Ti Agsingsingir

Sarita ni Rolando A. Seguro, Jr.
(Umuna a paset)

Agalas diesen iti bigat ngem isu pay la ti iruruar ni Kinio iti Rural Bank of Alcalapan a pagtrabahuanna kas loan coordinator iti Microfinance. Insuotna ti duyaw ken abut-abot a windbreaker-na ket nailemmeng ti pamugoten a kudilna. Inkakaubinganna ngamin ti nagkakainaran iti kataltalonan ken kadagiti waig no tiempo ti kalgaw a panag-kakammel idiay Casilagan a barioda. Dayta ti nangbum-buniaganda kenkuana iti navy ken nike. Navy as in naibilag ken nike as in naikirog. Kagurana idi damo ngem idi bumaybayag, kasla musika metten nga il-iliwen dagiti lapayagna a denggen.
Kinautna ti pangmotor a guantes iti akinlikud a bulsa ti uspak a Levi’s a pantalonna ket insuotna. Insuotna pay ti Spyder a duyaw met laeng a helmetna ken ti dadakkel ti sarmingna a dekolores nga anteohosna ket kasla dakkel nga antatadon a nangsakay iti nalabaga nga XRM a service-na tapno mapan agrota.
Itay pay a nakaadayo dagiti padana a fieldman. Naudi ta kinapatang ni Sir Gabby a superbisorna. Naikkan iti memo. Underload kano nga-min. Kayatna a sawen saanna a nagun-od ti target-na, wenno impatargetda kenkuana.
“Masapul a laingem ti ag-market. Nabayagkan ngem nagbassit pay ti account-mo. Ammom met a tallo gasut koma ti kababaan a miem-brom ta dayta ti standard load ti kada coordinator. Ngem apagsurok la a dua gasut ti klientem.” Medio makaunget itay ti nakuttong a superbisorna. “Sika pay met ti kangatuanen iti past due nga account. Into-naram met bassit ‘ta trabahom, a,” impasarunsonna pay.
“Wen, sir,” impapainayad itay ni Kinio idinto a pinir-maanna ti memo. Wen amin, basta adda ibaga ti superior-na. Ngem permi a dayamudom ti unegna aglalo itay rummuaren iti opisina. Agtallo tawenen nga empleado. Nabayag payen a regular. Apay pay la koma nga agbannog nga agsapul iti klientena? Agpaparehasda met la iti sueldo kadagiti padana a coordinator uray ad-adu nga amang ti kliente dagitoy ngem isuna.
Insardengna ti luganna idi makabatog iti Jobert’s Panciteria idi addan idiay Nasitang. Agbatilpatong man pay la ketdi sakbay a mapan iti damo a center (grupo dagiti babbai a naka-loan iti Micro) a singirenna. Adda met meal allowance-da iti inaldaw isu a libre ti kanen ken meriendada. Adda pay load allowance-da a tallo gasut iti binulan isu a dina met problema ti paglodna ken pasaray panglodna pay ken ni Cristine a maysa kadagiti bebeng wenno tsiksna. Kas iti apeliedona a Rapas, kasta met ti kinalaingna nga agarem. Saan met unay a guapo ngem alisto a makanobnobia gapu ta nalaing a bumoladas kadagiti babbai.
Inruarna ti Lenovo a selponna a kasla kaakaba ti dakulapna ti kadakkel ket tineksanna ni Manang Salome a center chief iti Sunset Center a damo a pagsingiranna. Nagatangna dayta a selponna idi kanikadua pay a tawen a pannakaawatda iti makabulan a performance incentive-da. Medio dakkel ngamin ti income-da idi isu a nakaawatda iti kasta. Idi napan a tawen, ninamnamada ti dakdakkel a maawatda ta impasigud nga-min ti manedierda a no lalaingenda ket dumakkel pay ti income-da, dakdakkel met ti maawatda. Isu a linalaingda ken ad-adda nga impasnekda met ti nagsapul iti kliente a pautanganda. Ngem pulos-doro no adda naawatda. Isu a manipud idi, kasla agsasaduten nga agtrabaho.
Te, pansit lang me. W8 nyo ko sglit. Tnx
Agtigtig-ab pay laeng uray idi sakayanna manen ti motorna tapno mapan idiay Sunset Center. Ngem nagga-awiden dagiti dadduma a miembro ti center-na. Adu ti saan a nakabayad iti linawas nga obligasionna. Ngem imbes a mapan koma ni Kinio iti bal-balay dagitoy tapno ammuenna no apay a dida nagbayad, sinakayanna ketdi manen ti motorna ket napan iti sumaruno a centerna.
Gapu ta aldawen a talaga itay rummuar, ti center chief laengen ti nadanonna iti Timpuyog Center. Adda bayad nga imbati dagiti miembro malaksid ken ni Manang Soling a center chief. Maikatlo lawas itan a ti center chief-na ti mangidadaulo nga awan bayadna. Naiseminar idi a saan a mabalin ti agla-ngan nga agbayad ta mada-dael ti record-da sa adda pay penalty-da no kua ngem saan met nga estriktuan ida ni Kinio.
Awan kuartak, sir. Ag-update-nakto no nekswik, no kuna ti klientenan, wen, Manang, kunana met lattan. Isu a kanayon a maungtan ken ni Sir Gabby a superbisorna ta nagbassit la ngaruden ti klientena, adu pay ti saan a makabaybayad kadagitoy.
“An-anuek ngarud, Sir. Alangan a padaraek ta awan darana?” irasonna no kua. Ngem ti agpayso, talaga a maup-upayen nga agtrabaho. Agasem ta pangnamnama-endaka ngem awan met mauraymo? Nupay kasta, anusanna pay laeng ti maung-ungtan. Ti nasken ket adda pay laeng pangin-inutanna.
MALEM TI BIERNES. Kas gagangay no maawatda a fieldmen dagiti meal ken load allowance-da para iti maysa a bulan, aginumda no kua iti kantina ni Lynjoy sadanto ituloy iti resto bar ni Kagawad Omar. Adda ngamin live band-na dita ket mabalinda met ti kumanta no kayatda. Ngem sadanto la maitured metten ti kumanta inton dandanidan di aglalasin iti bartekda. Isu nga ad-adu a gundaway nga agba-lin a redhorse allowance dayta.
Kas ita, nakatallo kahondan a redhorse iti kantina ni Lynjoy idinto nga in-innemda a nagsasango. Patakpatak wenno agbibingayda met ketdi iti bayadan. Ti makadakes, uray da Dexter ken Ronnie a naasawaanen, agbalinda a kasla baro no kasta nga isungsong ida ni Kinio.
KALKALPAS ni Kinio a nangaldaw iti kantina ni Mildred a klientena met laeng idi agkiriring ti selponna.
“Hello, bebs!” sinungba-tanna a dagus idi makitana iti caller ID a ni Cristine ti umaw-awag.
“Hello met, bebs. Agla-ladutak. Diak pay ngamin nag-mens. Makalawasen a delayed-nak.”
“Alla. Ket kitaem, a, bebs,” adda lagaw iti panagsao ni Kinio. Dina kayat nga agsikog ni Cristine. Dina pay kayat ti maigalut. Kayatna pay ti agpapas nga agbaro. Adu pay dagiti agur-uray kenkuana a babbai. Sa maysa, dina kayat nga asawaen ni Cristine. Adun ti nadamdamagna a naglabas a lalaki iti biag daytoy. Sa ketdin isu ti pagsaltekanna? Never! Dayta ti kanayon nga ibagana iti nakemna. “Bay-am ta mangidagasakto iti PT. Apay ngamin a dim inal-aluadan?”
“Ta siak pay ti pabasolem. Uray madi koma ‘gamin idi ket ipapilitmo met,” imbales ni Cristine. “Mabutengak ken ni Tatang.”
“Saan pay met a sigurado, bebs. Nalaka la a risuten dayta,” inggibusna ti patanganda. No pudno man a masikog ni Cristine, di ipaikkatda. Kasta man met langen ti inaramidda idi ken ni Myla.
(Maituloyto)