Ti annongen ti asawa a babai (Maikadua a paset)

“Aysuska met a tao. Siak la ngarud ti naglaban. Siak ti agala ken mangluto iti bugbogen. Siak pay ti agluto iti innapuy ken masida, sigurado a siakto manen ti aginnaw,” nakudkod ni Mising ti tuktokna.

“Ket ania ngarud, diak met makaluto ta kamanmanikiurko! Dika kadi makaaw-awat? Mabalin kadi met ti agarasaw ti kamanmanikiur? Di pay ketdi mapunas!”

“Di mangalaka iti aklo a pagarasawmo no dimo kayat a mabasa dagita imam!”

“Ay, basta sika ti agluto! Adda pay papanak!”

“Papanam ngarud?”

“Innak makitong-it! Isu a dinak bubuisiten!”

“Naa, salbag, ania ket ti kastoyen a gasatko! Trabahok met aminen a trabaho ditoy balay! Ania itan?”

Ngem saan la a dayta ti misterio iti krus a bakbaklayen ni Mising. Simmangpet ni Rina a nasipnget ti rupana.

“Nakitam kadi tay kuarta iti rabaw ti lamisaan, Rina, baket? Awan metten.”

“Nakitak itay bigat. Ngem dimon sapulen no awan ta dimon makita.”

“Kayatmo a sawen, innalam? Nangipanam aya?”

“Naabak iti tong-it!”

“Aysuska met a tao. Igatang iti feeds a kanen dagiti baboy, napanmo ketdin insugal?”

“Oy, oy, Misingka a, dinak man sersermonan no kastoy a napudot ti ulok ta amangan no mapapispisanka pay! Iremediomon no awan ti sukatna!”

Nupay masemsem la unay,  saanen a nagtimek ni Mising. Ammona nga awanto met la ti mamaay ti saritaanda a dua ta adayo a nabilbileg ni Rina ngem isuna.

Saan a nailaksid ken ni Nang Undis nga ina ni Rina dayta a kasasaadda nga agassawa. Kinasao ngarud ni Nang Undis ti anakna.

“Puonay ket a panangtratomon iti asawam, Rina?”

“Apay manen aya, nanang? Ania manen ti nadamagyo kadagiti tsismoso ken tsismosa? Adu la amin a madengdengngegyo. Adu la amin a patpatienyo.”

“Ay, dika met unay iti asawam a, anakko. Kababain ti kasdiay nga ar-aramidem iti asawam. Kaska met lan emperatris no agmandarka. Tratuem met ti asawam a kas ama iti pagtaengan a dayawen ken ited ti umno a respeto.”

“Ehemn, no aniaman dayta a naidanon kaniayo, awan ti serbina a banag!”

“Palagipanka laeng, anakko, dimo unay anderen ti asawam. Nasken nga agbinnadang ti agassawa. Agpatasda iti amin nga aramid. Iti rigat ken nam-ay ket nasken nga agkatunosanda nga agnanayon ta dayta ti sikreto ti naannayas a panagbiag ti naestaduan.”

“Ayna, nanang, ammok ti ar-aramidek…”

Saan a naisuro ti ina ti anakna. Nangipaay la ket ngarud iti dakkel a pakasemseman ti ina.

MAYSA  nga aldaw, napasangbay ni Mising ni German a kabaddungalanna.

“Hu, Mising, pards, namising met la a kanayonen ti anniniwanmo isu a dinanonka man laengen, he-he!”

“Sika gayam, German, pards. Nakaispotingka met. Papanam aya?”

“Ket no agpabuniag ni Pari July!  Pirmi a lamot ken inum a! Isu nga agrubuatkan ta mapantan! Apay, dimon kayat aya ti malanitan ti subsobna? Libre a lamot ken inum, kunam man, kusayam pay laeng?”

“S-sika laengen, pards. Adu pay ti obraek.”

“Ne, apayen? Idi dika pay nagasawa ket kutokutoka kadagiti punsionan ken adda pay kalendariom a nakaikabilan no asino dagiti agkasar, agpabuniag, agpamisa, agbertdey, ken ania la ditan a punsion!”

“Diak pay ngamin nakalaba iti ules ken supot ti pungan. Sa maysa, diak mapanawan dagiti tarakenko.”

“Salbag, husto gayam ti madamdamagko maipapan kenka, he-he.”

“Ha? A-ania ti madamdamagmo?”

“Nagpantalonka la ngaruden, agpandilingka pay laeng! Maymaysa pay laeng ti bungayo ken ni Rina, ngem sika la ngaruden ti pader, sika pay ti mader dir, he-he!”

(Adda tuloyna)