Ti Karayan Immuleg, ti tangke ti danum ken ni Lakay Salvador (Maudi a paset)

TIMMAKDER ti maysa a bokal.

“Apo Pegges, apay nga itakayo la nga agriri ket ipakita ti rekord a naaprobaran daytoyen iti iliyo.”

“Dayta ngarud, apo, ta awan man la ti konsultasion a napasamak sakbay a naaprobaran,” insungbat ni Lakay Badong.

“Imposible dayta ibagbagam, tata,” kinuna ti bise gobernador.  “Sa ket maysa para iti pagsayaatan ti ili a Dalton ti pannakaipasdek ti proyekto isu nga iyendorso ti hunta probinsial ti pannakatuloyna.”

Saan a nakauni ti lakay. Nagdumog ket inyal-aludoydan nga aguliteg ti rimmuar iti session hall.

Napalabas ti dua nga aldaw idi masaripatpatan ni Ayos dagiti trak nga agturong  iti karayan.

Napno dagitoy iti dadakkel a tubo. Binayabay ida ti tallo nga armado a lalaki. Iti likud, sumarsaruno ti lugan ni Macario.

Daras a naummong dagiti mannalon. Kaaduan ti nakasalikad iti talunasan.

“Ania ti kayat a sawen daytoy, Cario?” sipupungtot nga inlaaw ni Lakay Badong.

“Idiskargadan dagiti tubo. Apagisunto a marugian inton malpas ti piesta’t natay,” insungbat ni Macario.

“Diyo ibaba dagita!” naturay ti timek ni Ayos.

“No agpilitkayo, uray innibus!” inriaw met ti dadduma.

“Hoy! Dika makibiang no dimo kayat ti kumamakam iti piesta’t al-alia, he! he!” impasarang ti maysa kadagiti armado a lalaki ti igamna ken ni Ayos.

“Alan, insan, ipalubosyon a maibaba dagitoy ta dikay manaktak,” kinuna ni Macario.

Awan ti nagsao. Madlaw a medmedmedan dagiti mannalon ti pungtotda. Nakaiggem dagiti imada iti apputan ti talunasan .

Napardas dagiti pasamak. Dimmarup ni Ayos  ngem sakbay  a maitagbatna ti bunengna, nagbusi ti paltog ti maysa kadagiti armado a lalaki. Nakusbo ni Ayos. Dinilpatan ti danum ti karayan ti bagina. Nagkolor nalabaga ti danum.

“Ayooss!” nagparintuod ni Lakay Badong sana binangon ti kaanakanna. Awanen ti anges ni Ayos.

Iti nakita dagiti mannalon ti langa dagiti aguliteg, gimmil-ayab ti pungtotda. Sakbay a nakapagkuti dagiti nagtagipaltog,  nagtudon dagiti talunasan. Naitagbat ti dadduma, idinto a naiwelwel iti bagi dagiti tallo ti sumagmmano. Kas ken ni Ayos, dinilpatan met ti Karayan Immuleg ti bangkay dagitoy. Lalo pay a limmabbaga ti danum.

“Makitam ti resulta ti panangipapilityo iti kayatyo. Naibuis ti biag ni Ayos. Ngem  simbolo ti kinabannuar ket isu ti gapu tapno ituloymi a salakniban ti Immuleg,” intudo ni Lakay Badong ti anakna.

Napabutngan dagiti nakalugan iti trak nga ayan dagiti tubo ket pinasayagdan dagiti trak nga immadayo.

Nabati ni Macario a nakamattider iti ayanna. Saan a mamati a natayen ti kasinsinna.  In-inut, inyaddangna dagiti sakana. Immarakup iti amana ket kasla ubing a nagsangit. “Pakawanendak, ‘tang!”

“Saan a siak ti dumawatam iti pammakawan,” kinuna ni Lakay Badong.

“Insan, siak ti nakaigapuan ti pannakapasagmo. Ngem ikarik iti rabaw ti bangkaymo, idauluak dagiti bumarangay a mangsalaknib iti Karayan Immuleg. Agingga a sibibiagak, didanto matagikua daytoy,”insaibbbek ni Macario sana sinakruy ti kasinsinna.

Napalabas ti makalawas sa nagsubli dagiti trak. Kas iti sigud, binayabay dagiti armado a lallaki. Iti likud, sumarsaruno ti lugan ti mayor.

Dagus a naummong dagiti mannalon nga indauluan dagiti agama a Lakay Badong ken Macario a nakaiggem iti paltog.

“Mayatkayo man wenno madikayo, maituloyen ti proyekto. Saan a dakayo ti makatubeng iti daytoy!” nasipnget ti rupa ti mayor a nagwagwagis.

“Mayatkayo man wenno madikayo, dependeranmi  daytoy a lugar!” imbales ni Macario.

“Heh, Mac, agtalnaka ta uray sika ket nagnumar itoy a proyekto!” nagsagkak ni Mayor Cumacaot.

“Isublik ti kuartam basta diyon riribuken ti Karayan Immuleg,” impuruak ni Macario ti bag a nakaipalaonan ti kuarta.

“Aglisika ditan, Mac, no dimo kayat ti maipada iti kasinsinmo.”

“Saan a bale, mayor, nakasaganaak a mapasag ngem ipasiguradok met a maipadakayo kadagiti buyotmo a naganda la’t agsubli sadiay ili!” immirut ti petpet ni Macario iti paltog.

Kinita ti mayor dagiti bumarangay. Iti langa dagitoy, awan amakda a pumatay ken matay mairupirda la ketdi ti kalinteganda. Minulagatanna da Lakay Badong ken Macario ngem nakidinnaer dagitoy.

Imbaw-ing ti mayor ti panagkitana. “Saantayo pay a nalpas,” impangtana sa  limmugan iti kotsena. “Intayon,” immandarna kadagiti pasurotna.

“Nakasaganakami iti aniaman nga oras, mayor,” impakamakam ni Macario.

Nagdir-i dagiti bumarangay idi agbuelta dagiti lugan. Impukkawda ti nagan daydi Ayos ken ni Macario.

Simmina ni Lakay Badong iti grupo tapno luminong iti duogan a kayo.  Ammona, saan pay a nalpas ti laban. Agsublinto ti mayor tapno ipursigena ti natungday a proyekto. Ngem awan itan ti amakna ta ammona nga idauluanto latta ni Macario dagiti bumarangay tapno malapdan ti pannakadadael ti ipatpategda a Karayan Immuleg.#