sinursuran-banner-sqSinursuranNi Jobert M. Pacnis

Ti dana ni Ma’am Ana

GOD is good!

Dayta ti napnuan emosion ken makaluluasit a kinuna ni Ma’am Ana iti panagsaona iti programa a nairuknoy kenkuana. Iti dayta ngamin nga aldaw, panawannan ti damo a pampubliko a pagadalan a nangisuruanna. Panawanna tapno iti kasta, mapanen iti ilina a pangituloyanna ti kinaadipenna iti tisa.

Kas kunana, kasla dina pay laeng patien nga iti udina, iti gundaway a dina ninamnama, dimtengen ti tinagtagiurayna. Naawatnan ti re-assignemnt order-na iti katengngaan ‘atoy a Hulio.

Asino ngamin ni Ma’am Ana? Ania ti nagubbogan dayta a saona?

Nagtaud ni Ma’am Ana iti ili ti Enrile, maysa nga ili iti abagatan a paset ti Cagayan. Naala a mannursuro idiay siudad ti Antipolo. Adda idin katakunaynayna iti biag. Nasakit iti riknana nga adaywanna ti pamiliana aglalo ket adda bassit nga anakda nga agassawa.

Ngem kas kunana, sinapataanna ti agisuro, ti mangibisik iti adal kadagiti ubbing. Ken kas adda bukodnan a pamilia, masapul nga agtrabaho para iti masakbayan. Ngarud, masapul a sanguenna dagiti pannubok— kas iti dayta yaadayona iti pamiliana.

Napnuan liday dagiti naglabas nga aldawna iti destinasionna. Awan ti kanito a dina pinampanunot ti bassit pay nga anakda. Mail-iliwan a kanayon. Saan met a kas karina lattan a makaawid.

Ngem anus ti amin nga anus. Kinutkutimanna ti liday iti barukongna.

Iti dayta a tawen a ngannganin agleppas ti klase, bimmeggang iti barukongna a masapul a makastrek iti pampubliko a pagadalan. Nasirmatana ti idadakkel ti magastoda iti masungad kadagiti masungad nga aldaw. Masapul a sakbayanna dayta. No iti adayo ti pagtalinaedanna, nga adayo iti pamiliana, saanto a makaanay ti matgedanna. Aglalo ket saan a regular ti trabaho ti asawana.

Iti ayatna a madar-ayan ti panagturpos iti Day Care Center ti anakda, inkagumaanna ti nagawid iti ilida. Saanna ngamin kayat a palabsen dayta a gundaway.

Marso 14, 2016 a kaaddanan iti balayda, napasamak ti dina namnamaen. Nagligasi ti pangalna (jaw dislocation). Gapuna a narigatan nga agsao. Intartarayda iti ospital. Makasangit pay ta iti kabigatanna dayta ti panagturpos ti ubingda.

Ngem napayaman ta naisubli met laeng ti nagligasi iti leppas ti pangngaldaw idinto nga alas sais pay iti agsapa a naitaray iti ospital. Napalubosan nga agawid ket siraragsak a dinar-ayanna ti panagturpos ti ubingda iti kabigatanna.

Marso 16, nagawidda iti maysa a barangay iti siudad ti Tuguegarao a lugar dagiti nakaikamanganna. Dita, iti maikadua a gundaway, nagligasi manen ti pangalna.

Sineknan iti danag. Kasanon ti panagisurona no kasta? Ngem saan nga immibbet. Nagkarkararag iti Namarsua.

Saanen a makasao iti rigatna. Intarayda manen iti ospital. Pagsayaatanna ta naisubli met laeng iti normal ti pangalna. Inanusanna ti sakit ta manual laeng a wagas ti pannakaisublina.

Ngem nagligasi manen iti kabigatanna. Maikatlon dayta a gundaway. Iti asi ti doktor kenkuana, inikkandan iti binder tapno saan nga agkaraligasi dagiti pangalna.

Iti dayta a panagawidna, ad-addan ti rigatna. Puro nalukneng laengen a taraon ti ipapaunegna. Marigatan la unay nga agngalngal. Ik-ikkanda iti straw ti kanenna a pangsusopanna itoy. Rumekenda payen nga ikanaw iti danum dagiti agasna.

Sineknan iti nakaro a ladingit. Na-depressed a kunana. Aglalo idi saan payen a makakita. Sinangsangitanna dayta a kasasaadna. Kasano laengen ti biagda a sangapamilia?

Naimbag laeng ta adda iti likudanna ti naayat nga asawana ken dagiti mangipatpateg kenkuana. Kinadkaduada iti labanna. Ad-adda met nga immasideg iti Dios. Saan a nagsarday a nagkarkararag para iti nadaras a panagimbagna.

Napanunotna payen nga awan gasatna iti panagisuro. Saanna siguro a linia isu a kasta ti mapaspasamak. Ngem iti suli ketdi ti isipna, um-umkis latta ti ayatna nga agisuro.

Napayaman ta naisubli manen iti normal ti pangalna. Makakita payen. Isuna laeng ta naapektaran ti panagsaona. Saanen a kas iti dati. Agsawaw ti letra S no baliksenna.

Awan sabali nga igamna kadagiti a gundaway no di ti kararag.

Iti panaglukat ti klase iti dayta a Hunio, nagsublin iti siudad ti Antipolo ta adda awag kenkuana. Naala a kas mannursuro iti pampubliko a pagadalan ti elementaria iti Bagong Nayon IV. Yur-urayna laengen ti appointment papers-na tapno naan-anayen ti kina-regular-na a mannursuro.

 Ngem agdua a bulanna laeng dita ta nagawid iti ilida. Saan ngamin a kabaelan ti bagina. Nakapsut latta. Isu a binagaan ti Dibision nga agawid pay laeng tapno agpaimbag. Agsublinto no nalainganen.

Sinangitanna dayta a kanito. Napalusposanna ti gundaway a ma-regular koman. Ngem ania ngarud ket saan met a kabaelan ti bagina.

Nagpaagas iti panagawidna. Pimmigsa ti panagriknana ti bagina aglalo ta inaldawen a makitkitana ti pamiliana. Isuna laeng ta saan pay a nagsubli a naan-anay ti kinatinggaw ti timekna. Timek a kangrunaan nga igamna nga agisuro aglalo ket English ti major-na.

In-follow-up-na iti Dibision ti napanawanna nga aplikasionna iti senior high school nga aglukat iti dayta a tawen. Nalikudanna daytoy ta isu met nga inawaganda idiay Antipolo.

Agosto 4. Anian a ragsakna idi awagan ti maysa a prinsipal. Pagrepreporten daytoy iti pagadalanna no kayatna.

Napatilmon ni Ma’am Ana idi maammuanna ti yan ti eskuela. Nasurok a dua oras a biahe manipud iti ilida. Adda kano daytoy kadagiti maysa a barangay iti lauden ti ili ti Aparri. Saan pay a basta iti asideg ti sentro. Aglikus pay ti lugan iti ili ti Ballesteros (agmaysa oras a biahe manipud iti Magapit, Lal-lo a suminaan ti dalan nga agpa-Aparri). Manipud iti sentro ti Ballesteros, agtraysikel iti agarup duapulo minuto.

Ngem no agdissaag iti sentro ti Aparri, aglugan iti bangka a mangdaliasat iti sabangan. Duapulo agingga iti tallopulo a minuto dayta depende iti panawen— no nadalluyon wenno nalinak.

Ngem nupay kasta ti naaammuanna, impasiguradona iti prinsipal nga agreport iti kabiitan a panawen. Naragsak latta ta adda met laengen pagserkanna. Inyumanna dayta iti pamiliana.

Naragsakanda para kenkuana. Nupay contractual pay laeng ti posisionna (ta iti Senior High School ti nakaalaanna), nakayaman latta iti dakkel ta mabalinna ti agawid iti kada malem ti Biernes. Sapaenna ti agrubuat iti agsapa ti Lunes tapno makamakamna met laeng ti oras ti panagseserrek.

Iti panagisurona, madlaw pay laeng ti panagbeddalna no dadduma. Ngem inan-anusanna latta. Saan nga isu ti makatubeng iti kinamannursurona.

Agingga a naan-anayen ti panagimbagna.

Marso manen iti sumuno a tawen. Walo bulanen ti tianna. Nasapa a nagbiahe iti dayta a Lunes a panaggapuna iti ilida.

Ngem makakitkitakiten ti riknana ta adda koma pay check up-da nga agina iti dayta nga aldaw. Ngem gapu ta busy iti pagadalan iti umadanin a panagrikep ti klase, kunana nga iti sumarunonto laengen nga awidna ti panagpakitana iti doktor. Wenno ‘ton nakarikepen ti klase.

Naannayas ti biahe ta awan pay ti adu a lugan. Asidegen iti Brgy. Zitanga, Ballesteros, Cagayan (a pagdissaaganna ta saan a diretso iti sentro ti nalugananna) idi pagammuan ta naidungpar ket nagbulang-it ti van a naglugananda.

Napatanamitim laengen idi makitanan a madisgrasiada. Aglalo ket adda ubing iti saklulona.

Sikan, O Apo, ti makaammo kadakami nga agina, nakunana laengen.

Inarayat ida dagiti nakakita nga agindeg ti Brgy. Fugu (kaarruba ti Zitanga). Napuotanna laengen a nasakit ti bagbagina. Napasangit pay idi makitana nga agpadpadanum gayamen. Ket napanunotna ti imetna nga ubing.

Apo, isalakanmo kad’ ti anakko, naidawatna. Saannan a pinanunot ti bukodna a bagi.

Naitarayda iti ospital iti nagbedngan ti Cagayan ken Apayao. Maysa ti DOS wenno dead-on-the-spot, empleado ti BJMP, kadakuada a nakalugan.

Kalpasan a naeksamen iti nasao nga ospital, naipa-Tuguegarao ni Ma’am Ana. Masapul ti operasion ti takiagna a natukkol. Nupay kasta ti naammuanna, napayaman laengen ta saan a natay.

Ken sibibiag kano pay laeng ti anakna.

Na-stainless ti ima ni Ma’am Ana. Kalpasan laeng ti sumagmamano a kanito nga iruruarna iti operating room, inserrekda manen. Nakita ngamin dagiti doktor a kumapkapsut ti pitik ti puso ti anakna. Masapul a ma-caesarean sakbay a maladaw ti amin!

Kararag manen di nalpas a kararag ti inobra ni Ma’am Ana. Maispal koma ti anakmi, Apo, kinunkunana. Aglalo ket agkurang pay iti bulan tapno rummuar koma.

Nairuar ni Ma’am Ana a nasalun-at ti ubing. Nagarubos dagiti luana iti pannakaispalda nga agina.

Kalpasan ti makatawen, na-regular met laeng. Napayaman manen iti Dios.

Ngem ketdi, kadagiti simmaruno a tawen, adda dayta amak, aliaw wenno buteng a sumsumnek kenkuana no kasta a sumangbay ti bulan ti Marso.

Ngem awan ti nagbalin nga igamna no di ti panagtultuloy a panagkarkararagna. Kunana man a napatgan dagitoy ta awanen ti dakes a napaspasamakda a sangapamilia kadagiti dimteng a Marso iti biagda. Ken mangnamnama a kadagiti pay sumarsaruno a Marso iti biagda.

God is good talaga, my fellow teachers, inggibus ni Ma’am Ana ti panagsaona.

NALAWAG daytoy a padas nga iti ania man a dumteng a parikut iti biagtayo, saan nga isu ti ungto ti biag. Saanna a kayat a sawen a binaybay-annatayo ti Dios. A saannatayo nga ipatpateg. Laeng, adda dagiti planona. Plano wenno panggep a nasaysayaat ngem kadagiti planotayo.

Isu nga apay koma nga agpulkoktayo iti inaldaw a panagbiagtayo no adda met Dios a kumarapetantayo?