Sarita: Ti “Gulayan Sa Paaralan” (Maudi a paset) | Tawid News Magazine - Weekly Ilocos News 📰

Ti “Gulayan Sa Paaralan” (Maudi a paset)

KALPASAN laeng ti makalawas, nagmatan dagiti garden-mi. Nakarangrangrang iti new site a yan ti kaaduan dagiti garden gapu ta awan ti nagpaudi a nagpinta kadakuada. Idinto nga iti old site a yanmi a Grado 8, bale dua a seksion laeng, ti laeng seksion ni Ma’am Liza a kaduak ti napintaan ti inyaladna iti dati a plantbox iti bakrang ti kuartona.

Ammok lattan no apay a kasta la unayen ti pamay-an dagiti kakaduak. Iti ngamin umuna nga evaluation dagiti garden-mi, ti pay laeng setup ti ma-judge-san. Saan pay dagiti maimula.

Napaisemak. Nagalistoda met gayam nga agpapintas iti garden-da idinto a kasla dida kayat idi damo. Arig makantiawan ti tunggal maysa kadakuada. Ta no adda baro nga idea, kasla koma ‘tay pinaaramid ni Ma’am Mayla a kalkalapaw iti suli ti area-na, pagtitinnuladanda. Sa idi nagpaaramid iti tarpaulin ni Ma’am Jona iti ruangan ti area-da, tinulad met dagiti dadduma.

Agin-innisemkami laeng ken ni Ma’am Liza no kasta nga agranakami nga agpatrabaho iti area-mi.

Nagkuenta ketdi ti panunotko. Mano a pinta ti nagbasutandan. Sa dagiti tarpaulin, lansa ken pingot a pinagpagatangda. Idinto a dakami, diay la one-fourth a de-dos a lansa ti nagastosmi. Dagiti immulami, nagtaud amin iti balay ta adu dagiti bin-i ken naisemiliak a dati sakbay pay a naglukat ti klase. Adu ngamin ti nateng a mulak iti aglawlaw ti balaymi.

Nupay kasta, saankami a nagpaudi kadagiti naimula. Ginennedko iti lima a paset, bale sagdudua metro kaatiddog, ti area-mi. Kammotit a mauggotan iti umuna a genned, sa sinaruno ti sili nga aruy-oy, sa tarong a berde ti bungana, sa okra ken karabasa iti ungtona iti amianan. Sumagpulo la a pinuon tapno napintasto latta ti buyana. Tapno di masayang ti inyaladmi a kawayan, minulaak iti puon dagiti darekdek, a naballaetan iti pinuon ti marunggay, iti bilunak. Bareng saanto a dadaelen ti angin-apgad.

BUKLEN ti prinsipalmi ken dagiti tallo a TLE a titser dagiti nang-evaluate kadagiti garden-mi idi nadanon ti naituyang a panawen. Kas ninamnamak, awan iti top 3 ti garden-mi nupay daytoy laeng ti addaan iti naimula a natnateng.

Awarding iti dayta nga aldaw a naigiddan iti selebrasion ti Bulan Dagiti Lengguahe. Permi a kutikuti da Ma’am Mayla, Ma’am Jona ken Ma’am Angie ta siguraduenda kano nga isuda ti mangabak. Sabagay, napintas ti area-da. Laeng ta medio adda feedback gapu iti panagsingirda kadagiti ubbingda iti amin a nagastosda a pinta, tarpaulin ken lansa.

Naiwaragawag dagiti nangabak. Ket anian a paragipig dagiti tallo a kaduami idi maawagan dagiti seksionda a nangabak. Agalalo idi awatenda ti premioda a kuarta. P2 000 ti champion; P1 500 ti maikadua idinto a P1 000 ti maikatlo. Nakalawlawa ti isemda a nagpa-picture iti stage. Permi met a panagsipsipat dagiti ubbingda ken dagiti nagannakda a dimmar-ay iti pasken ti pagadalanmi. Namataudan ngata ni sir iti kuarta a premio?

Naisaruno ti mensahe ti prinsipalmi.

“Umuna unay, kakabsat,” kinuna ni Sir Omar, “kayatko ti agyaman kadakayo a patgenmi a nagannak. Nakitak no kasano ti pannakikayammetyo iti pagadalantayo tapno agmata daytoy Gulayan-tayo. Nakaragragsak man ti riknak a nakaimatang iti pannakimaymaysatayo.”

Nagpapalakpak dagiti adda iti tallaong.

“Rugi pay laeng daytoy, kakabsat,” intuloy ni Sir Omar. “Sapay koma ngarud ta agtultuloy ti panagkakaduatayo.”

“Namnamaenyo dayta, sir!” adda nangipukkaw a maysa a nagannak iti sango. A sinaruno manen ti napigsa a palpalakpak.

“Alaek met daytoy a gundaway a mangsaludo kadagiti mannursuro iti anepda a nakipagmaymaysa iti proyekto. Nayon daytoy iti adun nga obrada ngem saanda man a nagpulkok. Silalag-an ti riknada a nangakem itoy a nupay idi damo, nariknk ti panagngudengda. Ngem anian a ragsakko idi in-inut nga agtungpalda.”

Nagkikinnitakami kadagiti padak a mannursuro. Kas man iti panagbukar dagiti sabong ti kayanga iti sango ti office ti panagbukar dagiti isemmi.

“Maragsakanak pay ta babaen itoy Gulayan, naikkaten a naminpinsan ti parikut kadagiti agkaraiwara a nagawangan a botelia. Mayat la unay ta inusaryo dagitoy a panangdisenio iti area-yo.”

Wen nga agpayso, nakunak iti nakemko. Iti kallabes, uray kasano ti panangbagbagami kadagiti ubbingmi, dida latta maliklikan ti mangiballeng lattan iti uray sadino ti nagawanganda iti sopdrink. Ita, awanen ti maiwarwara a nagbasioanda.

“Kadagiti saan a napagasatan, saan koma a daytoy ti mangtungday iti riknayo a mangpapintas pay iti area-yo. Opisialen a quarterly ti evaluation. Ket masapul nga iti sumaruno, addan makita a mulana tapno makuna met laeng a Gulayan sa Paaralan.”

“Yes, sir!” kinuna ni Sir Raq a maysa nga emcee. A sinegundaan pay dagiti nagannak.

“Alaek metten daytoy a gundaway ti agyaman iti maysa a grupo dagiti alumni a dida kayat ti mainaganan. Saan a limed kadakuada dagiti mapaspasamak ditoy pagadalan ta regular ti panagbisbisitada iti social media account-tayo. Kinapudnona, no ania ti pilitayo a nangabak, kasta met ti pilida idi makitada dagiti entry iti Facebook. Ket maragsakanak ta nagdisnudo a nangted iti kuarta nga impapremiotayo.”

Nagsisipat manen ti tallaong.

“Ti diak ninamnama, ti panangibagada a kukuada kanon ti papremio iti kada quarter.”

Nakaragragsak dagiti kaduak idi taliawek ida.

“Ita, adtoy nga iwaragawagko ti maysa pay a sorpresa a naggapu met laeng kadagiti nasao nga alumni,” imbitin ni sir ti panagsaona. Impalawlawna ti panagkitana. “Saan kano a maaklon ti riknada a di mangted iti special prize iti maysa nga entry.”

Napangangakami. Ania ngata dayta nga special prize?

“Nupay setup pay laeng ti napaglalabanan ita, nagtamedda kano man iti maysa nga entry ta daytoy ti nangyuna ken nangipakita iti makunkuna a Gulayan,” nakais-isem ni sir. “Gapu itoy, napagkaykaysaanda a yawatan daytoy iti aggatad iti lima ribu a pisos.”

Ad-addan a napangangakami.

“Awagak ngarud ita ti nagasat a garden… ti Zirconians Garden!”

Urayko la naapput ti rupak iti ragsakko. Ti seksionko ti ibagbaga ni sir!

“Congratulations, Sir Bert!”

Permi nga ikkis dagiti ubbingko.

“Dinayawda ti gardenyo, Zirconians,” intuloy ni sir. “Saankay’ kano laeng a nagpatingga iti setup. Kayatna a sawen, you are not after the prize. Ti panamagbalin iti area-yo a pudpudno a Gulayan ti inikkanyo iti pateg… ”

Napuotak laengen ti bagik nga uk-ukoden dagiti ubbingko a nangitulod kaniak entablado. Iti panunotko, addan pondo ti pampanunotek a proyekto para iti pagimbagan dagiti adbayserak. Nataliawko ketdi da Ma’am Mayla ken ti grupona a napilpil ti isemda.