Ti Daniw nga Elehia

Ti daniw nga elegy wenno elehia iti bukodtayo a sao ti maysa kadagiti porma ti daniw a mangkulding iti rikna ti asinoman a makabasa. Nauneg unay ti emosion nga inna iladawan wenno ipakita a namunganay iti leddaang. Kastoy ket ti linaon ken pakabuklan daytoy a porma ti daniw.

Ta ania ngamin aya ti elegy?

Daniw a mairuknoy wenno agpaay iti maysa a pimmusay wenno kadagiti pimmusay. Kas pakalaglagipan kenkuana wenno kadakuada.

Ditoy nga iyebkas ti kinaasino ti pimmusay, ti pakalaglagipan kenkuana, ken ti rikna (ti agdandaniw). Dayta ti pakabuklan wenno mangbukel iti daniw, awanen sabali pay.

Mabasa iti poet.org ti eksakto a definition daytoy: The traditional elegy mirrors three stages of loss. First, there is a lament, then praise for the idealized dead, and finally consolation and solace.

Pannakaisurat ti ladingit, sennaay, ilala ken dadduma pay. Iti nagsat nga irteng ti ekspektasion ket nagbunga metten iti nanabtuog a namnama. Daydiay namnamaen a nasayaat a pagteng ket nagtinnag a ngilangil. Ta ngamin, saanen a maaramid ti namnamaen a mangaramid iti namnamaen a napintas wenno sinirmata a banag.

Nupay kasta, idatag latta ti kaimudingan ti sinirmata babaen ti panangidatag kadagiti kualipikasion ti mangipatungpal koma iti namnamaen a banag. Idatag dagiti kualipikasion wenno talugadingna tapno maragpat koma ti ingpen.

Ngem saan a maigawid ti panagtulid ti darikmat. Dumteng ket dumteng latta ti pasamak a di magawidan. Awan ti sabali a rekursos no di awaten ti pasamak a kas kinapudno. A paset dayta ti sirkolo ti biag – a dumteng ti saan a namnamaen a banag a pannakasinga ti ingpen.

Nupay kasta, konsolasion laengen ken liwliwa ti lagip nga imbati ti nagawan. Ania dagita a lagip? Dayta ti idatag a daniw.

Daytoy ti kangrunaan a ramen wenno pakabuklan (contents) ti daniw: In modern poetry (since the 16th century) elegies have been characterized not by their form but by their content, which is invariably melancholy and centers on death. Ti linaon ti daniw a nakasentro ken patay ti kaskenan.

Idi un-unana, sagdudua a binatog (couplets) ti daniw, ngem iti panaglabas ti panawen, in-inut a nagbaliw ngem adda latta a maipresentar dagiti nadakamat iti ngato a  tallo a ramen.

Iti Iluko, adda metten dagiti sumagmamano a daniw a nabasatayo iti kastoy a porma. ngem kadagiti dadduma, imbes a lumtuad ti simpatia, rimmuar ketdi ti panagmurareg ta saan  a  nasurot ti ramen ti pakabuklan ti umno nga elehia.

Masurot koma ti rumbeng a linaon ti daniw uray no baliwan wenno i-modify ti pannakaisuratna. Ti konteksto wenno linaon ti daniw ti ad-adda a napateg ditoy. Masapul nga adda dagita tallo a banag a lawlawaten ken awanen ti sabali pay no di laeng dayta a banag. Daytoy ngamin ti inalat daytoy a daniw.

Nagdandaniwtayo kadi met iti elehia?

Wen. Apay ketdin a saan? Saantayo pay la idi nga agus-usar iti kompiuter. Makinilia. Tawen 2000 idi pinadastayo ti nangsurat iti Tagalog a daniw.

Iti pannakatay ni Fr. Conrado Balweg, SVD, nangputartayo met iti daniw, wenno insurattayo ti riknatayo, kapanunotan ken ekspektasion, sainnek ken liday maipapan ti ipapatayna. Dayta ti daniwtayo iti Tagalog.

Insubmitartayo iti Home Life Family Magasin ket napartak ti pannakaipablaakna.

Daytoy ti elegy wenno elehia a daniw.#