sinursuran-banner-sqSinursuranNi Jobert M. Pacnis

Ti Daniw69 Kas Romansa Dagiti Balikas

Sinursuran: Kolum ni Jobert M. Pacnis
(Maikadua a Paset)

Iti pakaseknan dagiti binatog, buklen ti daniw iti siam a binatog a nabingay ken nasaganad iti kastoy a bilang dagiti silaba: 6 – 9 – 6 – 9 – 6 – 9 – 6 – 9 – 9. Addaan met dagiti linia iti kastoy nga iskema ti rima (rhyme scheme): A – B – A – B – A – B – A – B – B . Gapu ta maibilang a maysa daytoy a nadang-as a panangpadas ken yaaddang, awan ti lugar dagiti “corny” a balikas wenno panagiyablat ken dagiti kadaanan a panagbalbalikas. Numan pay awan ti baro a balikas a maparnuay iti lubong ti panaginnayat, adda met baro a wagas ti panagiyalbat. Kayatna a sawen, uray gagangay dagiti balikas a mausar, no baro ken nauneg dagiti ik-ikutanda a paripirip ken konsepto. Gapu ta ababa laeng daytoy a daniw, saan a “napilpilit” dagiti usaren a balikas no di ket “napilpili” ken nasidek dagiti linia. Kasta pay a masapul a natarus, nasayud, naannayas ti panaguyas dagiti binatog, a no basaem wenno yebkasmo ti daniw, saan nga agbaled. Maisingasing pay ngarud ti panangted-pateg iti kinamusika (musicality) ti daniw babaen ti panagusar iti alliteration, assonance ken consonance.

Ngarud, no arep-epem ti naimnas a panaginnayat, kasta met ti maarep-epmo nga alimpatok iti pakabuklan ti Daniw69.

Iti panangpadasko ti mangputar iti sampol daytoy a daniw, naduktalak met no kasano ti karigatna. Pudno a makarit ti saririt ken sidap ti panunot ken rikna. Agkallautang ti imahinasion ken kararua iti no sadino a dimension ti panagalimpatok tapno matiliw ti kinapusaksak ken kinaimnas ti Daniw69.

Wen, dayta ti pakabuklan ti daniw69.

Ket idi impasigurado ni Prof. Ferdie ti addan madadaan a pangilibro kadagiti maputarmi a daniw,rinugianmin ti nagikur-it aglalo idi imparaman ni Alvarez iti umuna a putarna — ti Baimbain. Kastoy ti pakabuklanna:

In-inayad laeng/ Tiniliwko man ti bainmo/ Dika nagkutitem/ Tiniliwko ti arsagidmo/ Ti apros nagbadeng/ Ket siniitam ti nakemko;/ In-inayad laeng/ Indiayak bara ti kudilko/ Impabus-oymo ti bainmo.

Naglaka met, kinunkunak idi damo nupay addaan rima ken rukod (mangipakita ti kinadisiplina ti daniw). Ken nagababa pay a daniw— 69 a silaba laeng! Kabaelak dayta! Apay, kapuy?

Sinagadsadko ngarud ti nagputar. Ngem naduktalak a nagrigat gayam ti pumutar ti daniw nga addaan iti rima ken rukod. Abbaba pay ti tunggal binatog. Kasano a mairamen dagiti kayat a maiparikna, maipakita iti daniw?

Nupay no kasta, nakaputarak met laeng. Ti yanna nga adat, iti sangapulo ket tallo a ginulpik nga insubmitar, ne, ay, ta awan ti nagustuan ni Alvarez. AWAN kano dayta mutuality wenno panagsinnubad nga elementona. Ken nakapsut ti erotic sense nga ibikbikag dagiti paulok.

Daytoy man ‘tay immuna a naputarko a pinauluak iti Panagsukdal:

Iggemko ti sukit/ A nangsukdal ‘ti kebbakebbam/ Timmangadta’t langit/ Adda rimat dagiti matam / Nayaplag ti sipnget/ Nawagwag dagiti abagam/ Intinnagkot’ karit/ Sinippawmo, inagawaam/ Nagkinnittabta ‘ti saramsam.

Napakudkodak la ngarud a dina oras! Nagrigat la ngaruden ti nagbilangbilang iti silaba, nagipalaon kadagiti balikas ken namagkakaaweng kadagiti binatog, ngem awan latta ti pimmasa! Anian a kinaiget ti pagannurotan ti Daniw69!

(Adda tuloyna)