Ti holdaper

Kolum: Tawid ti Kaputotan

Ni Errol L. Abrew

(Tuloyna)

 

Ni JesuCristo  kakabsat,  inrugina ti  mangasaba,  ket  nailansa ken natay sadiay krus tapno masubbot dagiti basbasoltayo. No mamatitayo kenkuana, maaddaantayonto met iti biag nga agnanayon.  Met?

Malagipko la ket dagitay agsingsingir iti buis idiay uneg ti templo nga inungtan ken pinagtalaw ti anak ti Dios gapu iti dida panagrespetar ken panagdayaw iti balay ti Dios.  Ita, adtoy ti maysa met nga uneg payen ti lugan ti pinilina a templo.

Diakon ingkaskaso dagiti simmaruno nga imbagbagana.  Ket idi taliawek dagiti pasahero, padak met nga iti ruar ti tawa ti nangibakalanda kadagiti matada.

Ne, kunam lan’ mabasana met ti pampanunotenmi amin.

Kakabsat, makitatayon dagiti pagilasinan nga asidegen ti yumay ti anak ti Dios, nga asidegen ti panungpalan daytoy a lubong.  Usto ti kuna ti Biblia, dagiti tattao nagbalinen a di-mangikankano, nasukir, managimbubukod, nauyong, bayolente, naimut ken (nakirmet),  naayat kadagiti linalasag nga aramid (inuuttog) ken nariribuken ti aglawlawtayo (addan 75 a political killings iti probinsiami).

Naklaatak idi idisso ti pastora ti maysa a sobre iti rabaw ti akinkannigid a luppok.  Ingkapilitan a kinuddotko ti sobre tapno di ipalais ti napigsa nga angin.  Nakudkodko ti teltelko nga awan met gatelna.  Sangsangagasut ti adda a kuartak sa ket sagbebeinte a nabukel a papel de banko ti insupli ti konduktor.  Minirak ti sobre.  Adda naiprinta iti asul a tinta.

Donasion para iti Kansion ni Solomon, ti paulona ket ti nayonna: tapno maprobitsiar ti pundo a maigatang kadagiti instrumento musiko a pagtokar para kadagiti agtutubo a saan nga agis-eskuela.

Nalagipko datay kaarrubami a barito.  Nagsardeng nga agiskuela iti kabassit met ti sueldo ti amana a kartero.  Nakuldeng ti kaunggak ta malagipko tay bettak ken paparaw a kutibeng ni John John.

Fernando Poe Jr. ti imak ti pardasna a nangasut manipud iti petakak ti maysa a Quezon.  Sipapardas ti  pastora a nangallawat iti sobrek a kaudian nga innalana ta addaak ngamin iti sango.  Mariparna la ket kadagiti matak iti panagbabawik, aglalo idi nadiparak a panay met nagtitimbukel ti linaon dagiti sobre.  Awan duadua, siak ti kabuslonan ti impisok.

Nagkararag manen.  Diak maaw-awatanen.  Agsubli koma ti kuartak, limed nga imbalesko iti kararagna. Ngem nabatad a nangngegko ti kinunana:  Bendisionan koma ti Apo dagiti naitulongyo.  Ta kuna ti Biblia a ti mangted a siaayat, aglaplapusananto ti isubli ti Apo.  Ali man la ngaruden.

Usto met a nagpaigid manen ti lugan.  Idi pay la a nadiparak nga addakam’ gayamen iti plasa ti siudad.  Sikakaranting a bimmaba ti pastora ket nagpukaw iti kapuskolan dagiti dimsaag.

KAPILITAN, pinagnakon ti turod nga umuli iti kapitolio.  Nahold-ap tay beinte a pagbayadko koma iti taksi.  Masaripatpatakon ti atep ti hostel. Kamkamatek dagiti angesko idi adda simmardeng a lugan iti batogko.  Tinaliawko ti nagpukkaw.

Nairupaak, ti sigud a kaopisinaak.  Nakakotse gayamen. Holdaper met daytoy a commissioner kadagiti office, medical supplies iti aramid a kinukusit ken kinukunniber.      Indiayana ti iluluganko.  Sidadayawak a nagkedked, inseniasko nga asidegen ti danonek.  Gimmilap ti bimmalitok a relona iti panagwinnagismi.

Nadarugsoyakon iti ling-et.  Uray la agarimasa ti paniok.  Usto met a sabatennak ti guardia.  Sidadayaw a nangammo iti rantak.

A, e, kua sir, naipostpone ti miting.  Adda emergency a napanan ni bokal idiay Manila tattay parbangon.  In-textdan sa kaniayo, sir?

Nalagipko datay nabatik a selponko.

Shit, naipigsak a bulon ti panagkurenren ti muging ti guardia a naklaat. Diak napupuotan,  pinagnak manen ti dalan nga agpababa.#