Sarita: Ti asno (Maikadua a paset) | Tawid News Magazine - Weekly Ilocos News 📰

Ti asno (Maikadua a paset)

NAUTOB NI Asno idi agangay, saanen nga importante a diskusion no apay a simmangbayda iti putong a koral. Ti kaskenan unay ket iti pannakailiklikda iti nakarkaro ken nadagdagem pay a situasion a di maiparbeng a mapasamak.

Makarikna met ni Asno iti kaasi iti amona a babai, saan a maitutop a sagabaenna ti kastoy a panagtuok. Asinoman a masikog, tao man wenno ayup a kas kadakuada, saan a maiparbeng iti nakas-ang unay a sasaaden iti panawen ti panagpasngay. Lalo ti panagpasngay ket maysa a komplikado ken narisgo unay a kasasaad ti masikog ken ti sikog.

Ngem awan iti maaramidanda, nasken a panawanda ti ilida, kas kadagiti dadduma pay a kalugaranda, nasken a tarayanda ti kinadangkok ti ari gapu iti bilin daytoy a pannakapapatay amin amin nga ubbing ken dagiti masikog.

Anian a kinaulpit ti ari! Anian a kinaulpit ti tao. A kasla ketdin saan nga insikog ti nadungngo nga inana ti ari? Wenno saan kadi a nagubing met ti ari? Minulmolan ni Asno dagitoy a pammabalaw. Apay nga imandar ti nadangkok nga ari ti nadangkok unay a pammilin?

Iti suron ken semsem ni Asno, sangduek kamman dayta nga ari, kunana koma, ngem kasano a maaramidna dayta a kinabayolente ket nagbassit ken nagrapis nga ayup ken awan met sarana? Ken maysa, saan a nairuam iti bayolente nga aramid. Saan nga ugali ti asinoman nga Asno iti agaramid iti bayolente ken kinadaang-as, saan a naigamer iti darada dayta a banag. Mapanunotda ti kinabayolente, gagangay dayta, ngem pulos a dida maaramid.

Nalagip ni Asno ti nangngegna a kuna ti kaarrubada a lalaki iti amona a lalaki nga ipaknina met ti pamiliana, a tarayanda ti bilin ti nadangkok nga ari. Kunana pay a maamak kano unay unay ti ari iti aw-awaganda iti Mesias, a nalabit itan ket naipasngayen wenno maipasngayto pay laeng.

Ti nadangkok nga ari, adda met kaamakna?

Ti Mesias ket ti sangsangkamaysa nga imbaga kano dagiti mammadto iti pagarian, a di malapdan a pagrukbaban dagiti tattao. Saan kano a kayat ti ari a maagaw kenkuana ti atension ken responsibilidad dagiti iturayanna. Nasken nga isu laeng ti pagrukbaban dagiti umili.

Isu nga imbilin ti nadangkok nga ari a mapapatay amin nga ubbing ken masikog iti pagarianna ta maysa laketdi kadakuada ti Mesias.

Anian dagiti tao, kuna ni Asno iti bagina, ta didaman la agtignay a kas tao no di ket kas iti mangirarit a demonio.

Simmeksek iti lagip ni Asno, ti balakad dagiti dadakkelna ken dagiti apongna a liklikanna dagiti demonio ta isuda kano dagiti sigud nga anghel a nangpadas a mangagaw ti turay ken daeg sadiay Langit, ngem dida nagballigi, isu a naipuruakda-naitinnagda ditoy Daga.

Dagiti sumagmagmano a tattao, a pakaibilangan ti nadangkok nga ari ket inadipen dagiti demonio. No agtignay koma ti tao a kas tao nga addaan iti panunot ken puso, iti kaanoman saan a maadipen ken/wenno paadipen iti demonio ta addaan iti kalasag a di pulos kabaelan a rebbaen iti asinoman a nadangkok.

Kuna pay idi ni inangna, dinto makarikna ti kappia ti tao no dina iseksek iti puso ken isipna ti kinalinteg, talinaay ken pia a kas parupa iti sarikedkedna kontra iti mananggundaway demonio. Daytoy kano lubong, saan a taeng ti kinalinteg no dipay ket dagiti addaan iti dakes a gagem, mannangikulbo ken pagragsakanda iti panagaramid iti saan a naimbag. Turay payen ken daeg ti Langit ket pinadas dagiti a demonio nga inagaw, ngem napaayda. Iti pannakaipuruak dagiti demonio iti Daga, ag-agawenda manen ti Daga babaen iti panangadipenna kadagiti tattao, ayup ken dadduma pay a nagbiag.

Sadino kadi iti pakasarakan ti kunkunada a Mesias? Innakto man met kitaen, kunana ni Asno iti bagina, ta kayatna met a mairupaan ti Mesias.

Patienna la unay ni inangna ken dagiti apongna, a ti Mesias ket isu ti salakan ken/wenno pakaisalakanan dagiti tattao, isuda nga ayup ken dadduma pay a nagbiag.

Nagbalaw ni Asno, iti kaadu iti sumsumrek iti mugingna, dina nadlaw ti pannakakumikom ti amona a lalaki. A nalabit, a maasian wenno maawatan met ngata ti karpintero nga amona a di rumbeng a singaen daytoy iti panangmulmolna kadagiti banag a nagintaer iti mugingna, numan pay ayup, addaanda met iti karbengan a mangikut ti talinaay ken pia.

Naanus ken mannakaawat ti amona a lalaki, nga itan ket naulimek daytoy a nakamasngaad iti sangnguanan ti apuy ken adda ti maidaddadang a kapeteria. Ti apuy ket natikub iti nagtimmukel a nasurok sangadangan kangatona a bingbingkol ken napagsasaip babaen iti pitak tapno saan a maikakayab dagiti rissik ken dalipato, a possible a pangrugian ti pannakauram ti koral. Nalabit, a dagiti tattao nga akinkukua daytoy a koral iti nangaramid tapno adda paglutuanda wenno kas nayon a dengngep kadagiti pastoda iti panawen iti lam-ek.

Insublat ni Asno a minatmatan ti amona a babai, nga itan ket nakakidem ken nakaidda iti kulluong. Napaksuyan ngata iti inda panagdalliasat, isu nga itan ket naiturogna.

Nalabit, a dagiti inurnos itay ti amona a lalaki a nagirikan iti trigo iti indalimanekna iti kulluong sana inap-apan iti ules. Dayta nanumo a nam-ay, ti rikriknaen dagiti amona.

Ket adda latta rimmusing nga isusupring iti muging ni Asno, a saan a maitutop kadagiti amona, a kas tao, ti agdama a sasaadenda, a maidilig a kas kadakuada nga Asno, ken dadduma pay nga ayup nga agtalinaed iti koral iti panawen a nasisita unay.

Minumolan ni Asno ti saludsod iti mugingna: Saan kadi, a kasapulan unay, a nasisita a maipaay iti asinoman a masikog, tao wenno ayup wenno aniaman a nagbiag a mataripato a naimbag agsipud ta mangipasngay iti sabali a biag?

Ti biag a pakariknaan iti asinoman, tao, ayup wenno aniaman a nagbiag no kasano iti panagayat ti Namarsua kadagiti amin a parsuana.

Nagareng-eng ti amona a babai. Nataldiapan ni Asno nga agpaspasikal, makitana ti sikog iti uneg ti saklolo nga agpasikkil, a mangipasimudaag iti gagarna met a makakita ken makapadas ti kinadaeg ti lubong.

“Apay? Nasakit kadi unayen?” Dinamag ti amona a lalaki.

“Daytoyen ti panawen, rumuaren!”

Maar-arakattot ti amona a lalaki a nagisagana kadagiti kasapulan ti panagpasngay ti amona a babai.

Tinaldapan ni Asno ti namituen a kalangitan, nakabulos iti mugingna ti gagem ti riknana, a sapay koma ta di marigatan nga agpasngay ti amona a babai. Adun a rigatda, isu a didan kasapulan pay iti nakarkaro a rigat.

 Nagmulagat ken napanganga ni Asno, kellaat a limmawag ti matmatmatanna a law-ang!

Ne, apayen, ania ti rason a naglawag ti kalangitan? Saan la ketdi a parnuay ti kabus, ta adda pay laeng iti daya a nakamulagat.

Ti kinapudno, lukaisanna dagiti naabbongan a misterio, dayta ti sangkabaga idi ti ina ni Asno sakbay a naipusing ken simmangbay iti pannaripato ti karpintero nga amona iti agdama. Nalagipna pay, ti sangkasao ti inana ken dagiti immuna a kaputotananna, iti kinaaddanto kano iti dakkel ken nalawag a baggak a mangsilnag ti lubong. Naisangsangayan kano ti baggak, ta addaan iti sabali sa kaimudingan: ti pannakaiwanwan kano kadagiti makaawat iti pakaitarusan ti amin, maiwanwanda iti umno a dana a dalliasaten iti lubong a sinallukoban ti sipnget.

Rimmuar a dagus ni Asno. Penkenna a nalaing no apay a kellaat a naglawag ti tangatang.

Anian a siddaaw ni Asno idi matangadna iti batogda a tangatang ti kinaadda ti dakkel ken narangrang a baggak!

Pudno ti kuna ni inangko ken dagiti apongko, kinuna ni Asno iti bagina, nga addanto agparang a karkarna a baggak!

Imbalakadda pay idi ken Asno, a nasken iti inna panagridam, ta amangan no iti panawenna a panagparang ti naisangsangayan a baggak. Ta awan ti makaammo ken makasinuo no kaano nga agparang ken sadino nga agparang ti baggak. Isu a napateg la unay ti panagridam ti asinoman, ayup wenno tao, tapno maimatanganna met dayta naisangsangayan a buya.

Agridam, a kayatda a sawen, kankanayon koma a sisasagana iti idadateng dayta a naisangsangayan a kanito. Isu a tunggal sardam, a sakbay a maturog kaay-ayona a matmatan ti tangatang. Magagaran met ni Asno a makitana ti baggak. Ingpenna met a mairaman koma a maiwanwan.

Itan, ta matmatmatanna ti baggak, makarikna ni Asno iti naisangsangayan unay a rikna, maysa a kinaragsak a dina mailadawan, a dina pulos maawatan, ngem iti kaungganna italtalukatik daytoy a dimtengen ti panawen a panagrag-o.

Natimud ni Asno ti panagasug ti amona a babai, marigatan unay. Agpaspasikal. Aganaken! Intalukatik ti mugingna a sapay koma ta saan a marigatan ti amona a babai, kaasi met.

Panagrikna ni Asno, iti pannakangngegna ti asug, uray isuna ket marigatan iti panagrigrigat ti amona a babai nga agpasngay!

Ay, dina kayat a buyaen ti panagpasngay ti amona a babai, dina kayat a buyaen ti panagrigrigat daytoy nga agpasngay. Dina kayat a buyaen ta uray isu ket marigaten met!

(ADDA TULOYNA)