Sarita: Ti asno (Maudi a paset) | Tawid News Magazine - Weekly Ilocos News 📰

Ti asno (Maudi a paset)

Agparangto kadi manen iti maikadua a gundaway ti baggak? Uray no iti sabali a rabii ken panawen?

Dina masinuo.

Awan ti magaw-at ni Asno a sungbat dagiti saludsodna, a kas iti dina met pannakarikna ti lam-ek ti nagbaetan ti tengnga ti rabii ken apagligsay a parbangon.

“Nagpasngayen, Asno, nalungpo a lalaki,” kuna ti amona a lalaki, adda awit daytoy a nabalkot iti lampin ken kunana nga inna ikali iti batog ti sagumaymay iti likudan ti koral tapno saan a managlammin ti anak iti agnanayon uray no nataenganton.

Binay-an lattan ni Asno ti amona a lalaki, binuyana latta ti baggak. Dina kayat iti lumaem. A nalabit, agin-inanan ti amona a babai ken matmaturog metten ti maladaga. Di kayat ni Asno iti mangsinga. Ditoyna lattan ruar. Mapneken ditoy, a kas iti pannakapnekna iti naisangsangayan a buya iti tangatang.

“Lumaemkan, Asno, ammok a nabanbannogka met, isu nga umayka agidda iti abay ti temtem. Karbengam met dayta. Kasapulan ti bagim ti bara. Intan.”

Narikna ni Asno ti nadungngo a panangbatak ti amona a lalaki, a sidudungngo a nangabrasa ti tengngedna tapno siaallukoy a tumakder.

Situtulok lattan a nagtungpal ni Asno, ngem nabannayad ti panangaddangna idi maimatanganna a narnekan ngata ti turog ti amona a babai ta nakakidem ken nangsallukob iti impasngayna a maladaga. Dina kayat a makasinga.

Iti panagilad ti amona a lalaki, nagpunganna ti takiag daytoy a simmango iti temtem. Napaksuyan la ketdi ti amona a lalaki. Isu a makaturturog metten. Kasapulanna metten ti inana.

Naasian ni Asno. Nagilad met ti likudan ti amona a lalaki, inyunnatna dagiti sakana, sana indeldel dagiti kammaunana iti ulo ti amona tapno adda pagpunganan daytoy.

“Agyamanak unay, Asno,” ket nagpunganen kadagiti kammauna a saka ni Asno. Inkidemna manen tapno arakupenen iti nairut a libay.

Ngem saan pay a mailibay ni Asno. Pagsisinublatenna a matmatan dagiti nakakidem nga amona ken ti maladaga nga anakda. Minulmolan ti mugingna: Nanumo nga Ina, a nagpasngay iti nanumo a kulluong.

Pasaray taldiapanna ti naraniag a lawag ti baggak iti ruar.

Madamdama pay, nakangngeg iti anabaab. Adda sumungad!

Kinutikuti ni Asno dagiti kammaunana a nagpunganan ti amona a lalaki tapno makariing. Nasken a riingenna tapno isuna, isuda nga agassawa, iti mangpasangbay kadagiti sumangbay a ganggannaet iti kaltaang ti rabii.

Madamdama pay, addan dagiti tallo a lallaki iti daramuagan. Nagdaydayaw dagitoy ken nagkiddaw iti panangsingada iti inda panaginana.

“Nabayag nga inur-uraymi ti panagparang ti naisangsangayan a baggak, isu iti nangigiya ken nangtarabay kadakami tapno masurotanmi ti dalanmi nga agturong ditoy nakaipasngayan ti Mesias,” kunada a maragsakan la unay.

Napamulagat ken napanganga ni Asno iti nangngegna, nga itan ket nakatakderen, kasta met ti amona a lalaki. Nakariing metten ti naganak nga amona, ket nagdalupisak lattan a nangubba ti maladaga.

Mesias? Dinamag ni Asno iti bagina. Asino ti Mesias? Isu kad’ met laeng kunkuna ni inang ken dagiti apongko a Naindaklan? intalukatik ti muging ni Asno. Ket intuloyna iti nagpaliiw ken dimngeg iti saritaan.

Dinamag manen ni Asno iti bagina, a kuna dagitoy tallo a lallaki nga inturong ida ti baggak tapno makadanonda ditoy nakaipasngayan ti Mesias. Dagiti raya kano ti baggak a nakatudo ditoy koral ti pammaneknek nga isu ti lugar a nakaipasngayan ti Mesias.

Ti kadi maladaga dagiti amona ti kunkuna dagitoy tallo a lallaki a Mesias? Ket isu met laeng ti Naindaklan a kunkuna ni inang ken dagiti apongko? Dinamag ni Asno iti bagina.

Nasken a masungbatan dagitoy saludsod iti muging ni Asno. Agpaliiw pay.

Binuya ni Asno dagiti tallo a lallaki, a nangidisso kadagiti sagutda iti sanguanan ti nakadalupisaken nga amona a babai ngem nakaturog pay laeng ti maladaga iti saklotna.

Nagyaman dagiti amona a lalaki ken babai kadagiti tallo a sangsangaili.

Itan, ket agpakadadan. Agawidda met la nga insigida ta adayo pay kano iti inda daliasaten.

“Sadino kadi iti pagturonganyo, patgenmi unay a madaydayaw?” Dinamag ti amona a lalaki kadagiti sangaili.

“Kamangenmi nga umuna iti daya, sakamto agsisina nga agturong iti bukodmi a lugar. Inkamin ta napeggad iti agdaliasat iti rabrabii.” Kinuna ti maysa.

“Aguraykayo, ibatiantayo met a, ti kanen ni Asno piman…” singasing ti maysa pay.

Inayunan met ti maikatlo, ket isun iti immuna a nangidisso ti tallo a mansanas iti sango ni Asno. Timmulad met dagiti dua pay a lallaki, saggatloda met, kalpasanna, nagpakadadan.

Pinerreng ni Asno ti amona a lalaki, ikalkallatik ti mugingna ti kinaasino dagiti simmangbay.

“Nalabit, nga isuda dagiti tallo a mamasirib a nangsurot ti paltiing ti naisangsangayan a baggak,” kinuna ti amona a lalaki, “manganka ketdin, Asno, ta siguradoak nga agsarsaraaw metten dayta tianmo iti bambannogmo. Kalpasanna, aginanaka metten. Umunakamin a maturog.”

Nagiladen ti amona a lalaki, ginaw-atna ti maysa a tampong ket daytoyen ti pinagpungananna.Kimmagat ni Asno iti maysa a mansanas, sana intugaw iti nagkabukab. Ninanamna ti sam-it ken nakaramraman a mansanas dagiti tallo a mamasirib, a kas iti kananam ti kinapudno a kaipapanan ti naisangsangayan a Naulimek A Rabii.