Ti Biag Daydi Presidente Elpidio Quirino

Komentario ni Eden A. Alviar

(Tuloyna)

Napili a para bise Presidente ni Quirino, ket ni Senate President Manuel Roxas ti para Presidente iti kabukbukel a Liberal Party. Nangabakda iti eleksion. Nadutokan ni Quirino a Secretary of Foreign Affairs.

Ni Bise Pres. Quirino ket nagsapata a maikanem a Presidente iti Pilipinas sadiay Malacañang Palace idi Abril 17, 1948, dua nga aldaw kalpasan ti ipupusay ni Pres. Roxas. Kabayatan dagiti umuna a tawen ni Quirino kas Presidente, nakumikom ti administrasionna iti pannakatarimaan dagiti adu a nadadael iti pagilian bayat ti Maikadua a Gubat iti Lubong. In-inut ti pannakasimpa ti pagilian ken pannakapadur-as ti ekonomia babaen ti tulong ti US kem dadduma a pagilian babaen ti nasayaat a pannakilangenna kadagiti lider dagiti nasion.

Idi 1949 Presidential Election, nailayon ni Quirino a Presidente. Nangabak pay ti kaduana a Bise Presidente, ni Senador Fernando López, ken dagiti amin a kandidato a para Senador ti Liberal Party. Nababalaw ti administrasion iti dayta nga eleksion gapu kadagiti alegasion ti panag-suitik ken pamutbuteng. Nagsapata ni Quirino iti umuna a terminona kas Presidente sadiay Independence Grandstand (Quirino Grand-stand itan) idi Disiembre 30, 1949.

Idi Mayo 1950, inawis da Qurino ken United Nations President Carlos P. Romulo, dagiti official representatives ti India, Pakistan, Ceylon, Thailand, Indonesia, ken Australia para ti komperensia sadiay Baguio City a nangilukat ti ridaw ti Pilipinas kadagiti sabali a pagilian.

Nagbalin a nadagsen a parikut iti administrasion ni Quirino ti pangta dagiti komunista a kameng ti Hukbo ng Bayan Laban sa Hapon wenno Hukbalahap a sigud a limmaban kadagiti Hapon ngem nagbalinda a rebelde kalpasan ti gubat. Nakinegosasion ni Quirino ken ni Huk Commander Luis Taruc ngem napaay daytoy ket kimmaro ti riribuk kadagiti probinsia. Idi Marso 1951, nasuroken a 40,000 dagiti kameng ti Hukbalahap. Nangiwayat ti gobierno iti nainget a kampania kontra kadagiti rebelde. Naipaay ti libre a land resettlement program kadagiti sim-muko a Huk.

Tapno mapapigsa ti Armed Forces of the Philippines, nabukel dagiti 26 a baro a Battalion Combat Team a buklen dagiti sag-1,000 a soldado. Nabukel pay dagiti baro nga Army special units kas ti Airborne Unit, Scout Rangers, Canine Unit, ken Cavalry Unit.

Kabayatan ti 1951 Midterm Elections, inluges ti Naciona-lista Party dagiti kandidato ti Liberal Party iti Senado ta awan pulos nangabak kadakuada. Naangay pay ti special election iti nabakante a posision ti naglusulos a bise presidente a ni Fernando Lopez a nangabak idi 1949.

Idi 1953 Presidential Election, nagpailayon ni Quirino uray no masaksakit. Kaduana ni José Yulo a para Bise Presidente. Nakasalisalna ti sigud a Defense Secretary-na, ni Ramon Magsaysay a naglusulos ken kimmappeng iti Nacionalista Party. Kadua ni Magsaysay a naglusulos dagiti taga-Liberal a da Bise Presidente Fernando López, Ambassador Carlos P. Romulo, Sen. Tomás Cabili ken Sen. Juan Sumulong. Idi Agosto 22, 1953, nabukel ti koalision ti Nacionalista Party ken Democratic Party tapno mapaksiat ni Quirino. Inabak ni Magsaysay ni Quirino iti agarup 1.5 million a botos.

Kalpasan ti pannakaabak ni Quirino, nagretiron iti pagtaenganda sadiay Novaliches. Natay isuna gapu iti atake iti puso idi Pebrero 29, 2016. Naitabon ti bangkayna sadiay Manila South Cemetery, ngem nayakar dagiti tulangna sadiay Libingan ng mga Bayani idi Nobiembre 16, 2015.

Namaris ti biag ni Quirino ken nangato ti nagaw-atna nga akem kabayatan ti kinarigat ti kasasaad ti Pilipinas a bumangbangon kalpasan ti nakaro a pannakadadael idi panawen ti Maikadua a Gubat iti Lubong. Nabigbig isuna a Father of Foreign Relations. Inyusuatna ti Presidential Action Committee on Social Amelioration a timmulong kadagiti marigrigat, Labor Management Advisory Board, Agricultural Credit Cooperatives Financing Administration ken Rural Banks of the Philippines. Inwayatna pay dagiti social security program – Unemployment insurance, Old-age insurance, Accident and permanent disability Insurance, Health insurance, Maternity Insurance, ken State Relief Insurance.

Binukelna pay ti Social Security Commission. Inyusuatna ti Agrarian Reform, Agricultural Development babaen ti National Land Settlement Administration, Land Settlement Development Corporation a nangala kadagiti responsibilidad ti Agricultural Machinery Equipment Corporation, ken Rice and Corn Production Administration.

Dagita a programa ti namunganayan dagiti maisaysayangkat a gannuat para ti pagimbagan dagiti umili iti agdama a panawen.#