Ti Karayan Immuleg, ti tangke ti danum ken ni Lakay Salvador (Maikadua a paset)

Immisem ni Macario. “Saankayo kadi a mailiw itoy anakyo, ‘Tang? Ngem ala, sungbatak ti saludsodyo. Adda ita ditoy ti grupomi ta ti kompania a pagpapaayak ti nangabak iti bidding  iti proyekto a mairusuat iti ilitayo a Dalton.” Impug-awna ti asuk ti sigariliona.

“Ania a proyekto, insan? Kamaudiananna, isardeng sa met laengen ni Mayor Brugudo Cumacaot ti agkurakot. Sabagay umadani manen ti eleksion,”  insampitaw ni Ayos.

“Iti mabiit, maipatakder ti Dalton Water District ket ti Karayan Immuleg ditoy Barangay San Antonio ti pakaipasdekan ti pannakapuso ti proyekto nga aw-awaganda iti infiltration gallery. Madalusan ti danum manipud iti Immuleg sa maidanon kadagiti balbalay babaen kadagiti tubo. Agpateg iti 250 milion a pisos ti nasao a proyekto,” atiddog a palawag ti inhiniero.

Kasla adda siit  a nangsiprad iti karabukob ni Lakay Badong. Nagkutikuti ti bibigna ngem awan simngaw a balikas. Ti Karayan Immuleg ti biagda. No awan daytoy, matay metten dagiti taltalonda. Ita, kayatda a pakibiangan?

“Napintas a damag, saan kadi, ‘Tang? Adu ti maaddaan iti trabaho ken kumita pay ti kaban ti ili,” kinuna ni Macario. “Madamdama laeng, addanton da Mayor Cumacaot tapno umayda  iwaragawag ti napintas a damag.”

“Saan a napintas a damag dayta kadakami nga agtaltalon, insan,” nadagsen ti tono ti boses ni Ayos. “Sinalakniban dagidi appotayo idi punganay dayta a karayan tapno agtalinaed a nabiag para kadatayo a kaputotanda. Ita, kayat a dadaelen ken pagnumaran dagiti anak ti sal-it a politiko?”

“Rumbeng koma a pagtalinaedentayo daytoy tapno addanto met sublaten dagiti annakyo,” inkanunong ni Lakay Badong. Dadakkel ti angesna.

“Ta apay a seknannakayo dayta a banag, insan, ‘Tang? Ilakoyon dagiti talonyo ket umaykayon iti siudad. Nasayaat ta addaka a kadua no kua ni Tatang.”

“Barok, tapno ibagak kenka, saan a ti pannakailako dagiti daga ti solusion tapno kunam a di maapektaran dagiti talontayo. Mailako man, agproblemanto met ti mangsublat no awanen ti maawid a danum iti karayan.”

“Ala, itinto sanguanan ni Mayor Cumacaot ti pangiyablatanyo kadagita a sentimientoyo,” pinangputed ni Macario iti saritaan a bulon ti panagturongna iti arubayan.  Nabati ti amana ken ni Ayos nga agngilngilangil.

Agalaunan ti malem idi sumangpet ti bunggoy ti mayor iti sentro ti San Antonio. Napartak dagiti askawna a nagturong iti nairanta a pagtugawanna iti sango. Adda iti abayna ni Macario. Umarimbangaw dagiti bumarangay.

Intag-ay ti mayor ti imana tapno agtalna dagiti lumugar.

“Kakailian, nupay adu ti pakakumikoman toy nanumo a mayoryo,  personal a dumatagak kadakayo tapno umayko ipadamag a napili ti Karayan Immuleg ditoy barangayyo a San Antonio a pakaipasdekan ti pannakapuso ti proyekto a mairugin iti mabiit.”

“Ania kadi dayta a proyekto, apo?” maysa ti nagsaludsod kadagiti naitallaong.

“No la ket pagsayaatan, sidadaankami a mangsuporta, mayor. Ngem no pakaidagelanmi a mannalon, sisasaganakami a mangirupir iti saanna a pannakatuloy,” kununa ni Lakay Badong.

Napamulagat ti mayor. Nupay kasta, naallangonna met la daras ti riknana ket inisemanna ti lakay. Ammona nga ama ni Macario daytoy.

“Adda ditoy ti patanor ti San Antonio, ni Engineer Macario “Mac” Pegges. Isu ti mangilawlawag no ania daytoy a proyekto. Mac, please,” tinaliaw ti mayor ni Macario.

“Appo a kabaranggayak, naragsak toy numo toy biang a makasangokayo ita ditoy. No nadlawyo, adda dagiti tattao a nagsublisubli iti mismo a Karayan Immuleg iti napalpalabas nga aldaw. Taok iti MST Company dagidiay.  Kas resulta ti panagsukisokda, mayataday unay ti danum ti karayan para iti maipasdek a Dalton Water District. Maipatakder iti mismo a Karayan Immuleg ti infiltration gallery. Babaen ti makina, maipagna kadagiti dadakkel a tubo ti danum a maidanon iti tunggal balay,” impalawag ti inhiniero.

“Di kad’ met maapektaran no kua dagitoy talonmi, barok?” sinaludsod ti maysa a baket.

“Adda talaga epektona, nana, ngem isu ngarud nga inadal a nasayaat ti technical group dayta a banag. Inrekomenda ti grupo a tallopulo la a porsiento ti danum ti maala iti karayan.”

“Ammoyo met gayam nga adda epektona sayo pay la ituloy.  Maysa pay, kasano a makasiguradokami a kasdiay laeng ti kaya a sultopen ti makinariayo ket awan met ti pakakitaan?” kinuna ti maysa a lumakay.

“Appo, naipasan daytoy a banag iti konseho ti ili isu a legal ti maaramid a proyekto,” imballaet ti mayor.

“Naaprobaran nga awan ti konsultasion? Awan ti public hearing nga inatendaranmi a direkta a maapektaran,” kinuna ni Lakay Badong. “Ammoyo met a saan la a ti San Antonio ti agkamtud iti danum a pagtalon no maipursige dayta a proyekto no di pay dagiti kabangibang a barbarangay a mangus-usar iti danum ti Karayan Immuleg.”

“Dakayon a mismo ti nagkuna a maapektaran dagiti taltalonmi. Ken insan Cario, ti ammomi, sika ti mangisakit kadakami ta ti karayan Immuleg ti naglanglangoyam idi ubingka. Kunam idi a nasken a matagiben ti pintasna. Iti pangngayonmo iti proyekto, mabalin a maawan dayta a pintas. No awan ti Immuleg, matay metten dagiti talon. Saankamin a makapag-second crop,” imballaet ni Ayos.

(Adda tuloyna)