Ti Ina nga Ili, inlansada iti krus (Maudi a paset)

4.“Mawawak”(Juan 19:28)

Mawawak. Mawaw iti diro ti uyokan nga inugmokan dagiti kaarruba. Ta dagiti kuting idi a tinagtagibi isu met itan iti tigre a dumawdawatan iti duol ken papanan pakidiguan kadagiti murkat ken arasawda. Isuda dagiti kuting a nagbalin a tigre. Ngem ti Ina nga Ili, isu ti tigre idi a nagbalin a mamirmiraut a kuting.

Mawawak. Makawaw a denggen dagiti paulit-ulit a misterio dagiti nangisit nga anniniwan. Awan ti kaipapanan dagiti litania ti salbar.

Saanen a matay dagiti  puraw a rabii.

Danum! Danum! Danum… Ngem dara manipud iti tinakaw a kopita ti maisubo, nga inton makaanges iti apagapaman bayadan met laeng iti dramdram a dara.

Makawaw, makawaw ti panaguray iti panagsubli dagiti baliodong a  panunot.

Awanen ti danum. Awanen ti mainum… Mawawak…!

5. “Ibagak kenka daytoy: ita nga aldaw, makipagyankanto kaniak idiay Paraiso” (Lucas 23:43)

Napasamak daytoy idi pinabpabainan ti maysa kadagiti kriminal ti nailansa nga ili, ket kunana pay: “Saan kadi a sika ni Cristo? Isalakanmo ngarud dayta bagim ket isalakannakami met!”

Ngem binabalaw ti kaduana a kriminal a nailansa: Kuna daytoy: “Awan kadi a pulos ti panagbutengmo iti Dios?  Agpapadatayo amin a madusdusa. Rebbengna nga agsagabata gapu iti inaramidta. Ngem awan dakes nga inaramid daytoy a tao. Kalpasanna, kinunana ken Jesus,

“Laglagipennak, Jesus, inton umayka a kas Ari.” Ket insungbat met ni Jesus: “Ibagak kenka daytoy: Ita nga aldaw, makipagyankanto kaniak idiay Paraiso.”

Wen, tumaud no kua dagiti di makabael a mangbuybuya iti Ina Nga Ili a nakabayog iti krus ket gamdenda nga isalakan. Mangirasda. Iwarasda dagiti lampara. Paraniagenda ti aglawlaw. Ngem maawaganda iti kriminal.

Apay, maibilang kadi a panagtakaw ti panangisubli iti kukua ti Ina Nga Ili? Kaano pay a nagbalin nga aramid a krimen ti panangalaw iti malmalmes? Kaano pay a nagbalin a krimen ti panangpadagus kadagiti naamitan iti dalan?

Pakanen dagiti mabisin, painumen dagiti mawaw, saan aya?

Adu dagiti naawagan a kriminal a nangisalakan kadagiti agtutuok; a nangited kadagiti subo, saan laeng nga iti bituka no di pay iti utek. Adu dagiti nangriing kadagiti agam-ammangaw ken mabatbatibat.

Ngem kalpasan ti amin a gandat ti panangisalakan, napasagda  nga awanan iti kalabanlaban iti pagbababakalan dagiti prinsipio ken mulinaw a keddeng.

Iti Brgy. Tablac, ti rangtay nabangon

nagamayan iti adu a dara ti pundasion

tapno natibker ti illusion dagiti gandiong

ken kurimaong iti matemtemtem a gimong.

Di mapnek panagparti dagiti kumaw ta salaan

ken kantaanda pay panaggamsaw

Idatonda iti rangtay amin a nagtagisilaw

Nasalawda ni Kapitan Berto ket nagpukaw!

A, ti silaw! Ti silaw, tinakkabanda iti salop. Nanglangeb ti aglawlaw. Immadu ti saibbek ken saning-i. Adda marka iti muging iti kuddot ti rabii.

6. “Nalpasen.” (Juan 19:30)

Kalpasan a naramanan ni Jesus daydi naalsem nga arak, daytoy ti imbagana.

Nalpasen. Nalpasen a nailansa iti krus ni Ina Nga Ili. Ngem awan ti pannakalpas ti agnanayon a puni dagiti tiri. Adu ken adu a panagparti. Ta agluplupias met ti siliasi nga ikurkurimed nga ibay-on dagiti para luto iti kusina ken dagiti adda iti uneg ti kusina, segun dagiti tumanabutob a kaarruba. Ngem mapili dagiti mabsog. Ay, anian nga abunaw ti sagana iti punsionan dagiti didiosen.

Nalpasen a nailansa ti Ina Nga Ili…

7. “Ama, kadagita imam, yawatko ti espirituk. (Lucas 23:46)

Ama, Ama a nainlangitan, yawatmi ti espiritu ti ilimi nga inlansada.

Siksika laengen ti ammomi a kamangmi itoy a sagabami…

Adu dagiti nakasarukang nga atang a balikas a bayad dagiti nakailaw-anan, ngem saan a makapudno dagiti lualo ken panagbayad.

Nabileg la unay dagiti marmarna ken dagiti nasalapon iti igid ti alad ken iti bunton ta nalibeg latta ti danum ti inanger a bagbagutot.

Nagibitin ken nangiplatito iti paradipad dagiti tawa, ngem saan a nagbuteng no di ket kinatawaan dagiti aswang dagiti pinitpit a bawang.

Sinippaw dagiti atros dagiti naiwarsi a bagas iti sumipnget. Inuttotan dagiti barkes ti kumalkalawikiw nga asuk dagiti anglem.

Napirpirsayen ti nagmurengan nga ibautbaut iti adigi, ngem di maalaw ti kararua ti Ina Nga Ili nga intubongda iti sangalawas a kawayan.

Wen, dagiti lallakay nagidulinda iti nagluposan ti uleg tapno lumukmeg ti pitaka. Naglabusda pay a nagitukit tapno nabungbunga dagiti mulada.

Insapitda ti umuna a pukis ti buok kadagiti libro tapno masirib ti anak. Ammoda ti kaipapanan tunggal taraok iti parbangon. Iti laeng inda panagtangad, ammodan ti kaipapanan ti tayab dagiti ulep, ti kiray ken panagbabatog dagiti bituen, ti kuldit ti angin. Ammodan ti kaipapanan no nababa ti tayab dagiti tuwato ken panagpalaud dagiti kannaway, iti panagpasurong dagiti ipon…ken adu pay…

A, mamasirib dagiti lallakay, a saan a natawid dagiti kaputotan a nangilansa iti Ina Nga Ili…