Sarita para Ubbing: Ti kararagsakan a Paskua iti Pammoboan (Maudi a paset) | Tawid News Magazine - Weekly Ilocos News 📰

Ti kararagsakan a Paskua iti Pammoboan (Maudi a paset)

Nagkukuyog da Santa Claus, Angkel Teody, Lakay Sabas ken dagiti ubbing a nagturong iti purok. Adayoda pay bassit ngem umayamuomen dagiti naidasar a taraon iti atiddog a lamisaan a kawayan. Permi a panaglagtolagto dagiti ubbing.

“Meri Krismas!” kunkunada.

Ngem sinabat ida ni Ama Anton. Malaglagawan ti langana.

“Apay, uliteg?” sinaludsod ni Angkel Teody kenkuana.

“Mapukpukaw ti maysa kadagiti ugsa,” insungbat ni Ama Anton.

“Ania?” uray la napabullad ni Lakay Sabas.

“Adda laeng itay,” kinuna met dagiti ubbing.

“Ho-ho-ho! Baka adda laeng napananna,” kasla awan dadanagan ni Santa Claus. “Adda laeng dita asideg.”

“Awan, Apo Santa,” kinuna ni Ama Anton. “Sinawarmin… itay pay!”

Kinita ni Santa Claus dagiti ubbing.

“Kasano pay ti Paskuami, Apong Santa no mapukpukaw metten ti maysa kadagiti ugsam?” sinaludsod dagiti ubbing kenkuana.

“Saankayo nga agdanag. Masapulantayo daydiay.” Dagus nga inawagan ni Santa Claus dagiti nabati nga ugsa. Nawarwar lattan dagiti galutda ket nagliliniada iti sanguananna.

Napamulagat met lattan dagiti ubbing.

“Sapulenyo ni Cupid,” imbilin ni Santa Claus kadagiti tarakenna.

Dagus a nagtungpal dagiti nabilin nga ugsa.

Simmaruno met dagiti dadduma a nataengan a nagsapul.

Nagturong ni Santa Claus iti karuahena. Sinaruno dagiti lumugar iti panangiyuna dagiti ubbing.

“Ladingitenmi ti panagpukaw ti maysa kadagiti tarakenmo, Apo santa,” kinuna ti maysa nga ina.

“Saanyo a basol,” naisem latta ni Santa Claus. “Nagbayanggudaw laeng siguro ni Cupid.”

“Ngem kasano koma, Apo Santa, ket nakagalut?”

Napanunot met ketdin dayta ni Santa Claus. Sa laeng agwarwar ti galut dagiti tarakenna no itanamitimna daytoy.

Iti suli ti panunotna, ammonan nga adda nangloko iti maysa kadagiti ugsa. Ngem saan laeng a kayat nga ibuksilan ni Santa Claus.

Maysa oras ti naglabas. Ngem awan pay dagiti nangsapul ken ni Cupid. Mangrugin nga agkaradap ti sipnget.  Madanaganen dagiti lumugar. Malidayan metten dagiti ubbing ta amangan no di matuloy ti namnamaenda a naragsak a Paskuada.

Pangyaw-awanda iti danagda, nagkakanta dagiti lumugar kadagiti ayug-Pamaskua. Kasta met dagiti ubbing. Maay-ayatan ni Santa Claus a mangbuybuya kadakuada iti baet dagiti sinulbong a silawda ta nagsaknapen ti sipnget.

Awanen ti makalagip a sumango kadagiti naisagana. Yur-urayda lattan ti isasangpet dagiti nagsapul ken ni Cupid. Aglalo ket adu pay ti papanan ni Santa Claus a pagibunongan kadagiti regalona. Maysa oras pay sa simmangpet dagiti walo nga ugsa ni Santa Claus. Ngem awan ni Cupid a nasapulanda. Simmaruno a simmangpet dagiti nagsapul met a lumugar. Ngem kaskasdi a dida nasapulan ni Cupid.

Saan a mailadawan ti liday kadagiti taga-Pammoboan. Awan ti nagtimtimek kadakuada. Mabainda la unay ken ni Santa Claus. Kasanon no agpauyo ni Santa Claus kadakuada ket agbanag a naliday amin a Paskua a dumteng iti lugar?

Ket narikna dayta ni Santa Claus.

Addada iti dayta a kasasaad idi sumungad ni Ikit Imelda.

“Ania ti kaaddana dayta?” nagkikinnita dagiti lumugar.

“Ammok payen!”

Agnaed ngamin ni Ikit Imelda iti puon ti Bantay Timmapaya iti daya sumurok kumurang maysa a kilometro iti purok. Maymaysana nga agbibiag dita. Natay daydi asawana a tinukkaw ti uleg. Sa nadisgrasia ti dua nga annakna iti baybay. Nakaranada iti makunkuna a tribunada ket awan ti gasatda.

Gapu iti dayta, nagbalin a naliday ti biag ni Ikit Imelda. Nagpuppupok lattan iti kalapawna. Idi kuan, pabasolendan nga isu ti puon dagiti saksakit iti lugar. Adda kano “magic-na.” Ammona kano ti agtamay!

Saanen a naterred ni Ikit Imelda ti pammabasolda kenkuana. Inkeddengna ti mapan laengen agnaed iti kalkalapaw iti puon ti bantay nga inaramid idi ti asawana a paggiananda no mapanda aganup. Sipud idin, timmalna metten dagiti kalugaranna.

“Pakawanendak koma,” pagam-ammuan ta inayanug-og ni Ikit Imelda.      “Dakkel ti nagbasolak kadakayo…”

“Aklonenna ngatan ti pananggamgamotna kadatayo!” kinunada iti maysanmaysa a di nakalusot iti panagdengngeg ni Santa Claus.

“Siak ti nangilibas iti ugsa ni Apo Santa,” imbaningrot ni Ikit Imelda. “Kayatko ngamin a di matuloy ti ragragsakyo…”

“Apay a naaramidmo dayta, kaka?” sinaludsod ni Ama Anton.

“Manon a Paskua malmaldayak iti pagnaedak. Awan man laeng ti makasarsarita ken mangsarsarungkar kaniak. Maawatak dayta gapu iti impatoyo nga aramidko… nga awan met ti kinaagpaysona.”

Nagkikinnita dagiti taga-Pammoboan. Dumdumngeg latta met ni Santa Claus iti karuahena.

“Gapu itoy, napanunotko a no alaek ti maysa kadagiti ugsa, saan a matuloy ti ragragsak ket agpapadatay laengen a naliday ti Paskuana,” arig saanen a mayangad ni Ikit Imelda ti rupana. “Ngem nagbiddutak gayam. Saan a maaklon ti bagik nga agliday ti sibubukel a lugar gapu laeng iti panggepko a panagibales. Ad-adda a rimmingbaw ti ayat iti pusok.”

“Yanna ngarud ita ti ugsa?” sinaludsodda kenkuana.

“Imparngedko iti puon ti mabulo dita alog…”

Pinardasan a napan kinita dagiti amma ti nasao a disso. Ket pudno, adda dita ni Cupid a nakaturog pay ketdin.

Permi a ragsak amin nga agindeg idi addan ni Cupid.

“Ho-ho-ho! Meri Krismas!” inkablaaw ni Santa Claus. “Ituloytayo ngaruden ti ragragsak. Ngem sakbayna, kayatko a mangngegan kadakayo, annakko, ti panangpakawanyo koman ken ni Imelda. Ta ayat ngarud ti bugas ti pannakayanak ti Mannubbot.”

Natukay ti rikna dagiti agindeg ket inar-arakupda ni Ikit Imelda.

“Kiddawek koma pay kadakayo,” intuloy ni Santa Claus, “ti panangawatyo met laeng kenkuana a makipagtalinaed kadakayo ditoy. Ta pudno man met a narigat ti agmaymaysa…”

“Wen, Apo Santa!” indirdir-ida.

Uray la napalua ni Ikit Imelda iti ragsakna. “Agyamanak, Apo Santa,” insaibbekna. “Pakawanendak koma iti naaramidko.”

“Dinalusannaka ti bukodmo nga aramid,” kinuna kenkuana ni Santa Claus.

Ket nagallangugang dagiti nadumaduma nga ayug-Pamaskua nga imbir-it dagiti lumugar.

Rinugian a dagus ni Santa Claus ti nagibunong iti regalo. Anian a ragsak dagiti ubbing ta isu met nga agrangrang iti kasta unay ti karuahe idi awatenda ti regaloda.Kalpsanna, sinangoda ti naisagana a taraon. Nalapunos iti ragsak ti puspuso dagiti taga-Pammoboan. Ket daydi ngatan ti kararagsakan a Paskua iti lugar! Ket inkarida a pagsaknapenda ti ayat nga insuro kadakuada ni Santa Claus!