β€œKasano nga adda ken ni Kinio, nagbayadda kanianan?” impalutpot latta ti superbisor. Nabayagen nga agat-atap nga adda kalokuan nga ar-aramiden ni Kinio ngem awan la ngamin ti pammaneknekna.

β€œHaan, Sir. Ni koma sir Kinio ti agbayad ta nasublatna ngamin dagiti dadduma a deposit-mi. Dayta ngamin ti nagtutulaganmi idi, Sir. Alla, diak koma kayat nga ibaga, Sir, ta kababain ken ni Sir Kinio. Ngem awan met ngamin nairana a kuartami a pagbayadmi pay la koma.” Kasla nakirogen a pasayan ti rupa ni Manang Edna.

β€œNgem maiparit koma nga utangenna dagiti depositoyo, Manang,” nagsennaay ni Sir Gabby. β€œApay, ania kano a gapu nga immutang kadakayo?”

β€œNagsakit kan diay kaanakanna, Sir. Mabainkami met, a, ta naganus met ni Sir Kinio Kadakami,” insungbat ni Manang Edna. β€œAlla, Sir, baka ikkatenyo ni Sir Kinio.”

β€œSaan met ngata, Manang,” kinuna ti superbisor. β€œAddanto agimbestigar tapno maammuan no ania ti pudpudno a makagapu. For now, agyamanak unay iti impormasion nga intedyo. Namnamaenyo a risutenmi daytoy tapno ad-adda pay a makaipaaykami kadakayo iti napimpintas a serbisiomi.”

Idi makasangpet ni Sir Gabby iti opisina, dagus nga inreportna iti branch nanager ti naduktalanna. Inreport met a dagus ti branch manedier iti general manager. Tinton GM ti mang-advise iti Human Resource Department tapno imbestigarenda dayta a kaso.

Idi malaingan ken agreport ni Kinio iti sumuno a lawas, kinapatang a dagus ti HRD Head. Kinumbinsirna pay nga ibaga wenno aminenna lattan no adda pay dagiti sabali a kalokuan nga inaramidna tapno nalaglag-an kano ti pannusa a maited kenkuana. Ken tapno saan kanon a dumanon pay kadagiti board of directors. Ngem awan inamin ni Kinio malaksid iti inutangna a deposito dagiti klientena gapu ta nagipit.

Makabulan a mandatory leave without pay ti intedda ken ni Kinio kabayatan nga im-imbestigarenda ti kasona. Saan pay nga umawat iti meal ken load allowance-na iti uneg dayta a makabulan. Kanayon met ngarud a rengrengen ni Pauline iti load. Sa ni Cristine, sangkarengrengna met nga agdua-bulan kanon a saan a nagregla. Makadlawdan sa kano payen idiay balayda ket agipangpangta kano ni Tata Candro nga amana. Masapul a maipaikkatda ti sikog ni Cristine sakbay nga aglinasin tapno makaliklik iti pannakaigalutna iti babai a dina met kapkapnekan. Ngem saanen a kas idi nga adda magatang kadagiti botika nga agas a pagparegla. Adda madamdamagna a nalimed a mangngilut kano a nalaing nga agikkat iti sikog ngem lima ribu kano ti kababaan a bayadan iti daytoy.

Pinasiar dagiti kameng ti audit committee dagiti amin a center ken kliente ni Kinio ket naduktalanda dagiti adu a kalokuan nga inar-aramidna. Malaksid kadagiti saan a nairemit a koleksion a kaaduanna ti saanna a rinesibuan, dagiti naresibuan ngem agduma ti naisurat a gatad iti orihinal ken duplicate ti resibo, dagiti panagut-utangna kadagiti klientena, adda pay gayam nagpailak-amanna iti loan wenno tay aw-awaganda iti ride-on loan. Ti makadakes di met pulos mangmangted ti bayadna para iti inlak-amda nga inutangna.

Kalpasan a maileppas ti audit committee ti reportda, insubmitirda daytoy kadagiti BODs tapno pagpapatanganda iti board meeting a nangayabanda ken ni Kinio.

β€œAnia, barok, agpaypayso met la dagiti reportda kontra kenka?” sinaludsod ti presidente ti kompania ken ni Kinio kalpasan nga imbasa ti corporate secretary ti report nga inaramid ti audit committee. β€œAminem met la nga inaramidmo amin dagita?”

β€œWen, Sir,” nakapsut a sungbat ni Kinio.

β€œKet apay nga inaramidmo dagita? Dim kad ammo no ania ti dusa ti agaramid kadagita?” sinaludsod met ti maysa a direktor. Makaunget ti langa daytoy.

β€œAmmok, sir.”

β€œKet apay ngarud nga inaramidmo? Ammom gayamen no ania ti pagbanagam no agaramidka iti kasta?” inyallawat ti maysa pay a direktor.

β€œNagipitak ngamin, Sir,” insungbat manen ni Kinio.

β€œSo, ania ngarud ti kayatmo nga ibaga ita, Mr. Rapas?” ti manen presidente.

β€œI’m sorry, sirs. Ammok nga adu dagiti naaramidko a basol. Pakawanendak koma. No ikkandak pay iti maysa a gundaway, diakton uliten pay ti agaramid kadagita,” napnuan panagbabawi a kinuna ni Kinio. β€œAgain, I’m sorry, sirs.”

β€œTalaga a saanton a maulit pay dagita,” ti met independent director ti nagsao. β€œAdu unay dagiti naaramidmo a basol iti kompania ket narigatmin nga isubli ti panagtalekmi kenka. You know that no one is indispensable in this bank.”

β€œOh, gentlemen, please don’t be so sarcastic. Let me handle this,” inyallawat ti presidente ket sinangona ni Kinio. β€œMr. Rapas, you know that we can’t let you stay. But we want you to have a graceful exit. We will let you file a resignation tapno maikkandaka iti clearance. In that way, mabalinmonto pay ti agaplay iti sabali a kompania. And hopefully saankanton nga agaramid iti kalokuan. Thank you for working with us, and… goodbye, Mr. Rapas.”

Ninamnaman ni Kinio dayta a sentensiana. Ngem kasla nagtupak latta ti langit kenkuana. Panagriknana ket nagrikep ti ruangan dagiti amin a namnamana idinto a naglukat met ti ruangan ti panagtutuokna.

Kasla maaw-awanan a naglugan iti van iti panagawidna. Kinautna ti selpon iti bolsana. Adda tallo a missed calls-na. Napuotanna itay ti panagkuyegyeg ti in-silent mode-na a selponna ngem gapu ta adda iti board room, dina inkaskaso dagitoy. Naggapuda gayam ken ni Cristine. Ibolsana koman ti naka-silent mode pay la a selponna ngem nagkuyegyeg manen daytoy. Ni manen Cristine. In-slide-na ti arrow iti screen ti selponna tapno sungbatanna ti tawag. Ag-hello koma pay laeng ngem addaytan a nagsao ni Cristine.

β€œBebz, dadtoyak balayyo. Pinagtalawnak ni Tatang ta naduktalannan a masikogak. Ipangpangtana a patayennaka kano no dinak itakder isu a simmangpetakon, a, ditoy balayyo ta diak met kayat a rummuar nga awan amana ti anakko.”

Di napupuotan ni Kinio a naibbatan ti selpon nga iggemna ket natnag daytoy iti basar ti van a naglugananna.

Ammona a pannusa amin dagitoy kenkuana. Agbabawi man ngem naladawen ti amin. Pinarana ti van. Dimsaag ket nagna nga awan masnop a turongenna.#