Sarita: Ti Karayan Immuleg, ti tangke ti danum ken ni Lakay Salvador (Maikatlo a paset) | Tawid News Magazine - Weekly Ilocos News 📰

Ti Karayan Immuleg, ti tangke ti danum ken ni Lakay Salvador (Maikatlo a paset)

“Sidadaan ti DWD a mangbayad kadagiti maapektaran a taltalon no la ketdi mapaneknekan a gapu iti proyekto a kumirang ti apit. Isu dayta tay aw-awaganda iti damage fee. Ket no talaga a maabbatanto latta ti karayan, mabalinto met nga isardeng ti operasion ti water district. Kinpudnona, agbayad pay ti Dalton Water District iti lima a sentimo iti kada metro kubiko ti danum a maalada iti karayan. Kalpasan ti lima a tawen manipud pannakairugi ti operasion, ingatodanto pay ti bayadna tapno agbalin a dies sentimo tunggal metro kubiko. Taga-San Antonionto dagiti agtrabaho, isu a mangidateng met daytoy iti adu a pagsapulan,” kinuna ni Macario.

“Ta apay pay la nga iyuray a maabbatan ti karayan? Ken dagita kunam a trabaho, temporario laeng dayta ta no malpas ti proyekto, awanto met dagitan. Para iti agnanayon ti pagtaktakderanmi ta kayatmi a makitanto pay dagiti maiyanak a taga-San Antonio ti ngayed ken pintas ti Immuleg,” nagsao manen ni Ayos.

“Wen, saanmi nga ipalubos a marames ti Karayan Immuleg,” inyarimbangaw dagiti bumarangay. “Idatagmi daytoy iti hunta probinsial!”

Nadagsen pay laeng ti rikna ni Lakay Badong uray idi agsangodan nga agama iti lamisaan tapno mangrabiida. Managsaggaysa ti suboda idinto a nagari ti ulimek iti nagbaetanda. Ti  met laeng lakay ti nangburak iti daytoy.

“Diak impagarup a maaramidmo ti kastoy, Macario,” kinuna ti lakay.

“Tang, no mairingpas ti proyekto ket agballigi ti operasionna, agdidiaya metten ti promosionko. Ditoyen a maipakitak ti inalatko kas inhiniero. Nasayaat ta makapagpatangta a kastoy ita, ‘tang. Ammo ni mayor a sika ti dadaulo dagiti mannalon ditoy ket respetarenda ti aniaman a desisionmo.”

“Ania ti kayatmo a sawen, Cario?” pinerreng ni Lakay Badong ti anakna.

“Tang, saanka a tao a nayanak idi kalman. Ammoyo ti kayatko a sawen. Nangted ni Mayor Cumacaot iti gudua’t milion tapno kumbinsirenkayo a mangipalubos iti pannakatuloy ti proyekto. Sisasagana kan’ pay a mangted iti sabali pay a kagudua’t milion para kadakayo, kasukat ti panangguyugoyyo kadagiti kalugaran.”

“Diosko, Marta, kitaem kad’ toy bungam,” uray la nagugis ti lakay. “Ania ti pangipagpagarupam kaniak? Wen, awan ad-adalko, anakko, ngem saan a magatadan iti uray mano a riwriw a pirak ti  prinsipiok. Daytoy la ti kakaisuna a maipagtangsitko idinto a sika a nangato ti adalna, um-umsienda ti likudam ta mabaybayadan ti pagtaktakderam. Us-usarem a mangidadanes iti padam a tao ti kinangato ti adalmo.”

“Saanko a maipangan dayta kunkunayo a prinsipio. Praktikal ti biag itan. Ar-aramidek daytoy tapno saanto nga agbisin ti bangonek a pamilia.”

“Talaga a sabalikan, Cario. Diakon makita kenka daydi anakko a napnuan idealismo,” napangilangil ti lakay. “Tapno ibagak kenka, saanmonto a maitugot iti tanem ti adu a pirakmo. Ngem ti dayaw ken dignidad, addanto latta a nakakabit iti naganmo. Dispensarem ngem diak pay la kayat a makita dayta panagruprupam ditoy balay.”

Awan naaramidan ni Macario no di pumanaw. Kabisadona ti amana. Immulog ket linugananna ti kotsena. Pinagandarna ket nainayad a rimmuar iti inaladan.

Rimmuar met ni Lakay Badong kalpasan a naidalimanekna ti nangananda. Immuna a pinagunianna ni Ayos ta isu ti kaasitgan.

“Agpapatangtayo man, barok. Sukonem bassit dagiti kakadua ta pagsasaritaantayo ti nasayaat nga aramidentayo.”

“Wen, uliteg. Dita balayyo ti pagummongan?  Sige, iyuraynak la ditan ta ayabak ida.”

Saan unay a nabayag ti panaguray ti lakay. Madamdama, sumungaden dagiti kalugaranna.

“Naimbag a rabiim, kaka,” inkablaawda.

“Kasta met kakabsat. Pinaayabankayo ken Ayos tapno pagpapatangantayo ti panangsalaknibtayo iti Immuleg. Kinaagpaysona, mabainak kadakayo iti inaramid ti anakko.”

“Ania ti mapampanunotmo nga aramidentayo, kaka?” naisaludsod.

“Apagisu no bigat ta Martes, session ti hunta probinsial. Mapankaminto ken ni Ayos tapno idatagmi ‘toy problematayo. Kabayatanna, ammuek man met ti kaririknayo ita, kakadua.”

“Umuna, agyamankami iti panangisakitmo ti Karayan Immuleg. Ket ammuem nga addakami iti likudanyo iti aniaman nga addang a mapanunotmo,” nakuna ti maysa a panglakayen.

“Ala, nasayaat no kasta, ammak ken addingko,” binagi ni Ayos. “Ngem no didatayo ipangag, isaganatayo koma ti bagbagitayo para iti sigurado a nadara a rinnisiris. Nakasaganakayo kadi?”

“Wen!” impatalged dagiti mannalon.

“Awagantayo ti grupotayo iti Timpuyog dagiti Umili a Salaknib ti Karayan Immuleg.”

Nasapa pay laeng ngem addan iti kapitolio dagiti aguliteg. Alas nuebe ti rugi ti session ket saggaysan a sumangpet dagiti bokal. Kuna itay ti sekretaria ti hunta nga iyurayda ti pannakaawagda.

Idi kuan, addaytan ti bise gobernador.

“All rise.”

Kalpasan ti ababa a kararag, nagsao ti presiding officer.

“We are hereby suspending the internal rule to accommodate our constituents from Barangay San Antonio, Dalton,” intikkol ti presiding officer ti kayo a maso iti sangona.

Nagpatengnga ni Lakay Badong. Pinatitna ti mikropono sa nagsao.

“Naimbag a bigatyo, agkakadayaw a miembro ti hunta probinsial. Nakaumaykami gapu iti problema ti lugarmi nga umay isangbay ti proyekto ti Dalton Water District. No mapatuloy ti nadakamat a proyekto, saankami la ketdin a makapamindua nga agmula. Malaksid iti dayta, magamsaw pay ti kinainosente ti Karayan Immuleg a nabayag a tinartaripato, inil-ilalaan dagidi pay laeng apongmi. Tulongandakami kadi tapno saanen a maituloy daytoy a proyekto a kunami a mangted iti didigra saan la nga iti Immuleg no di ket kadakami a mannalon,” kinuna ni Lakay Badong.

          (Adda tuloyna)