Footer

Ti babai iti plasa, ti anak ken ti ina (Umuna a Paset)

ADDA manen ti babai a nakatugaw iti plasa. Nakaterno iti nangisit a blusa ken slacks. Manon a lawas a kanayon  a malabsan ni Mikaela no kasta a magmagna nga agawid iti dagusna manipud iti unibersidad a pangal-alaanna iti BS Psychology.

Natukay ti riknana iti minalem a pannakalabasna iti babai. Adda dagiti saludsod a timmubo iti mugingna. Agay-ayam iti uppat a pulo aginggat uppat a pulo ket lima ti edad ti babai, kasla kagapgapuna iti sakit ta medio napusiaw. Ngem dagidiay nangingisit a mata a kanayon nga adayo’t turongda ti nakaala ti atensionna.

Iti naminsan nga ilalabasda nga aggagayyem, nalabsanda a kasla adda kapatpatang daytoy, sa idi kuan nagsangiten. Agballa kuna pay ketdin ti maysa a gayyemna. Ngem sabali ti makitkitana kadagiti mata daydiay a babai. Napnuan palimed. Napnuan mensahe. Addanto aldaw a mawarwar dagita a mensahe, nakunana laengen iti bagina ket nagtuloyen a nagawid.  

Makumikom nga agreprepaso kadagiti leksionna ta umadanin ti finalsda idi mangegna ti timek dagiti kasangsangpet a kabordinganna a napan nagpasiar. Kasla adda pagkakatawaan dagitoy.

“Addan sa met ngamin kurkurang daydiay a babai,” nangngegna ti timek ni  Karen.

“Wen man,” impasaruno ni Myla, ti kasingedan a gayyemna iti dagusda. “Ngem kasla adda mabalinna. Nasayaat met dagiti kawesna,” innayon daytoy.

“Wen nga agpayso ngem apay a kasdiay ti inaramidna itay, nakigtotak a talaga,” kasla adda pay la buteng iti timek ni Lingay a nagsao.

“Apay, ania aya ti napasamak?” sinaludsodna ket timmipon kadagiti nakatugaw iti salas nga agiinnistoria.

“Daydiay man babai a nakitatayo idi naminsan ‘diay plasa pinagtripanna ni Lingay,” insungbat ni Karen sa kimmita ken Lingay.

“Ania ti inaramidna?”

“Idi magmagnakami bastanak lattan inasitgan sanak inarakup. Nakigtottak a talaga,” uray la dimmadakkel dagiti mulagat ni Lingay iti panangistoriana.

Naggagarakgak dagiti kakaduana ngem sabali ti adda iti panunot ni Mikaela. Adda binukelna a panggep.

“NALPAS metten ti finals, bakasionen, saanka kadi nga agawid ‘diay lugaryo?” sinaludsod ni Karen kabayatan ti panagem-empakena.

“Amman a,” insungbat ni Mikaela a nakailad iti katrena ken buybuyaenna ti gayyemna a mangisimsimpa kadagiti gargaretna.

“Ket apay ‘garud a dika pay laeng agempake? ‘Data laengen ti nabati ditoy. Itay pay laeng a nagawid dagiti kaduata,” adda siddaaw iti mata ti gayyemna. “Wenno adda kasarakmo a lalaki? Kaanoka pay a naaddaan iti boyfriend?” insutil  ti gayyemna.

Nagkatawa. “Sika a, kasmo met la imbagan nga awan mangayat kaniak,” adda kampay pauyo iti timekna.

“Saan met a kasdiay a, ngem apay ngamin nga agpapaudika nga agawid ket no sigud met a sika ti kanayon nga umuna nga agawid kadatayo.”

“Kua ngamin, adda bilin ni Mamang a mapanko gatangen,” inlibakna. Saanna met a maibaga iti gayyemna a mapanna kasarita daydiay a babai iti plasa. Baka katawaan laeng ti gayyemna.

“Siguradoka?” adda pay laeng duadua iti timek ni Karen. “Siguraduem a saanka a makitaray a,” pinerreng ti gayyemna.

“Lukaret! Ania koma a gapu ken kasano koma a makitarayak ket awanto pay boyfriendko,” makakatkatawa met a nakipinnerreng.

“Sige umunaak ngaruden,” nagpakadan ni Karen.

ALDAWEN idi makalugan iti bus nga agturong iti ilida a San Lucas. Napan pay ngamin naggatang kadagiti pasarabona iti pamiliana. Ubas ken mansanas ti ginatangna a para iti inana. Strawberry wine met para iti amana. Lansones ti ginatangna para iti kakaisuna a kabsatna nga in-innauna ngem isuna iti lima a tawen ta daytoy ti paboritona. Bareng maay-ayo ket saanton a kanayon a nakamisuot.

Masmasdaaw ta saan met a kasdiay a dati kenkuana ni manangna a Mariel. Nasingedda a dati. Malagipna, kanayon pay nga igatangan idi ni manangna iti makmakan ken badona tunggal agawid daytoy manipud pagbasbasaanna iti sekondaria.

Awan met ti ammona a nadagsen unay a makagapu iti panagbaliw ti pannakilangen ni manangna kenkuana. Malaksid iti daydi a pasamak: Dinalusanda idi ti sibubukel a balayda ta sumangpet ngamin tay kabsat ti inada a nabayagen nga adda idiay Canada. Imbaon idi ni manangna a mangdalus iti kuarto dagiti dadakkelda ngem gapu ta nangrugin ‘tay paboritona a pabuya iti telebision iti malem, saan a napan ket kapilitan a ni manangna ti nangdalus. Daytan  ti nang-rugian ti saan a panangpanpansin ti kabsatna kenkuana. Nagpulong la ketdi idi ti kabsatna kadagiti dadakkelda gapu ta idi sumangpet dagitoy manipud iti flowershopda, nangngegna iti kaunaan a gundaway ti ingangato ti boses ti amada. Saanna a maalingagan ti tungtongan dagitoy ngem kasla makapungtot idi ti timek ti amada ket agsangsangit met ti kabsat ken inada. Nagdamag ken mamangda kabigatanna ngem saan a sinungbatan daytoy ti saludsodna agingga a nalipatannan daydi nga insidente.

       (Adda tuloyna)