VIGAN, Ilocos Sur – Adda napigsa nga alas ni Vice Governor Deogracias Victor Savellano tapno ibalatna manen ti kasupangetna iti daytoy a panagpailayonna iti puestona iti masungad nga eleksion.
Iti panagkamkampania ni Savellano nangruna iti umuna a distrito, napaliiw a sumursurot iti grupo ti kaingungotna a ni Miss Dina Bonnavie, nalatak nga artista iti pelikula ken telebision.
Segun iti maysa a sumursurot iti kampania, naregget ni Miss D a sumursurot iti grupo ken mangipapaay iti dakkel a “suporta ken ni lakayko”.
Kinuna ni Savellano a nupay ammo ni Miss D ti kinarigat ti agsursor kadagiti nadumaduma nga ili ken barangay, nagdisnudo a simmursurot iti grupo ket no makiddaw ti panagsaona, mangiyebkas iti ababa a bitla a pangikampaniana kadakuada.
Segun ken ni Savellano, adda metten dagiti Ilokano a balikas a nasursuro ni baketna.
Kabayatanna, kinuna ti bise gobernador a sabsabali ti kinabara ti panangsarabo dagiti lumugar iti Team Ryan iti panagkampaniada kadagiti barbarangay ken il-ili iti probinsia.#