sinursuran-banner-sqSinursuranNi Jobert M. Pacnis

Ti Kayaw ti Aplaya ti Ballesteros

Kolum: Sinursuran

 Ni Jobert M. Pacnis

(Maudi a paset)

 

Ti pay pagsayaatanna, uray awan kuartam nga igatangmo, mabalinmo ti makaraman iti pagaayatmo a sidaen. No mairana nga adda agdaklis, tumulongka laeng nga agguyod. No met adda agsang-at a bilog a napan nagsigay iti taaw, makipagduronka laeng iti isang-atda a barangay ket ora-mismo, addan yawidmo a sidaen. Wenno itunom a dagus iti baybay ta ditoykan a mangilabban. Saan a parikut ti paglutuan ta adda dagiti indaknir ti allawig a runo ken kayo a mabalin nga usaren nga agluto. Ania ketdin a pasadas a makaited iti lagip a dinto umbaas!

Saan laeng dayta ti mabalin a kayaw ti aplayami. Libre pay ti panagtalinaed ditoy kabayatan ti panagnunogmo iti baybay. Mangitugotka laeng iti trapal a paglinongam no kasta a kumuddot ti init. Dimo pakadanagan ti linak ken talna, ta sigurado nga awan mangdangran kenka. Dakkel ti respeto dagiti kalugaranmi kadagiti ganggannaet nga umay ditoy ‘yanmi.

Kinapudnona, diak met maliwayan ti ag-jogging idi iti aplaya tunggal alas singko iti agsapa. Saan a pagdanagan ti kinasipnget ti kadaratan kadagita nga oras ta kas nakunakon, awan ti pakaan-annuan. (Ngem diakon maannong daytoy iti kaaddan ti beybi nga aw-awir.)

Kadagiti met pantok, nupay bassiten, adda pay laeng nabati a pagbayyabasan wenno pagbayoyoan no panawenda. Nagimas man dagitoy a saramsamen bayat ti pampannagnam wenno panagtugtugawmo a mangbuybuya iti ileleggak ti init. Ken adu pay ti bakong nga agas ti lamlamiis iti bagi.

Sigurado met a nadalus ti danum ti aplayami. Kasla mabain dagiti basura nga aglang-ay iti barukong ti baybay. Sa laeng nalibeg no kasta nga adda limmabas a bagyo aglalo iti Tanap. Ta dagiti mayanud a pitak, runo, basura ken kayo manipud kadagiti bantay, sigurado nga agturongda amin iti baybay. Ngem kalpasan laeng ti sumagmamano nga aldaw, maidaknirda dagitoy iti igid nga isu met ti in-inut a pagnumaranmi nga agindeg. Adu ti maitulodda a kas pagtungo. Wenno panglagda iti balay. Isu nga apagbiit a madalusan ti igid ti baybay. Adunto pay laeng ti mabati a mabalin nga usaren dagiti dadduma a bisita.

Kinapudnona, tunggal Kuaresma, mammamsek ti aplayami kadagiti mangur-uray iti Panagungar ni Kristo. Kunam no agpiesta. Kasla makitkitam daydi buya a panangisuro ni Jesus iti tengnga ti dan-aw a naglugananna iti barangay idinto nga adda iti takdang dagiti tao a dumdumngeg kadagiti saona.

Ti pay pakaay-ayoak la unay ditoy aplayami, adu latta dagiti gakka, karibuyo, kusimay ken tarukoy a naimas nga idasar iti lamisaan. Malagipko la unay ti panagubingko kadagitoy. Sumurotsurotak idi ken tatang a mapan manarukoy a rabrabii. Iti met aldaw no kasta nga agkaliak iti kusimay. Imasek la unay nga isagpaw daytoy iti uggot ti kamotit. Naglaok a sam-it ken apagdillaw nga apgad ti maramanam. Kaldo a naraman ken nasustansia!

Daytoy a kaay-ayok a lugar, adda met sangsanguenna a peggad, kas nakunak itayen, ka-Sinursuran. Naruay ita a pannakaminas dagiti kaarrubami nga il-ili. Maal-ala dagiti magnetite a maibiahe kadagiti pagilian iti asideg. Addada met mayat idi a mangserrek iti ilimi tapno kurobenda dagitoy nangisit  a balitok. Ngem dida nagballigi. Nagmaymaysakami nga agindeg a di umannugot itoy.

Nupay nagballigikami, agtultuloy latta ti pangta. Mapagam-amkan pay a mairamankami met laeng iti dakes nga epekto ti panagminas. Iti kinaawan sardayna a pannakaminas dagiti kaabaymi, addanto la ket panawen nga agsagrapkami iti didigra. Yad-adayo la ti Namarsuan…

Ket dayta ti dakkel a karit ita kadakami nga agindeg tapno daytoy kaay-ayok/kaay-ayomi a lugar, saan a mapunas iti mapa ti pagilian.

Ngem ipanamnamami ketdi nga agingga iti adda angesmi, ilabanmi ti kalinteganmi nga umili. Dimi ipalubos a pagnumaran laeng dagiti bukatot a politiko ti kinabaknang ti aplayami.

Sapay la koma met ta kastakayo met, ka-Sinursuran, a kapadami iti parikut.#