Ti Ballaag ni Somnus

Sarita ni Ma. Theresa B. Santos

Maudi a paset

 

ALAS TRES iti parbangon. Nalam-ek ti aglawlaw ti Brgy. Sto Cristo. Naulimek, karkarna a kinaulimek a kunam la no narnekan ti turogna ti rabii. Nanglangan ti uni dagiti mangrabrabii ken mamarbangon a billit. Awan mangngegan a tektek dagiti saltek wenno arek-ek ti tekka wenno taraok dagiti kawitan. Awan iti uray ania a makasinga iti ulimek. Ket no matmatan ti aglawlaw, kasla saan nga agkutkuti dagiti bulong, dagiti muyong ken sangsanga, kasla nanglangan ti angin, ket iti law-ang liningdan ti nangisit ken napuskol nga ulep ti simmagaysay a bulan.

Iti uneg ti kongkreto a balay a nagpinta iti asul-langit iti Purok Daya, adda karkarna a mapaspasamak iti nagbaetan ti kinadatdatlag ken realidad—ti transision…

Agtagtagainep manen ni balasang Debbie Devila: adda kampay idi a magmagna iti nadaeg a hardin. Nagadu dagiti nagduduma a sabsabong iti nagduduma a maris—sabong dagiti masetas a naipadaga ken dagiti kimpet kadagiti sanga dagiti dayo, adda pay dagiti sabsabong nga adda kadagiti danum—iti agos ti waig a nangbeltak ti hardin. Agtatayab dagiti adu a kulibangbang iti nagduduma a maris ken kadakkel. Agkankanta dagiti nagduduma a billit kadagiti sanga dagiti kaykayo. Makita amin ni balasang Debbie Devila dagitoy iti panangtaluntonna iti desdes agingga nakadanon iti lugar nga awanan iti biag…agkaiwara dagiti rurog, kabkabanga ken tulang ti saan a masinuo no tao wenno ayup wenno tumatayab wenno nagnaed iti danum. Agal-alingasaw ti ngumayngayebngeb a bara ti aglawlaw. Awan ti makita a nagbiag, ta nakset dagiti amin a mula: kaykayo, muymuyong, ruruot, amin ket nakset ken awanan biag. Agsubli koma iti hardin, ngem awan metten ti lugar no di laeng ti ayanna a pagtaktakderan. Sadino kadi daytoy a lugar? nadamagna iti bagina.

Nagkullayaw ni Debbie iti naimatanganna. Nagtalatalangkiaw. Ayannan ti hardin a naggapuanna itay? Ayannan ti napintas a lugar nga is-isemanna? Apay nga adda metten iti lugar ti daguyemyem?

Nakangngeg iti sig-am sumagmamano a deppa ti kaadayona iti masanguananna. Timmaray a napan nangammo ti kinaasino iti nagsig-am. Iti nagsangaan ti dua a desdes, naimatanganna ti nakatallikud a babai a nagbado iti naingpis a natingra a nalabaga a seda, nalayak agingga iti dapanna ken awanan manggas, ket nalawag dagiti gumilap dagiti pulseras iti pungupunguan daytoy ken dagiti singsingna, agingga iti siket daytoy ti kasla buok ti mais a buokna, nagminar ti kimmokakola a pammagi a naibalkat iti natingra a seda a kawesna.

“Asinoka? Ibagam no asinoka!” Awan iti as-asinna ti panagdamag ni balasang Debbie Devila.

“Siak ni Poena. Amin a tao a makakita kaniak, sagrapennan dagiti bunga ti aramidna…”

Nagkullayaw ni Debbie iti nangngegna. Kasla adda mahika dagiti balikas ti babai ket kellaat lattan a nagbibineg a nagbibineg ti sibubukel a bagi ni Debbie, kasla dinalanan ti rinibribu a boltahe, saan a makakuti, kayatna ti agtimek ngem kasla pinanawanen ti balikas ti ngiwatna, kimmarandikang metten ti isipna.

Naimatanganna ti nadaras a pannagna ti babai a kimmamang iti kanawan a desdes agingga iti nagpukaw iti nagpikoran.

Nagtalinaed iti kasasaadna ni Debbie, saan a makakuti iti nagtakderanna a tengnga ti desdes, saan a makatimek, dagiti laengen matana ti aggunggunay, maang-angotnan ti naisabali nga angot ti aglawlaw, nakalanglangsi, makarurusok, makapasarua, saanna mailadawan. Nabara ket kasla lalo pay a bumarbara ti aglawlaw babaen ti mangirogen a darang ti agmatuon nga init. Kayatna ti agikkis ngem dina maaramid. Kayatnati agkuti ngem di makakuti. Kayatna ti aganges iti dakkel ngem mariknana nga agin-inut nga agpukaw ti angin nga angsenna.

Mangngeg ni balasang Debbie Devila dagiti agdardaras a danapeg nga umas-asideg iti likudanna. Kayatna a taliawen ngem saan latta a makakuti. Dagiti laengen bukelbukel dagiti matana ti aggunggunay.

Umas-asideg dagiti danapeg. Maalingag ni Debbie dagiti timek dagiti dua a lallaki.

“Naaringanka met kadagiti tattao a naessem a social networking. Nakabirokka man ngatan iti balbalatongem, kabagis…!”

“He-he-he! Makaparay-aw met ti makibinnoltit ken makibinnalatong sika, sadiay skullbook. Sadino ti kunam a nasentensiaanen? Daytoy a babai a naidarekdek iti tengnga ti dalan?”

“Wen, saankan a naturabbet, kabagis! Aramidemon ta innak met makihit sadiay hitter, he-he!”

Intag-ay ti maysa kadagiti lallaki ti iggemna a kallawit-a-kumpay ket naggilap pay a naisarang iti agmatuon nga init. Nakigtot a napagilapan dagiti kassangpetna la unay a pangen ti uwak a nagbatay kadagiti sanga dagiti natay a kayo ket nagiikkisda a nagdardaras a nagpayakpak nga immadayo,  kagiddan a nanabtuog a nagdisso iti daga ti ulo ni balasang Debbie Devila sa nagtulid iti katapokan—ti nagtaud iti tapok panawenen nga agsubli met laeng iti tapok…!

TENGNGA ti aldawen ngem saan pay a rimmuar ni Debbie iti siledna. Isu a simrek lattan ti ikitna tapno aggusisa. Natakuatanna a nalamiisen ken nasikkilen ti bagi ni balasang DebbieDevila. Nagikkis ni baket a nagpaarayat.

Natakuatan idi agangay, a kas kinumpirmaran ti medico legal a bangungot ti impatay ni balasang Debbie Devila.#