sinursuran-banner-sqSinursuranNi Jobert M. Pacnis

Ti Daniw69 Kas Romansa Dagiti Balikas

Sinursuran: Kolum ni Jobert M. Pacnis
(Maudi iti Tallo a Paset)
Ngem apay, nalakaak a sumuko? Saan pay laeng. Ket ala, surat manen, a, agingga nga addanto laeng makalusot, kinunkunak. Aglalo ket nakotaankami iti sagpipito agingga’t sangapulo a daniw!

Ngem dakdakesen dagiti simmaruno a nasuratko. Adda panagsinnubad, a, ngem brutal met kano unayen. Agpaparang wenno mailangaan a dagus ti “panaginnayat” iti daniw. Saanen a nakalemmeng. Awanen ‘tay suabe, nalamuyot a pannakaiparangna.

Kastoy ‘tay Igges:

Ay, nakariingen/ Adtoy, pagkaradapek kenka–/ Ap-aprosam laeng/ Nagkulikulibagtong, ayna/ Pinetpetam metten/ Binaliwak a pinapagna/ Pinetpetam manen/ Iniggamak dagita ima/ Ti kulibangbang urayenta.

Ad-addan ti panangkudkodko iti di met nagatel nga ulok. Nupay kasta, ginuantaak latta ti nagsuratsurat. Agingga a nakapalusotakon iti maysa, ti Dalluyon. In-inut, naalak met laeng ti pormula ti nasao a kita ti daniw.

Naabotko met laeng ti bilang ti daniw a masapul nga aramidek para iti pagtitinnulonganmi nga iruar a libro.

Kas met laeng iti ania man a sinurat, napalaus a ragsakko idi maputarko dagiti daniw69ko. Daytoy a ragsak, agbalbalin a paratignayko tapno itultuloyko latta ti agsurat. Ngamin, mamatiak nga iti daytoy a tay-ak, awan sarday ti panagadal, panangtakuat tapno makuna a mannuratka.

Padasem man met ti pumutar, ka-Sinursuran.

Ken tapno mananammo ti sabor dagitoy a dandaniw, kontakennak laeng. Sapulem ti naganko iti pesbuk wenno email-annak iti [email protected] wenno [email protected] Manamnama a mayalnag ti libro sadiay siudad ti Baguio ken iti kombensionto dagiti mannurat nga Ilokano iti Kamaynilaan inton Abril. Ngem rummuaren iti imprenta kadaytoy a bulan wenno inton Pebrero.

Saanka koma ngarud a paudi a mangrikna/makipagrikna iti alimpatok dagitoy a daniw nga am-ammo pay a kas Jomalva (manipud iti napagtitipon nga inisial ti nakapanunot kadaytoy a porma) iti internasional nga agpang. Wen, pudno ta nabasam. Nakadanonen daytoy a kita ti daniw iti social media babaen ti LinkedIn a naed dagiti mabigbigbig a mannaniw iti nadumaduma a pagilian. Ditoy, pinadas dagiti mannaniw nga Ingles, a kaaduan a taga-Europa, ti nangputar iti Jomalva. Ngem marigatanda iti rima, rukod ken kinaababa ti daniw a pangipeksaanda iti kayatda nga ibaga. Kiniddawda ketdi a mapalukayan koma ti pagannurotan. Ngem awan ti nakasiim kadayta 69 a silaba a kaatiddog ti daniw a mangiparparipirip iti kinaania ti daniw.

Gapu iti kiddaw, nabaliwan ti rima ti daniw iti LinkedIn. Imbes nga A-B-A-B-A-B-A-B-B, napagbalin nga A-B-A-B-A-B-A-C-C. Adtoy ti daniw ni Alvarez a Mimosa Pudica:

Icon of gentleness/ Slowly I pinch your innocence/ Leaves crease not in shyness/ Your touchiness tempts my inner sense/ I lure you in caress/ You prick my skin deeply intense/ Blood flows in your pinkness/ You absorb rippling breath in passion/ I’m bedewed by your nectar’s ardor.

Gapu iti pannakabaliw ti rima iti maudi a dua a linia, nagsasarunon dagiti mannaniw nga Ingles a nagiposte kadagiti daniwda. Ngem atiwtay’ ida ta saan a napalukayan ti pagannurotan iti lengguahetayo. Nabaelantayo a sinurot dayta.

Isu a kas nasaon, dika koma paudi a maaddaan iti kopia ti nasao a baro a porma ti daniw, ka-Sinursuran. Mabalinmon ti agorder tapno manayonan dagita koleksionmo a libro nga Ilokano. Ken adda isagutmo kadagiti gagayyemmo aglalo dagiti agturpos iti eskuela itoy a kalgaw.

Ur-urayenka, wen?#