Footer

Ti Arte Ti Komunikasion Ilokano 101 (Maika-29 a paset)

KUMPAS iti kannigid ken kannawan, kumpas a pangato ken pababa, kumpas a patag-ay. Ngem, saan a daytay kumpas nga overacting no di tay kumpas a kasapulan no adda balikas a nadagsen wenno  nasken nga iyunay-unay. Kas no “lumabantayo!”, baliksen a  nakangato ti nalukot a gemgem. Emphasize by means of action.

Liklikan met nga ibulsa dagiti ima iti pantalon, ikabil iti likod wenno agbaniekes. Sangkadagullit ni Kris Aquino dagitoy a palagip kadagiti kasasaona. Paset dagitoy a palagipna ti nasamay nga speech and oral communications.

Nasken a liklikan ti panagdalikepkep, panangay-ayam kadagiti ramay, panangritturittuok kadagiti ramay wenno panangay-ayam iti  bolpen wenno lapis ta adda di naimbag nga impression kadagitoy. Posible ng ipakpakitam ti nerbiosmo wenno dika sisasagana kadayta a tallaong wenno gundaway. Nasken a nawaya nupay adda limitasion dagiti ima. Daydiay kannigid, saan a makadanon idiay kanawan, kasta met daydiay maysa.

 Agaramat dagiti nalaing nga orador iti nadumaduma a kumpas a mangidagsen iti kayatda nga  ibaga. Tumulong dagitoy a kumpasda  a mangipalawag iti sawenda tapno nadardaras a maawatan dagiti agdengngeg. Daydiay kumpas ket ipakitana, iladawanna, iyebkasna ti idea wenno  kaipapanan ti isawangna.  Kumpas a mangibati iti rikna,  ugali ken galad ken talugading ti agsasao.

Ti kumpas ket maysa a bisual a pangguyugoy kadagiti dumdumngeg tapno makipartisiparda iti inka  panagsao.

Uray pay dagiti agdaniw  ket buyoganda pay iti kumpas, saan? No maaramat ti kumpas iti daniw, nasamay  ngarud a pangguyugoy iti aniaman a kita ken klase ti panagsao.

Aramatenda ti kumpas a mangguyugoy uray pay iti musika, saan kadi? Kasta ti kabileg ti  kumpas.

 

5. Tignay.

 

No tignay no kuna, dagiti gunay ti bagi, mata, agong, ekspresion ti rupa, ken no ania la ditan. No naliday, siempre, makasangsangit ti ekspresion ti rupa. No naragsak, naragsak ti rupa, saan?

Tignay. Kanayonan daytoy ti kumpas dagiti ima.

No kuna ti agsasao ti “Diak ammo”, ania ti aramidenna? Siempre, manglangit daytoy santo agkudkod. Bisual a ladawan ken panangiyebkas dayta iti “saan nga ammo” ken kinaawan iti ammo.

Adda pay daydiay nasken nga umaddangka iti pasango kas tulong iti bisual a panagilawlawag iti idea wenno imbalikas. Kas pagarigan koma: “Intayo!” kunam, siempre, kasapulam ti umaddang iti maysa nga agpasango kas bisual a ladawan ti insawangmo.

Adu dagiti tignay a nasken met nga ikkan iti preperensia  tapno mailawlawag a naimbag ti idea.

Dagitoy a lima ti talugading ti nasamay a panagsao.

Ta ania ngamin aya dagiti panawen nga inka agsao?

Inteview? Job interview? Exit interview? Counseling interview?  Diagnostic interview? survey interview? Media interview (broadcast ken press)? Sales interview? Dayta laengen job interview, no dika nalaing nga agsao, nungka a makastrekka iti trabaho!

Bitla. Speech. Ania  nga speech? Debate? Ay,  adu!

Kansion. Daniw. Ken adu iti panawen a maikkanka iti tiansa nga agsao. Isu a nasken ken kasapulan ti inka  panagadal no kasano nga agsaoka iti nasamay.

Dayta  laengen job interview ket iladawanna ti dua nga agsasao. Prinaktis ken inadal ti tunggal maysa ti akemna sakbay a dimteng dayta a gundaway. Saan laeng a ti agsapul ti trabaho ti nagpraktis iti sawenna. Uray dagiti interviewer ket inadalda dagitoy. Asino aya dagitoy nga interviewer iti panagserkan iti trabaho? Dagiti HR wenno human resource specialist. Uppat a tawen a nagadal dagitoy iti human relations  ken/wenno psychology.

Kasano ti sumungbat iti job interview babaen ti panel? Ken kasano ti makipartisipar iti panel discussion wenno kameng ti panel interviewer?

Sabali ti sumrek iti trabaho a maysa laeng wenno saggaysa ti papanan a lamisaan a manginterbio. Sabali met ti panel. Iti panel, agsisinnublat dagiti agsaludsod. Napadasakon daytoy idi nagaplayak iti trabaho iti UP-Baguio. Siamda.

Kasano ti sumungbat iti media interview? Ania ti aramiden ti media sakbay nga aginterbio?

Kasano ti makidebate? Kasano ti agsao iti debate?

Kasano ti agbitla? Ania a bitla? Bitla no sika ti agkampania iti butos? Bitla no sika ti guest speaker? Ania ti klase a pag-guest ispikeram?

Ammom kadi no ania ti kayat a sawen ti exit interview? Apay a nasken a  mapasamak ti exit interview?

Ti sales interview? Dagiti makunkuna a nagadal wenno adda ammona maipapan iti panaglakuan. Mnn… kasano ti panagsao ditoy?

Ania ti makunkuna a diagnostic interview? No dimo ammo ti isungsungbatmo iti diagnostic interview, nungka met a maagasanka! Kasta met laeng iti counseling interview.

Ay, adu dagiti panawen nga inka agsao. Ngem ituloytayonto iti  sumaruno….

        (Adda tuloyna)

, ,