Footer

Ti biddut a maiyallatiw a pudno

ITI kallabes, rimmuar ti alegasion nga adu dagiti biddut a linaon dagiti libro a pagadalan dagiti agbasbasa iti elementaria ken sekundaria iti public schools. Maysa a nangbabbabalaw iti DepEd  ti maysa a propesor a nangibilang iti bagina a parasiput kadagiti biddut a naipalaon kadagiti libro nga ar-aramaten dagiti agbasbasa iti elementaria ken sekundaria iti eskuela publika iti pagilian.

Ngem kinuna ketdi ti DepEd ken dagiti publishers dagiti libro a dinakamat daytoy a propesor a napno kadagiti biddut a pammadpadakes laeng dagiti alegasion idinto nga impaganetgetda a rinebio ken inamiris dagiti kualipikado nga otoridad dagiti linaon dagiti libro sakbay a napalubosan a maiprintada.

Ngem iti panangruk-at ti DepEd iti “Errata Guide” a nakaipalaonan dagiti biddut a masarakan kadagiti libro kas rinebio ti maysa a panel dagiti mangisursuro ken superbisor, arig inalimonna ti panaglibakna ket pinatalgedanna ti kinaagpayso dagiti rimmuar nga alegasion.

Makaulaw ti naduktalan ti nasao a panel iti panangrebiona kadagiti 11 a libro a maiyad-adal kadagiti pagadalan publiko: addaanda iti kadagupan a 269 a biddut.

Saantayon a dakamaten dagiti paulo dagiti libro ken dagiti nagaramid kadagitoy a pagbasaan, ken no ania dagitoy a biddut agsipud ta saan a makaanay ti limitado nga espasiotayo no ibinsabinsatayo a saggaysa.

Ngem annugoten man wenno saan dagiti DepEd officials, adu dagiti libro a maiwarwaras kadagiti eskuela publika a nababa ti kalidadna, saan laeng nga iti kalidad iti produksion no di pay iti linaonda.

Kangrunaan a kapaliiwan a nababa ti klase ti papel a naaramat, naikola laeng dagiti binulong dagiti ket di pay natawenan no ar-arigen, pisangpisangen ken nawarawaran dagiti binulongda.

Adu pay dagiti masarakan a nabalinsuek a panid, biddut iti spelling ken topograpia.

Ngem kadakkelan a biddut a masarakan, naipalaon kadagiti libro dagiti nalaw-asan a pagteng a saan a pinatalgedan dagiti autor ti kinaagpaysoda wenno naibasar iti pudpudno a napasamak kas koma idi gubat ti Pilipinas kontra iti Amerika ken idi tiempo ti martial law ni napadisi a Pres. Ferdinand Marcos.

Ngem dayawentayo ti DepEd gapu iti daytoy a panangaturna kadagiti biddut a linaon dagiti libro a maiyad-adal kadagiti agbasbasa.

Mangnamnamatayo a saan laeng a para pabuya daytoy nga inaramidda no di ketdi itultuloyda tapno awanton ti masarakan a biddut kadagiti libro.

Ta nadagem a biddut ti biddut a maiyallatiw iti panunot ti ubbing a kas pudno nga agtungpal iti pannakatikawna no ania ti pudno wenno saan iti naadalna.#