TI GAYYEM NI ANGKEL ABE

Sarita ni Errol Liquicia Abrew

(Maudi a paset)

Ket maysa nga agsapa, naammuam a simmangpet manipud diay ayanda gayyemmo ti kasinsin ni Anti Pepay a ni Anti Susa. Awan duaduam a kimmalikagum kadakuada a no bilang ta makabaddekkanto met idiay, no mabalin ket makipagiankanto kadakuada uray apagbiit laeng.

“Dayta la gayam adi, a ket kabagianka met apay ketdin a saan?’ nakuna pay ni Anti Susa.

Kabigatanna, naestoriam kadakami a natagtagainepmo nga addaka kano idiay langit. Ket iti minuyongan ti gayyemmo, awan pulos ti nabaddekam nga uray la koma maysa a giwang wenno nagango a bulong wenno rugit iti panagkibinyo a nagpasiar. Kuna ti gayyemmo a nangpasangbay kenka iti dayta a paraiso a numan pay adda dagiti siit-alad ti nagbabaetanyo, dagitoy ket pinataud laeng ti agduduma a prayoridad dagiti hardinero tapno matungpal ti linteg ti nakaparsuaan. Ngem saanna pulos a marakrak ti nasinged a panaggayyem ken imbilangyon a paseten daytoy ti pannubok a mangpalagda daydiay a panaggayyem.

Agsalloyen dagiti tawen kadagiti abagam, angkel. Maris-asin aminen a buok mo. Ngem ketdi, saan latta a nagkupas ti pammatim a mangur-uray ti gayyemmo. Banag nga ad-adda a namagraem kadakam a kakaanakam. Kadagiti padam a beterano, manmanon ti makimitmiting diay grupoyo. Magsikunan a nanglipaten diay agila. Agila a nakapetpet ti kannawanna ti pana ken bulong ti olibo met ti kannigidna. Agila a naipantok diay dua a papelesmo a namasingked ti kinasoldadom. Ngem kenka, Angkel Abe, awan makaartap ti kinapatneng ti gayyemmo.

Addan idiay Saudi ni ‘insin. Kas pammasingked ti ritual dagiti nagnakemen a simut-simot, iti balbaliw a panagtarubo dagiti payakna a naladaman, adda metten pamiliana. Administration Manager ti maysa a freight forwarding company. Editor-in-Chief pay iti company newsletter da. Iti dayta nga agsapa naawatmo ti insigpitna a padamag diay Arab News.

Madama kanon ti pannakaipagna ti papeles dagiti kas kenka nga agbalin nga umili da gayyemmo. Adda impatulod ni ‘insin para iti filing fee ken aramatem a mangipagna kadigiday a papeles.

Saan a mailadawan ti ragsakmo, Angkel. Agsalsala dagiti nalitnaw pay laeng a matam ti pangarasaasen a panangibasam daydiay a damag kadakam amin a nagarimutong. Ket iti panaglabas dagiti aldaw, saan a mailibak a nagsubli ti pannakapnek iti kinataom. Immubing ti rupam, pimmaragsit dagiti widawid ken uddangmo iti pannakaipasngaymo iti maikadua a gundaway. Saan a mailibak kadakam a nangtrato a kasla sao a rummuar-umuneg-lapayag, agpayso gayam ti kuna diay gayyemmo: “saanminto a kalipatan wenno panawan dagiti nakirupak wenno makirupakto para kadakami” No nakaluaka man iti ragsakmo, nakitam nga uray dakami ket naluyaan met iti karayo a ti ammom saanen nga iyapros pay ti gayyemmo kadagiti agkubbon a bukotmo. Dimon napuotan a naidayyengmo tay kanta a kasinginen ti kararuam, kanta a rangtay met iti nagbaetanyo ken ni ‘insin:

When you’re down and troubled

And you need some love and care

And nothing, nothing is going right

Close your eyes and think of me

And soon I will be there

To brighten up

Even your darkest night

You just call out my name

And you know wherever I am

I’ll come runnin’ oh yeah

To see you again

Winter, spring, summer or fall

All you have to do is call

And I’ll be there yes I will

You’ve got a friend

If the sky above you

Should turn dark and full of clouds

And that old north wind begins to blow

Keep your head together baby

And call my name out loud

Soon you’ll hear me

Knockin’ at your door

You just call out my name

And you know wherever I am

I’ll come runnin’

To see you again

Winter, spring, summer or fall

All you have to do is call

And I’ll be there.

Ket kalpasan ti innem a bulan, dimo malipatan dayta nga aldaw: ti panagsapatam kas makipagili ti daga ni gayyemmo. Iti ipapanmo koma sadiay, inlemmengandaka da Anti Susa. Sabali a beterano a kailiantayo ti ingkuyogda. Uray la agburek ti dara da ‘insin ken Anti Doring a nakaammo iti dayta a kasla asuk a panagawid da Anti Susa. Dida ipagarup a daydi a kinapositibo ti panirigam iti masakbayan, kagudua’t siglon a tawen ti limmabas, daydi tagtagainepmo ket pimmudno. Nakitam kadakuada a no maminsan, naim-imbag pay gayam nga adayo ti panaggayyem ngem ti panagkabagian. Namrayam laengen ti immisem iti dayta a kinapaidam ken kinaimut, pammaneknek a saan a kanayon a ti dara ket napalpalet ngem danum. Nabainan ni Anti Pepay iti dayta nga inaramid dagiti kakabagianna ngem kunam a bay-anen ta saan met a matmaturog ti Namarsua.

Saan a nagbayag, adda nagawid a kakabagistayo nga immay nagbakasion. Ingkuyogdakan idi agsublida. Ket di umuna a suratmo, pinalabsam a kinuna a kinikilandaka pay laeng dagiti buaya idiay eropuerto iti maysa nakapannimid. Multam kano ti panaggianmo nga umili ditoy nakayanakam a daga ta gamin umilinakan ti daga ni gayyemmo. “Maestoriak laeng,” nakunam lattan, angkel.

Kasla dimi patien no kasano a ti kaatiddog dagiti tawen a panagur-uraymo ken ni gayyemmo, isu met tattan ti pardasna a mangidiaya kadagiti paraburna.

Innem itan dagiti iggemmo a papeles nga ibusonmo idiay Hayward ita nga aldaw. Petision da Anti Pepay, ken lima a pinutotmo: da ‘insin ken karaman aminen a pamiliada. Indariragmo diay suratmo a kinunam a no nakaurayka, makauraydanto koma met a makaumay met ditoy ayanda gayyemmo. Sakbay a mapugsat ti angesmo, no dimon mauray pay ti dadduma a karayo, umanayen daytoy kunkunam nga ipatawidmo iti pamiliam, lalo ken ni ‘insin Carlos a pammasingked ti pudno a panaggayyem. Ti gayyemmo a gayyemmonto ken gayyemnakanto latta met iti amin a panawen. “Saanminto a kalipatan wenno panawan dagiti nakirupak wenno makirupakto para kadakami” kasta ti kuna ti gayyemmo: Estados Unidos ti Amerika.#